信仰偉人Su-pò͘-chin牧師
Sìn-gióng uí-jîn Su-pò͘-chin Bo̍k-su
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第814卷 |
| 日期 | 1956/10 |
| 頁數 | 13 |
白話字（原文數位化）
1956 nî 10 goe̍h p.13-14
Sìn-gióng uí-jîn Su-pò͘-chin Bo̍k-su
(Khó͘ Chuí-lō͘)
Kám-siā Chú, hō͘ lán ū hó ê ki-hoē thang saⁿ-kap gián-kiù sìn-gióng uí-jîn-toān tiong ê uí-jîn Su-pò͘-chin Bo̍k-su. uī-tio̍h choá-bīn ê koan-hē, beh chin kán-tan lâi kóng. ǹg-bāng ē-tit-thang chò lán sìn-gióng siōng ê toā pang-chān.
- I ê chhut-sì kap pē-bó.
I tī Chú-āu 1834 nî 6 goe̍h 19 ji̍t chhut-sì tī Eng-kok ài-sek-sū chiu (Esezugus) ê Kek-liû-tiān(Caerubethen) ê chi̍t ê sàn-hiong ka-têng. I ê lāu-pē chá chò To̍k-li̍p-phài ê bo̍k-su, āu-lâi chò Chìm-lé-hoē ê bo̍k-su. I ê ka-têng sī kèng-uì Siōng-tè, ū lêng-khì chhiong-moá ê sio̍k lêng ê ka-têng. I ê lāu-bó sī tiōng kî-tó kèng-khiân ê hū-jîn-lâng. Tuì I ê lāu-bó jia̍t-sim ê kî-tó, hō͘ I chiong-lâi chiâⁿ-chò chi̍t ê chin uí-tāi ê toā soat-kàu-ka. Chhin-chhiūⁿ Thè-mô͘-thài ê lau-bú Iú-nî-ki khiân-sêng ê kî-tó, āu-lâi hō͘ Thê-mô͘-thài chiâⁿ-chò chin uí-tāi ê chong-kàu-ka(I Thê 1:5-10).
- I ji̍p sìn-gióng kap thoân-kàu ê tōng-ki.
I siàu-liân ê sî siông-siông kap lāu-pē khì keh-piah chng ê kàu-hoē chò lé-pài(hit sî lāu-pē sî-chit liáu). Ū chi̍t ji̍t, chin koâⁿ koh lo̍h seh, I ê lāu-bó tuì in kóng, Kin-á-ji̍t lín khì keh-piah ê Bí-í-bí-hoē ê pài-tn̂g lé-pài chin hó. In kàu uī chí-ū 13 ê lâng(hoē-iú) tī lāi-bīn hoé-lô͘ piⁿ teh hang-hoé. Lé-pài ê sî-kan kàu ê sî, bô khoàⁿ-kìⁿ bo̍k-su, chí-ū khoàⁿ-kìⁿ chi̍t uī sán-thiu ê tiúⁿ-ló chiūⁿ tâi-téng thè bo̍k-su chhú-lí lé-pài. I tha̍k Sèng-keng liáu, tuì hoē-chiòng kóng, Sèng-keng kóng, “Toē-ke̍k ê bān-bîn, lín lóng tio̍h gióng-bōng Goá, chiah oē tit-tio̍h kiù.” Hit ê tiúⁿ-ló tuì chit ê siàu-liân ê Su-pò͘-chin kóng, Siàu-liân lâng ah! Lí tio̍h gióng-bōng Ki-tok. Chú Iâ-so͘ kóng, “Tio̍h gióng-bōng Goá , Goá uī-tio̍h lí lâu huih-koāⁿ, Goá uī lí tèng si̍p-jī-kè, Goá uī lí sí, lí tio̍h gióng-bōng Goá.” Chit kù chin ū la̍t ê oē chha̍k siàu-liân-lâng Su-pò͘-chin ê sim. I siū chin toā ê kám-kek, siū sèng-lêng ê chhiong-moá, chiū choan-sim gióng-bōng Ki-tok, chhin-chhiūⁿ gī ê thài-iông ji̍p tī I ê sim, tit-tio̍h toā sèng-lī.Toā kám-siā Chú Iâ-so͘ ê toā chû-pi kap thiàⁿ-thàng, uī-tio̍h I lâu pó-hoeh lâi sí tī si̍p-jī-kè lâi sio̍k I ê choē. I chiū chek-sî koat-sim beh hiàn I ê it-seng lâi chò Chú ê kang.
