研究音樂kap崇拜
Gián-kiù Im-ga̍k kap chong-pài
文獻資訊
| 項目 | 資料 |
|---|---|
| 作者 | 陳泗治 Tân Sù-tī |
| 卷期 | 台灣教會報 |
| 卷期 | 第811卷 |
| 日期 | 1956/7 |
| 頁數 | 10 |
白話字（原文數位化）
1956 nî 7 goe̍h p.10-11
Im-ga̍k kap chong-pài
(Tân sù-tī)
Bô-lūn goân-sí-tek chong-kàu á-sī choè sûn-choân ê chong-kàu, in ê chong-pài lóng ū im-ga̍k ê iàu-sò͘ tī-teh. In-uī im-ga̍k kap chong-pài pîⁿ-pîⁿ sī lâng ê cheng-sîn-tek piáu-hiān (Tuì sìn-ha̍k-tek khé-sī-lūn ê sū chhiáⁿ goān-liōng chiām-sî put-thê.) tuì-tī án-ni, tī chong-pài ê tiong-kan chū-jiân chiū ū im-ga̍k ê li̍p-tiûⁿ kap chûn-chāi ì-gī tī-teh. Koh-chài hit ê koan-hē sī chin chhim.
- Sím-mi̍h sī im-ga̍k?
Goá sī ài tuì Ki-tok-kàu sìn-gióng ê li̍p-tiûⁿ lâi saⁿ-kap siūⁿ chit hāng sū. Siōng-tè tī chū-jiân ê bí kap kî-biāu ê lāi-bīn kap tī jîn-seng ê tiong-kan ū khé-sī i pún-sin. ia̍h lâng tī gē-su̍t lâi èng-tap chit ê khé-sī (tī Ki-tok ê te̍k-sû khé-sī put-thê). Só͘-í sûn-chèng ê gē-su̍t ia̍h sī chi̍t ê sîn-sèng ê cheng-sîn-tek piáu-hiān. Thang kóng chhin-chhiūⁿ chin-lí ê kun-goân sī Siōng-tè, bān-mi̍h sī Chú só͘ chhòng-chō ê; gē-su̍t ê goân-thâu iā-sī tī Siōng-tè ê pún-chit ê lāi-bīn. Lán tio̍h bêng-pe̍k chit ê sū chiah oē chai im-ga̍k, bí-su̍t kap tiau-khek ê kè-ta̍t. Lūn im-ga̍k lâi siūⁿ; Siōng-tè chhòng-chō lâng ê seng-khu pí jīm-hô pa̍t-khoán ê tōng-bu̍t to khah ha̍h tī choè chhut suí koh ho̍k-cha̍p ê im-ga̍k ê lō͘-ēng kap ki-lêng. Thâu-ló, sîn-keng, hī-khang, nâ-âu, chhiú kap chńg-thâu-á téng-téng, si̍t-chāi thang kóng ná chhin-chhiūⁿ uī-tio̍h beh sek-iōng tī im-ga̍k chiah chhòng-chō lâng chit ê khoán-sit ê khoán! Só͘-í im-ga̍k sī Siōng-tè ê pó-poè ê un-sù ê chi̍t hāng, sī Chú beh thê-ko jîn-luī lêng-sèng ê chi̍t ê hùn-io̍k-tek kong-kū kap chhâi-liāu.
- Chong-pài ê pún-chit.
Chong-pài sī lâng hiàn hō͘ Siōng-tè ê êng-kng. Chong-pài m̄-nā kan-ta sī beh chō-chiū lán ê phín-sèng choè i ê bo̍k-tek nā-tiāⁿ, koh-khah iàu-kín ê chiū-sī i pún-sin sī hiàn hō͘ Chú ê êng-kng. Sī ke-thiⁿ tī Chú ê bián-liû ê chi̍t lia̍p chhiⁿ. ia̍h chit ê chong-pài thang kóng ū nn̄g hong-bīn ê iàu-sò͘ tī-teh. Piáu-biān-tek kap loē-biān-tek. ia̍h nn̄g hāng lóng pîⁿ tiōng-iàu. Piáu-biān-tek ê chiat-bo̍k tī chong-pài ê sūn-sū ê lāi-bīn oē thê-ko kap chhiong-si̍t loē-biān-tek cheng-sîn kap sìn-gióng. Im-ga̍k tī chong-pài ê sî thang kóng sī chi̍t khoán ê goā-biān-tek pang-chān, iáu-kú hit ê hāu-kó ū sî sī pí sím-mi̍h to khah toā!
Koh-chài chong-pài ū nn̄g ê hong-hiòng, chiū-sī Siōng-tè ǹg lâng kap lâng ǹg Siōng-tè. Soan-tho̍k Sèng-keng, chiok-tó kap sià-choē ê soan-kò chiah ê chiū-sī Siōng-tè ǹg lâng; gîm-si, kî-tó kap liām sìn-keng chiah ê chiū-sī lâng ǹg Siōng-tè ê oa̍h-tāng. Só͘-í gîm-si chok-ga̍k tī chong-pài ê tiong-kan hit ê tuì-siōng sī kap chong-pài saⁿ-tâng. Chit hāng sū chhiáⁿ m̄-thang hut-lio̍k.
- Im-ga̍k kap chong-pài ê koan-hē.
