講壇：得全世界喪失性命
Káng-toâⁿ Tit choân sè-kài Sòng-sit sèⁿ-miā
文獻資訊
| 項目 | 資料 |
|---|---|
| 作者 | 陳思聰 Tân Su-chhong |
| 卷期 | 台灣教會報 |
| 卷期 | 第808卷 |
| 日期 | 1956/4 |
| 頁數 | 12 |
白話字（原文數位化）
KÁNG-TOÂⁿ
Tit choân sè-kài, Sòng-sit sèⁿ-miā
1956.04 808 hō p.12-14
(Tân Su-chhong)
Kó͘-chá sî-tāi, bô to͘-chhī, bô chhī-tiûⁿ, bô ēng chîⁿ chò bé-bē, lóng sī ēng mi̍h kau-oāⁿ mi̍h. Kàu āu-lâi siat to͘-chhī, chù kim, gîn, tâng, choá-phió, chò hoè-pè, lâi chò bé-bē. Kau-oāⁿ chiū pìⁿ-chò bé-bē.
Tī chia kóng ēng choân sè-kài kap kò-jîn ê sìⁿ-miā lâi kau-oāⁿ, tó chi̍t hāng khah kè-ta̍t? Lán kiám-chhái beh kóng, sè-kài khah kè-ta̍t. Nā-sī Iâ-so͘ pò lán chai, sìⁿ-miā ū sím-mi̍h lī-ek?
Ū chi̍t ê Má Chhâ-lîm, i tuì pi-chiān kàu chin koân, chò Hoat-lân-se ê tāi-ông, êng-hoâ, hù-kuì, kim-gîn, châi-pó moá chhù keng. Ū chi̍t sî i phoà-pīⁿ, i-seng kā i kóng, koh n̄g goe̍h-ji̍t chiū ē sí, i chin toā hoân-ló, bô pêng-an. Kàu beh sí ê sî, koh chi̍t pái khoàⁿ i só͘ chek-thiok, kui chhù-keng ê châi-pó, i chiū kóng, Goá tek-khak tio̍h pàng-sak chiah ê mah? Goá sī tē-it khó-lîn ê lâng! Goá beh tit-tio̍h sím-mi̍h leh! Goá beh tó-uī khì leh! oē kóng soah, chiū sí lah! Lâng tit choân sè-kài, sòng-sit sìⁿ-miā ū siáⁿ lī-ek?
Ū chi̍t uī toā tē-chú, chhut bē thó͘-tē, tē-kè chi̍t ji̍t 1000 kho͘. Ì-sù chiū-sī bé-chú nā kau-liáu chi̍t-chheng kho͘, thang tī bē-chú ê thó͘-tē cháu chi̍t ji̍t, kìⁿ-nā só͘ cháu koè ê hoân-uî lāi, bô-lūn loā chē thó͘-tē, lóng beh kui bé-chú; put-kò nā bē pháu chi̍t ê îⁿ-khoân, chi̍t-sut-á to bē tit-tio̍h. Hit-sî ū chi̍t ê chheng-liân lâng, the̍h chhut chi̍t-chheng kho͘, kau hō͘ bē-chú, chheng-liân lâng tuì thàu-chá chiū khai-sí pháu-cháu, cháu kàu tiong-tàu, pak-tó͘ chin iau, iā m̄-káⁿ hioh-khùn chia̍h-pn̄g. I tuì pak-tó͘ án-uì kóng, lí tio̍h thun-lún ê-hng 6 tiám, chiah lâi chia̍h. In-uī chia̍h-pn̄g ē liáu sî-kan. I chiū koh chhut-la̍t pháu-cháu; chhuì-ta iā bô lim, ià-siān iā bô hioh-khùn, Sin-thé ti̍t-ti̍t tòng bē tiâu, i tuì sin-thé kóng, lí tio̍h thun-lún, kin-ná-ji̍t kan-khó͘, bîn-á-ji̍t chiū khoàⁿ-oa̍h; kin-á-ji̍t sàn-hiong, bîn-á-ji̍t chiū hó-gia̍h. Piàⁿ miā chhut-la̍t cháu, cháu kàu uī, tó tī thô͘-kha, khuì tn̄g, chiū sí lah!