- I ê káng-tō
1) I 15 hoè ê sî chiū chiūⁿ-tâi kóng tō-lí.
2) I 17 hoè ê sî chiū hū-khí bo̍k-hoē ê choân chek-jīm ê kong-êng.
3) I thâu chi̍t pái bo̍k-hoē Ò-tāi chhī kàu-hoē(Warter Beach Church).
4) I 20 hoè ê sî(A.D. 1853) siū phèng chò Lûn-tun Sin-pa-khek kàu-hoē ê bo̍k-su (New Berk Church). Khì-chho͘ chit keng kàu-hoē ê hoē-iú 84 miâ, I tī hia bo̍k-hoē chi̍t nî goā ê keng-koè, hoē-iú ke chin-chē, muí chú-ji̍t lâi chò lé-pài ê thèng-chiòng ū 4500 miâ. Tuì án-ni I ê miâ-siaⁿ chin tháu.
5) A.D. 1856-1859 nî, I siông-siông chioh chin toā ê im-ga̍k-tn̂g chò lé-pài, thèng-chiòng chi̍t bān í-siōng.
6) A.D. 1860-1861 nî, uī-tio̍h I kiàn-tiok chi̍t keng chin toā ê lé-pài-tn̂g, chē-uī chi̍t bān lâng í-siōng.
7) I ū sî siū chhiáⁿ kàu Lûn-tun siâⁿ-goā toā chuí-chiⁿ-kiong ê toā lé-tn̂g káng-tō, thèng-chiòng 28654 miâ, ū khak-si̍t ê kì-lio̍k. I uī-tio̍h beh tī chit keng toā lé-tn̂g kóng tō-lí, tāi-seng khì chhì káng toā siaⁿ kóng, “Lí khoàⁿ Siōng-tè ê iûⁿ-ko beh tam-tng sè-kan lâng ê choē ê.”Chāi káng-tn̂g lāi ū chi̍t ê chit-oân thiaⁿ-tio̍h chit kù oē siū toā kám-kek lâi sìn Chú.
- I ê kang-chok kap pia̍t-sè.
I 38 nî kú thoân-tō ê seng-oa̍h, siá 3500 phiⁿ ê soat-kàu ê goân-kó. I ê káng-tō chin ū toā ê le̍k-liōng, siū kám-tōng hoé-kái ê lâng chin-chē. I iā chin gâu tù-chheh, ū tù 135 pún, kî-thaⁿ iā ū tù chin-chē toaⁿ-hêng-pún ê sió chheh, kap hoat-khan “Kiàm kap chhiú-kin” ê cha̍p-chì. I ū siat ko͘-jî-īⁿ, ióng-ló-īⁿ kap kî-thaⁿ chò chin-chē ê chû-siān sū-gia̍p. I ê it-seng uī pīⁿ-thiàⁿ tò͘-cheng. I tī Chú-āu 1892 nî 1 goe̍h 31 ji̍t hióng-siū 60 hoè , ji̍p tī Siōng-tè êng-kng ê pó-chō. Goān lán tāi-ke o̍h I sìn-gióng ê hó bô͘-iūⁿ, it-seng lâi tui-suî Chú Iâ-so͘ ê kha-pō͘ lâi êng-hián I ê sèng-miâ.