Kì-jiân im-ga̍k ê kun-goân sī Siōng-tè, koh-chài tī chong-pài ê sî im-ga̍k ê tuì-siōng sī kap chong-pài siâng-khoán, chiū chit nn̄g hāng ê koan-hē si̍t-chāi m̄-sī chhián. Si kap koa(sû kap khek) ū chhin-chhiūⁿ pe-chiáu ê nn̄g ki si̍t, ū toà hok-im kàu tī choân-toē. Kìⁿ-nā ū toà hok-im ê só͘-chāi, sin khai-thok ê toē-hng, sìn-gióng ho̍k-heng ê kàu-hoē á-sī sím-mi̍h kái-kek ê ūn-tōng ê só͘-chāi, lóng ū sèng-si ê siaⁿ-im thang thiaⁿ-kìⁿ. ióng-chòng koh oa̍h-tāng, iu-bí koh khoài-lok! In-uī im-ga̍k m̄-sī chhin-chhiūⁿ jazz beh kek-tōng lâng ê kha-āu-tiⁿ (heels), sī beh kek-tōng lâng ê thâu-ló, lí-sèng(head) kap sim-koaⁿ(heart), só͘-í chū-jiân it-chhè ê chong-kàu oa̍h-tāng ê tiong-kan bô im-ga̍k boē ēng-tit! Chong-pài iā-sī sim kap lêng ê oa̍h-tāng, bō-lūn sī pi-ai á-sī khoài-lo̍k ê chong-pài, kìⁿ-nā sī chong-pài chiū tek-khak ū im-ga̍k(gîm-si) tī-teh, goân-in chiū-sī chāi-tī chit-ê.
Goá ǹg-bāng lán Tâi-oân ê kàu-hoē im-ga̍k oē koh-khah chìn-pō͘, thang hō͘ lán ê chong-pài kap lóng-chóng ê kang-chok ná ke-thiⁿ loē-iông kap oa̍h-khì lâi ko-kú si̍p-jī-kè ê chiàn-kî, êng-kng Chú ê sèng-miâ.
漢羅（Ùi原文改寫）
音樂kap崇拜
(陳泗治)
無論原始-tek宗教á是做純全ê宗教， in ê 崇拜攏有音樂ê 要素tī-teh。因為音樂kap 崇拜平平是人ê精神-tek表現(對信學-tek啟示論ê事請原諒暫時不提。)對tī án-ni， tī 崇拜ê中間自然就有音樂ê立場kap存在意義tī-teh。 Koh再hit個關係是真深。
1。甚麼是音樂？
我是ài tuì基督教信仰ê立場來相kap想這項事。上帝tī自然ê美 kap奇妙ê內面kap tī人生ê中間有啟示伊本身。ia̍h人tī藝術來應答這個啟示(tī基督ê特殊啟示不提)。所以純正ê藝術亦是一個神聖ê精神-tek表現。 Thang講親像真理ê根源是上帝，萬物是主所創造ê；藝術ê源頭也是tī上帝ê本質ê內面。咱tio̍h明白這個事chiah會知音樂， 美術 kap雕刻ê價值。論音樂來想；上帝創造人ê身軀比任何別款ê動物多 khah合tī做出suí koh 複雜ê音樂ê路用kap 機能。頭腦，神經，耳孔，嚨喉，手kap指頭á等等，實在thang講ná親像為tio̍h beh設用tī音樂chiah創造人這個款式ê款！所以音樂是上帝ê寶貝ê恩賜ê一項，是主beh 提高人類靈性ê一個訓育-tek 工具kap材料。
2。 崇拜ê本質。
崇拜是人獻hō͘上帝ê榮光。 崇拜m̄-nā kan-ta是beh造就咱ê 品性做伊ê目的nā-tiāⁿ， koh-khah要緊ê就是伊本身是獻hō͘主ê榮光。是加添tī主ê冕旒ê一粒星。亦這個崇拜thang講有兩方面ê 要素 tī-teh。 表面-tek kap 內面-tek。亦兩項攏pîⁿ重要。 表面-tek ê 節目 tī 崇拜ê順序ê內面會 提高 kap 充實 內面-tek精神kap信仰。音樂tī 崇拜ê時thang講是一款ê 外面-tek幫贊， iáu-kú hit個效果有時是比甚麼to khah大！
koh再崇拜有兩個方向，就是上帝ǹg人kap人ǹg上帝。 宣讀聖經， 祝禱 kap赦罪ê宣告chiah ê就是上帝ǹg人；吟詩，祈禱kap念聖經 chiah ê就是人ǹg上帝ê活動。所以吟詩作樂tī 崇拜ê中間hit個 對象是kap 崇拜相同。 這項事請m̄-thang忽略。
3。音樂kap 崇拜ê關係。
既然音樂ê根源是上帝， koh再tī 崇拜ê時音樂ê 對象是kap 崇拜siâng款，就這兩項ê關係實在m̄是淺。 詩kap歌(詞 kap 曲)有親像飛鳥ê兩支翼，有帶福音到tī全地。見若有帶福音ê所在，新開拓ê地方，信仰復興 ê教會á是甚麼改革ê運動ê所在，攏有聖詩ê聲音thang聽見。勇壯koh活動，優美koh快樂！因為音樂m̄是親像jazz beh激動人ê腳後tiⁿ (heels)，是beh激動人ê頭腦，理性(head) kap心肝(heart)，所以自然一切ê宗教活動ê中間無音樂boē用得！ 崇拜也是心kap靈ê活動，無論是悲哀á是快樂ê 崇拜，見若是崇拜就的確有音樂(吟詩) tī-teh，原因就是在tī 這個。
我向望咱台灣ê教會音樂會koh-khah進步， thang hō͘咱ê 崇拜kap攏總ê工作ná加添內容kap活氣來高舉十字架ê戰旗，榮光主ê聖名。