Chit lâng só͘ tit-tio̍h sī chi̍t uī koaⁿ-chhâ tē nā-tiāⁿ. Tit choân sè-kài sòng-sit sìⁿ-miā, ū sím-mi̍h lī-ek? Choân sè-kài thang tit-tio̍h mah? Lâng só͘ tit-tio̍h sī loā-chē? Kiám m̄-sī chi̍t oáⁿ pn̄g thang chia̍h, chi̍t niá saⁿ thang chhēng, chi̍t keng chhù thang toà, ū kang thang chò, án-ni chiū kàu-gia̍h lah! Siat-sú tit-tio̍h choân sè-kài, ē thang kú-tn̂g hióng-siū mah? Toàn-toàn bē-ē. Sè-kài kap i ê chêng-io̍k teh koè-khì lah! En̂g-hoâ, hù-kuì sī chiām-sî, lán tio̍h lia̍h sìⁿ-miā chò iàu-kín.
Ū chi̍t lâng tī hái-nih chē chûn, tú-tio̍h péng-chûn, hit lâng bē-hiáu siû-chuí, i chiū toā siaⁿ kiò kiù-miā oh! kiù-miā oh! Nā ū lâng kiù goá khí-lâi, goá beh chi̍t-pah kho͘ siúⁿ lâng; kó-jiân ū chi̍t ê thó-hî lâng kā i kiù khí-lâi, i chiū beh kā i thó chi̍t-pah kho͘. Hit ê hō͘ lâng kiù ê lâng, chiū the̍h chi̍t kho͘ hō͘ i nā-tiāⁿ. Hit ê kiù lâng ê lâng chiū kóng, poa̍h-lo̍h chuí, ài lâng kiù-miā; chi̍t-ē kiù chiūⁿ hoāⁿ, chiū m̄-khéng chhut chîⁿ, kóng oē kiám ū pîn-chún? Hit ê hō͘ lâng kiù ê lâng chiū kóng, Chi̍t tiap-á-kú nā-tiāⁿ, hō͘ lí chi̍t kho͘ gîn, pí lia̍h hî khah hó thàn, lí èng-kai kiù goá; lí nā bô kiù goá, choē kap thâi lâng pêⁿ-pêⁿ, lí chai mah? Kiù i ê lâng, thiaⁿ-liáu tiām-tiām. Koh bô kú; hit ê hō͘ lâng kiù ê lâng, koh poa̍h-lo̍h tī hái-nih. I chiū koh hoah kóng, Kiù-miā o͘h! Kiù-miā o͘h! Nā kiù goá khí-lâi, goá beh chē-chē chîⁿ hō͘ lâng. Chêng-ji̍t chit ê kiù lâng ê lâng, thiaⁿ-kìⁿ kiù lâng ê siaⁿ, m̄ khì kiù i, hit lâng chiū tîm-lîm sí lah! Hit ê ài chîⁿ m̄ khì kiù lâng ê lâng, tī i ê hī-khang tiāⁿ-tiāⁿ thiaⁿ chi̍t kù oē, “Khoàⁿ sí m̄ kiù, choē kap thâi lâng pêⁿ-pêⁿ.” Chit ê lâng thiaⁿ chit kù oē, soà phoà-pēⁿ, bô kú i iā sí-khì. Chit n̄g lâng lóng sī hoān-tio̍h siāng khoán ê pēⁿ, chiū-sī khoàⁿ-tāng kim-chîⁿ, bô khoàⁿ-tāng sìⁿ-miā, kàu boé nn̄g lâng lóng sí. Lia̍t-uī, lán tio̍h lia̍h sìⁿ-miā choè pó-poè. Chú Iâ-so͘ kóng, Lâng nā tit-tio̍h choân sè-kài, lâi sòng-sit i ê sìⁿ-miā ū siáⁿ lī-ek? Á-sī lâng beh chhut sím-mi̍h lâi tuì-oāⁿ i ê sìⁿ-miā (Thài 16:26).
