白話字文獻館

PE̍H-ŌE-JĪ BÛN-HIÀN KOÁN

Lâm Tiong 2 kî Kàu-oân Lêng-siu-hoē

文獻資訊

項目 資料
作者 無lo̍h名
卷期 台灣教會報
卷期 第801卷
日期 1955/9
頁數 18

白話字（原文數位化）

LÂM TIONG

Lâm Tiong 2 kî Kàu-oân Lêng-siu-hoē

1955.09 tē 801 hō p.18-19

Kî-ji̍t: 8 goe̍h 1-5 ji̍t. Hoē-chí: Tióng-êng Lú-o̍h. Hù ê jîn-oân lâm-lú kiōng 126 miâ; siōng-chió hoè 15 hoè, siōng chē hoè 70 hoè.

Te̍k-pia̍t ū tuì Ka Tiong ê Kiâm-chuí kàu-hoē 9 uī kàu-oân iú-chì lâi chham-ka, chin hoan-gêng. Chiàu Kàu-io̍k-chhù só͘ kui-tēng, chit-pái kiò-chò tē 2 kî Kàu-oân Lêng-siu-hoē. Khò-thêng: Ki-tok-kàu kàu-gī, kàu-hoē sú, Sin kū-iok khài-lūn, si̍t-chè būn-tê, í-ki̍p im-ga̍k téng. Chiàu-khoàⁿ kho-bo̍k sui-sī chē koh tēng, iáu-kú kok-uī káng-su tit-tio̍h Sîn ê chān, gâu pī-pān, chu-liāu hong-hù, kóng liáu chin se̍k, chin liû-lī, jia̍t-chhiat, chin chhián-pe̍h koh ū la̍t, só͘-í thiaⁿ ê lâng sim jia̍t, bē ià-siān, hō͘ tāi-ke siū toā lī-ek, Chá-àm ê lé-pài; Chú-ji̍t-o̍h hāu-tiúⁿ lûn-liû tam-jīm. Khui-hoē: Pō͘-tiúⁿ Lâu Bo̍k-su ū la̍t ê bián-lē, kù-kù hō͘ tāi-ke kám-kek, ke-thiⁿ hoē ê cheng-sîn. Kàu kiat-sok ê sî, Tiong-hoē Gī-tiúⁿ iûⁿ Bo̍k-su léng-tō, i ín chē-chē si̍t-lē, khún-chhiat lâi hùn-khí, lia̍t-uī koh-khah kám-kak Chú-ji̍t-o̍h ê kang sī chin pó-kuì ê chit, í-āu kèng-ka tio̍h hùn-hoat ló͘-le̍k, chīn sù-bēng.

Thâu-boé 5 ji̍t kú, só͘ kám-kak--ê, chin sūn-lī, tāi-ke chhin-bi̍t hó chò-hoé. Chun-siú sî-kan, chin iú ì-gī, tio̍h toā-toā kám-siā Siōng-tè ê in-tián.

Tī pì-hoē ê chiân-se̍k, se̍k-iông-hoē ê tāi-seng, ū hō͘ tāi-ke hoat-piáu kám-sióng. Chiông-tiong ū chi̍t-siú ê si chiàu ē-bīn:-

  1. Kám-siā Chú un-tián kek-goē,

Thang khui Kàu-oân Lêng-siu-hoē,

Chhut-se̍k ū khah ke pah-jī,

Tāi-ke chhuì-á chhiò gī-gī.

  1. Tē-chí:Tióng-êng Lú-o̍h chia,

Lâm, lú hun-piat toà siok-sià,

Lâm--ê sió-khoá ài kiâⁿ lō͘,

óng-hoê sì-choā ná sàn-pō͘.

  1. Hoē-tiûⁿ lé-tn̂g sì-bīn hong,

Chō-se̍k kám-kak chin chheng-sóng,

Chiàu khoàⁿ chit kài sūn-sū toaⁿ,

Kong-khò pâi kàu moá-moá-moá.