漢羅（Ùi原文改寫）
信仰偉人Su-pò͘-chin牧師
(Khó͘ Chuí-lō͘)
感謝主， hō͘咱有好ê機會thang相kap研究信仰偉人傳中ê偉人Su-pò͘-chin牧師。為tio̍h紙面ê關係， beh真簡單來講。 向望ē-得-thang做咱信仰上 ê大幫贊。
1.伊ê出世kap父母。
伊tī主後1834年6月19日出世 tī英國ài-sek-sū 州 (Esezugus) ê Kek-liû-tiān(Caerubethen) ê一個散鄉家庭。伊ê老父早做獨立派ê牧師，後來做浸禮會 ê牧師。伊ê家庭是敬畏上帝，有靈氣充滿ê屬靈ê家庭。伊ê老母是重祈禱敬虔ê婦人人。 Tuì伊ê老母熱心ê祈禱， hō͘伊將來成做一個真偉大ê大說教家。親像提摩太 ê 老母 Iú-nî-ki虔誠ê祈禱，後來hō͘提摩太成做真偉大ê宗教家(I Thê 1:5-10)。
2.伊入信仰kap傳教ê動機。
伊少年ê時常常kap老父去隔壁庄 ê教會做禮拜(hit時老父辭職了)。有一日，真koâⁿ koh落雪，伊ê老母對in講，今仔日lín去隔壁ê Bí-í-bí-會 ê拜堂禮拜真好。 In到位只有13個人(會友) tī內面火爐邊teh 烘火。禮拜ê時間到ê時，無看見牧師，只有看見一位sán-thiu ê長老上台頂替牧師處理禮拜。伊讀聖經了， 對會眾講：聖經講：”地極ê萬民， lín攏tio̍h仰望我， chiah會得tio̍h救。” hit-ê長老對這個少年ê Su-pò͘-chin講：少年人ah！你tio̍h仰望基督。主耶穌講：”Tio̍h仰望我，我為tio̍h你流血汗，我為你釘十字架，我為你死，你tio̍h仰望我。” 這句真有力ê話鑿少年人Su-pò͘-chin ê心。伊受真大ê感激，受聖靈ê充滿，就專心仰望基督，親像義ê太陽入tī伊ê心，得tio̍h大勝利。大感謝主耶穌ê大慈悲kap疼痛，為tio̍h伊流 寶血來死tī十字架來贖伊ê罪。伊就即時決心beh獻伊ê 一生來做主ê工。
3.伊ê講道
1)伊15 歲 ê時就上台講道理。
2)伊17 歲 ê時就負起牧會 ê全責任ê光榮。
3)伊頭一擺 牧會 Ò-tāi chhī教會(Warter Beach Church)。
4)伊20 歲 ê時(A.D. 1853)受聘做倫敦 Sin-pa-khek教會ê牧師(New Berk Church)。起初 這間教會ê會友84名，伊tī hia 牧會一年goā ê經過，會友加真濟，每主日來做禮拜ê 聽眾有4500名。 Tuì án-ni伊ê名聲真透。
5) A.D. 1856-1859年，伊常常借真大ê音樂堂做禮拜， 聽眾一萬以上。
6) A.D. 1860-1861年，為tio̍h伊建築一間真大ê禮拜堂，坐位一萬人以上。
7)伊有時受請到倫敦城外大水晶宮 ê大禮堂講道， 聽眾28654名，有確實ê記錄。伊為tio̍h beh tī 這間大禮堂講道理，事先去試講大聲講：”你看上帝ê羊羔beh擔當世間人ê罪ê。”在講堂內有一個職員聽tio̍h 這句話受大感激來信主。
4.伊ê工作kap 別式。
伊38年久傳道ê生活，寫3500 篇 ê 說道ê 原稿。伊ê講道真有大ê力量，受感動悔改ê人真濟。伊也真gâu 著冊，有著 135本，其他也有著真濟單行本ê小冊， kap 發刊 “劍kap手巾” ê雜誌。伊有設孤兒院， 養老院 kap其他做真濟ê慈善事業。伊ê 一生為病痛鬥爭。伊tī主後1892年1月31日享受60 歲 ，入tī上帝榮光ê寶座。願咱大家學伊信仰ê好模樣， 一生來追隨主耶穌ê腳步來榮顯伊ê聖名。