漢羅（Ùi原文改寫）
講壇
得全世界，喪失性命
1956.04 808號 p.12-14
(陳思聰)
古早時代，無都市，無市場，無用錢做買賣，攏是用物交換物。到後來設都市，鑄金、銀、銅、紙票，做貨幣，來做買賣。交換就變做買賣。
佇遮講用全世界佮個人的生命來交換，tó一項較價值？咱撿彩欲講，世界較價值。若是耶穌報咱知，生命有甚物利益？
有一个Má Chhâ-啉5，伊對卑賤到真懸，做法蘭西的大王，榮華富貴，金銀財寶滿厝間。有一時伊破病，醫生共伊講，閣兩月日就會死，伊真大煩惱，無平安。到欲死的時，閣一擺看伊所積蓄，歸厝間的財寶，伊就講：「我的確著放拺遮的--mah？我是第一可憐的人！我欲得著甚物--leh！我欲tó位去--leh！」話講煞，就死--lah！人得全世界，喪失生命有啥利益？
有一位大地主，出賣土地，地價一日1000箍。意思就是買主若交了1000箍，通佇賣主的土地走一日，見若所走過的範圍內，無論偌濟土地，攏欲歸買主；不過若未跑一个圓環，一屑仔都袂得--著。彼時有一个青年人，提出1000箍，交予賣主，青年人對透早就開始跑走，走到中晝，腹肚真枵，也毋敢歇睏食飯。伊對腹肚安慰講，你著吞忍e昏6點，才來食。因為食飯會了時間。伊就閣出力跑走；嘴焦也無啉，厭siān也無歇睏，身體直直擋袂牢，伊對身體講：「你著吞忍，今仔日艱苦，明仔日著看活；今仔日散hiong，明仔日就好額。」拚命出力走，走到位，倒佇土跤，氣斷，就死--lah！
這人所得著是一位棺柴地nā-tiāⁿ。得全世界喪失生命，有甚物利益？全世界通得著--mah？人所得著是偌濟？敢毋是一碗飯通食，一領衫通穿，一間厝通蹛，有工通做，án-ni就夠額--lah！設使得著全世界，會通久長享受--mah？斷斷袂會。世界佮伊的情慾teh過--去lah！榮華，富貴是漸時，咱著掠生命做要緊。
有一人佇海--裡坐船，拄著反船，人袂曉泅水，伊就大聲叫救命--oh！救命--oh！若有人救我起--來，我欲100箍賞--人；果然有一个討魚人共伊救--起來，伊就欲共伊討100箍。彼个予人救的人，就提一箍予伊nā-tiāⁿ。彼个救人的人就講：「跋落水，愛人救命；一下救上岸，就毋肯出錢，講話敢有憑準？」彼个予人救的人就講：「一霎仔久nā-tiāⁿ，予你一箍銀，比掠魚較好趁，你應該救我；你若無救我，罪佮刣人平平，你知--mah？」救伊的人，聽了恬恬。閣無久；彼个予人救的人，閣跋落佇海--裡。伊就閣喝講，救命--oh！救命--oh！若救我起--來，我欲濟濟錢予--人。前日這个救人的人，聽見救人的聲，毋去救伊，彼人就沉沉--死lah！彼个愛錢毋去救人的人，佇伊的耳空定定聽一句話，「看死毋救，罪佮刣人平平。」這个人聽這句話，紲破病，無久伊也死--去。這兩人攏是關係像款的病，就是看重金錢，無看重生命，到尾兩人攏死。列位，咱著掠生命做寶貝。主耶穌講：「人若得著全世界，來喪失伊的生命有啥利益？抑是人欲出甚物來兌換伊的生命 (太16:26)。」