  1. Chó-thian, se̍k-iông lé-pài sî,

Chú-ji̍t-o̍h hāu-tiúⁿ chú-chhî,

Ke-thiⁿ tāi-ke ū oa̍h-khì,

Thang thiaⁿ ta̍k tiám ê kà-sī.

  1. Pō͘-tiú bo̍k-su Lâu Hoâ-gī,

ín-chhoē kàu-oân o̍h sù-sī,

Bêng-tiong sian-siⁿ chò chóng-bū,

Ge̍k-chhàn sian-siⁿ pān chhui-sū.

  1. Koh-chài chi̍t hāng ê hun-tam,

An-sù sian-siⁿ tng sià-kam,

Lūn kàu phí-jîn put-khó kham,

Niû, Tân lióng Bo̍k ê pō͘-hūn.

  1. Káng-ián Sin Kū-iok khài-lūn,

Koan-hē Ki-tok-kàu kàu-gī,

Káng-su sī Âng Siu-kiong sian-siⁿ,

iáu ū Ki-tok kàu-hoē sú.

  1. Chú-chhî:Lí Ka-siong bo̍k-su,

Siū-huī tiúⁿ-ló só͘ koan-hē,

Léng-tō si̍t-chè chu būn-tê,

Só͘ thó-lūn chi̍t-tiâu chi̍t-tiâu.

  1. Lóng sī chhiat-si̍t chin tiōng-iàu,

Toā-siaⁿ sè-siaⁿ chin piàⁿ-miā,

Kò-kò ha̍k-oân chù-sim thiaⁿ,

Moâ-tāu kàu-hoē lāu chí-moē.

  1. M̄-bat khoàⁿ i tuh ka-choē,

Teh thiaⁿ ba̍k-chiu kim khok-khok.

Chi̍t khoàⁿ hián-chhut chin khoài-io̍k,

Sui sī chhit-cha̍p ū goân-khì.

  1. Choân-thé iā sī chin tì-ì,

Thiaⁿ liáu moá-ì sim iû-ia̍h,

Sīm-chì pn̄g-tǹg bô kò͘ chia̍h,

Kiâm-chuí kàu-oân ū jia̍t-sêng.

  1. Chham-ka lán chia toā hoan-gêng,

Su sī hiah hn̄g bô siūⁿ siān,

Kám-sim kiû-tō chì ū kian,

Chit kù goá chin hó-táⁿ kóng.

  1. Sêng-chek pí-kàu phò thian-hong,

Kiò chò jī kî ha̍k-khò tēng,

Só͘ thiaⁿ iā sī chin hun-bêng,

Siàu-liām káng-su gâu pī-pān.

  1. iā ū chhiú-chheh saⁿ pang-chān,

In chin tio̍h-boâ gâu chún-pī,

Tuì sim-té chhuì piáu kèng-ì,

Téng-soaⁿ kha chiáng-koán iô cheng.

  1. Pò chai sî-kan thang hiòng-chêng,

Kong-im ji̍t-chí chin-chiàⁿ kín,

Bêng-thian pì-hoē ti̍t-ti̍t kīn,

Lâi hù chin-chiàⁿ ū hok-khì.

  1. Thang hióng ò-biāu hó chu-bī,

Sèng-keng ha̍k-sek tit gián-kiù,

Kàu-oân chu-chit tit chō-chiū,

Bô lâi ê lâng chin khó-sioh.

  1. Chit hoê un-sù tit bô tio̍h,

Chhim bāng tńg-khì toā hoat-hui,

M̄-thang khǹg ba̍t che in-huī,

Poê-iúⁿ sè-kiáⁿ gâu chio-ho͘.

  1. Chú-ji̍t-o̍h tek-khak chìn-pō͘,

Tiogn-hoē gī-tiúⁿ pì-hoē sek,

Kek-lē kàu-oân tio̍h chīn-le̍k,

Kang-chok chiah thang ta̍t bo̍k-tek.

  1. Che hoē pō͘-tiúