受chhoā去看ê事記tī下面

Siū chhoā khì khoàⁿ ê sū kì tī ē-bīn

文獻資訊

項目	資料
作者	吳瓊英 Gô͘ Khêng-eng
卷期	台灣教會報
卷期	第802卷
日期	1955/10
頁數	27

白話字（原文數位化）

Siū chhoā khì khoàⁿ ê sū kì tī ē-bīn

1955.10 802 hō p.27-28

(Chiap 9 goe̍h hō 27 bīn).

Taⁿ lán koh chìn-chêng lâi-khì, kàu chi̍t ê oat-kak, ū khoàⁿ chi̍t ê cha-bó͘ lâng, thàm chi̍t-ē, kiu ji̍p-khì, i chiū mn̄g kóng, he siáⁿ-hè? I ìn kóng, hit ê lâng teh khoàⁿ lâng ê sim-lāi, nā bô Chú ê Sîn, i chiū beh ji̍p khì. āu-lâi koh kiâⁿ kàu chi̍t só͘-chāi, khoàⁿ-kìⁿ chi̍t lâng chhiú the̍h Sèng-keng kap Si beh khì lé-pài, koh khoàⁿ chi̍t ê kuí lâi teh kā i khiú, i chiū kap i phah, khah thêng koh chi̍t ê kuí lâi, koh kap i teh phah, āu-lâi chiū hō͘ in tiong-kan chi̍t ê khiú-khì, koh chìn-chêng teh kiâⁿ, koh khoàⁿ-kìⁿ chi̍t-lâng chhiú the̍h Sèng-keng kap Si, koh khoàⁿ-kìⁿ nn̄g ê kuí oá-lâi teh kā i khiú, hit lâng khoàⁿ phah bē iâⁿ i, chiū kî-tó, “Chú ah, kiù goá,” Chú oá lâi, hit nn̄g ê kuí chiū cháu, chìn-chêng koh kiâⁿ, khoàⁿ-kìⁿ chi̍t ê lâng sin-piⁿ ū chi̍t ê lâng gia̍h chi̍t-ki koáiⁿ-á khiā teh, koh khah thêng nn̄g-ê kuí lâi teh kap i sio-phah, chit ê chí-moē chiū tuì Chú ê sù-chiá kóng, piⁿ-á hit ê lâng thái m̄ kín-kín kā i uī, thái beh pàng hō͘ hit nn̄g ê kuí kā i phah kàu án-ni; i ìn kóng, lí tiām-tiām, koh khoàⁿ, kàu āu-lâi hit ê lâng chai i phah su i, chiū toā-siaⁿ kiû kóng, “Chú ah! Kiù goá,” piⁿ-á ê lâng chiah gia̍h i ê koáiⁿ-á khí-lâi, hit nn̄g ê kuí chiū cháu khì. I khoàⁿ kàu chia chiū ti̍t-ti̍t chìn-chêng teh khì, hut-jiân tú-tio̍h chi̍t-lâng àⁿ-lo̍h khì khoàⁿ i ê bīn kóng, lí toaⁿ-sin chhut-goā mah? I lóng bô lia̍h chò sím-mi̍h ì-sù, koh thêng tiap-á-kú, tuì āu-bīn ū lâng lâi teh kā i khiú-saⁿ, i oa̍t koè-khì, khoàⁿ-tio̍h nn̄g ê kuí, i chiū ti̍t-ti̍t kap i sio-phah, koh khiú kuí ê chhiú lâi kā i kā kuí ê bah phò-phò, kā-tio̍h koh bô lâu hoeh, i chiū phuì hiat-ka̍k, chhàu-chhiⁿ chhàu-chhiⁿ, koh kā i kā, koh phuì hiat-ka̍k.

án-ni kap in phah liáu khoàⁿ bē iâⁿ--in, chiū kî-tó kóng: “Chú--ah! Kiù--goá.” Chú ê sù-chiá chiū lâi, i chiū kā i kóng, lí iā thang án-ni pàng goá chi̍t ê hiám-hiám hō͘ in thoa--khì, i chiū mn̄g i kóng: “Tī lō͘ tiong lí ū tú tio̍h chi̍t ê lâng iah bô?” ìn kóng: “Ū, hit lâng tuì lí kóng sím-mih?” I kóng: “Lí tan-sin chhut-goā--mah? án-ni lí phah m̄ kìⁿ Chú, lí iáu-kú m̄ chai-iáⁿ thang chhoē. Taⁿ lí tio̍h tó--khì, sî-sî khek-khek khîⁿ tiâu tī Chú, tio̍h sî-sî tha̍k Sèng-keng kî-tó kiat-liân tī Chú, m̄-thang phah m̄-kìⁿ Chú, lâng nā tan-sin chhut-goā chin guî-hiám.” Taⁿ chit ê chí-moē kā goá kóng, i nā teh léng-sim sit-chì ê sî, Chú ê sù-chiá chiū ē chhoā i khì khoàⁿ-khoàⁿ--lè, thang kà-sī i, che iā-sī chin thang chò lán ê chham-khó. (Oân). (Gô͘ Khêng-eng).

漢羅（Ùi原文改寫）

受chhoā去看的事記佇下面

1955.10 802號 p.27-28

(接9月號27面).

今咱閣進前來去，到一个斡角，有看一个查某人，探一下，勼--入去，伊就問講：「彼啥貨？」伊應講：「彼个人teh看人的心內，若無主的神，伊就欲入--去。」後來閣行到一所在，看見一人手提聖經佮詩欲去禮拜，閣看一个鬼來teh共伊揪，伊就佮伊拍，較停閣一个鬼來，閣佮伊teh拍，後來就予in中間一个揪--去，閣進前teh行，閣看見一人手提聖經佮詩，閣看見兩个鬼倚來teh共伊揪，彼人看拍袂贏--伊，就祈禱：「主--ah，救我。」 主倚來，彼兩个鬼就走，進前閣行，看見一个人身邊有一人攑一枝枴仔企--leh，閣較停兩个鬼來teh佮伊相拍，這个姊妹就對主使者講：「邊仔彼的个人thái毋緊緊共伊uī，thái欲放予彼兩个鬼共伊拍到按呢。」伊應講：「你恬恬，閣看。」到後--來彼人才知伊拍輸--伊，就大聲求講：「主--ah！救--我。」邊仔的人才攑伊的枴仔起--來，彼兩个鬼就走--去。伊看到遮就直直進前teh去，忽然拄著一人àⁿ落去看伊的面講，你單身出外--mah？伊攏無掠做甚物意思，閣停霎仔久，對後面有人來teh共伊揪衫，伊越--過去，看著兩个鬼，伊就直直佮伊相拍，閣揪鬼的手來共伊咬，鬼的肉phò-phò，咬著閣無流血，伊就呸hiat捔，臭chhiⁿ臭chhiⁿ， 閣共伊咬，閣呸hiat-ka̍k。

按呢佮in拍了看袂贏--in，就祈禱講：「主--ah！救--我。」主的使者就來，伊就共伊講，你也通按呢放我一个險險予in拖--去，伊就問伊講：「佇路中你有拄著一个人抑無？」應講：「有，彼人對你講甚物？」伊講：「你單身出外--mah？按呢你拍毋見主，你猶久毋知影通揣。今你著倒--去，時時刻刻擒牢佇主，著時時讀聖經祈禱結連佇主，毋通拍毋見主，人若單身出外真危險。」今這个姊妹共我講，伊若teh冷心失志的時，主的使者就會chhoā伊去看看--lè，通教示伊，這也是真通做咱的參考。(完) (Gô͘ Khêng-eng)。