雜錄：羊九十九
Cha̍p-lio̍k：Iûⁿ káu-cha̍p-káu
文獻資訊
| 項目 | 資料 |
|---|---|
| 作者 | 柯設偕 Koa Siat-kai |
| 卷期 | 台灣教會報 |
| 卷期 | 第801卷 |
| 日期 | 1955/9 |
| 頁數 | 26 |
白話字（原文數位化）
1955 nî 9 goe̍h p.26
Iûⁿ Káu-cha̍p-káu-Chhut-miâ ê Sèng-sī ê kò͘-sū
(Koa Siat-kai)
Iûⁿ káu-cha̍p-káu, chit siú Sèng-si (tē 117 siú) ê oē, sī chi̍t ê So͘-kek-lân ê sió-chiá, Miss. Elizabeth. C. Clephane-siá-ê. Sī kun-kù Lō͘-ka tē 15 chiuⁿ, tē 3 chat kàu tē 7 chat, lâi siá-ê.
- Moody Sian-siⁿ kap Sankey Sian-siⁿ, tuì Bí-kok khì Eng-kok pò͘-tō ê sî, in chē hé-chhia, tī chi̍t ê hé-chhia chām, tú beh khui-chhia ê sî, ū chih-tio̍h in ê iû-kiāⁿ.
Tī hé-chhia lāi, Moody tì-ì tha̍k ke-lāi kià-lâi ê phoe, Sankey tī pò-choá ê chi̍t-kak ū khoàⁿ-tio̍h Iûⁿ káu-cha̍p-káu chit siú si. Sankey tha̍k liáu chiū kā Moody kóng, chit siú si sī lán só͘ teh hi-bōng-ê, bo̍k-chiá ê si. Hit-sî Moody in-uī tha̍k choē-choē phoe, soà bô chù-ì Sankey, iā chit ê sū chiū án-ni kè-khì.
Koh bô kuí-ji̍t, Moody káng-tō ê toê-ba̍k sī “Hó ê bo̍k-chiá.”
Khah-siông, Moody káng-tō liáu-āu, Sankey chiū kéng khah kūn-oá tī toê-ba̍k ê Sèng-si, iā ji̍h-khîm lâi gîm.
Moody káng-tō, “Hó ê bo̍k-chiá” liáu, Sankey siūⁿ m̄-chai beh gîm to chi̍t-siú si. Hut-jiân ū siaⁿ kóng, “Gîm hit siú si.” Sankey kóng, “M̄-kú goá bô hit ê tiāu.” Hit ê siaⁿ koh kóng, “Gîm hit siú si.”
Sankey chē lo̍h-khì, i ê chéng-thâu-á kha̍p-tio̍h hong-khîm jí ê sî, tiāu chiū chi̍t-im chi̍t-im chiap-soà chhut-lâi, chiū-sī lán hiān-kim só͘ teh gîm tē 117 siú, tú-tú hit ê tiāu.
Moody tuì káng-tâi lo̍h-lâi, phēng tī hong-khîm, ba̍k-sái tī ba̍k-chiu, mn̄g kóng, “Lí tuì tá-lo̍h tit-tio̍h chit ê tiāu?”
Chit siú si chiâⁿ-choè chin chhut-miâ ê si. Chit siú si ê oē, chhiong-moá tio̍h Chú ê thiàⁿ-sim, ai-siong, chû-pi, iā hit ê tiāu, piáu-hiān tio̍h un-jiû, chhin-chhiat, ū kám-tōng joā-nih choē lâng.
(Tī lán ê Sèng-si, Sankey só͘ choè khek-ê, chit siú tē 117 siú, í-goā iáu ū tē 163 siú, tē 168 siú, tē 223 siú).
(oân)
漢羅（Ùi原文改寫）
羊九十九 出名ê聖詩ê故事
柯設偕
羊九十九， 這首聖詩(第 117首) ê話，是一個蘇格籣ê小姐， Miss. Elizabeth. C. Clephane-寫-ê。是根據路加第 15章， 第3節到第 7節，來寫-ê。
- Moody先生kap Sankey先生， tuì美國去英國佈道ê時， in坐火車， tī一個火車站， tú beh開車 ê時，有接著 in ê郵件。
Tī火車內， Moody致意讀家內寄來ê批， Sankey tī報紙ê一角有看著 羊九十九這首詩。 Sankey讀了就kā Moody講：這首詩是咱所teh希望-ê，牧者ê詩。 Hit時Moody因為讀濟濟批，soà無注意Sankey，也這個事就án-ni過去。
Koh無幾日， Moody講道ê題目是”好ê牧者。”
Khah常， Moody講道了後， Sankey就揀khah近倚tī 題目ê聖詩，也ji̍h琴來吟。
Moody講道， “好ê牧者”了， Sankey想m̄知beh吟to一首詩。忽然有聲講：”吟hit首詩。” Sankey講：”M̄-kú我無hit個調。” Hit個聲koh講：”吟hit首詩。”
Sankey坐落去，伊ê指頭仔kha̍p著風琴jí ê時，調就一音一音接續出來，就是咱現今所teh吟第 117首， tú-tú hit個調。
Moody tuì 講台落-來， phēng tī風琴，目屎tī目睭，問講：”你tuì tá落得著這個調？”
這首詩成做真出名ê詩。 這首詩ê話，充滿著主ê疼心，哀傷，慈悲，也hit個調，表現著溫柔，親切，有感動joā-nih 濟人。
(Tī咱ê聖詩， Sankey所作曲-ê， 這首第 117首，以外iáu有第 163首， 第 168首， 第 223首)。
（完）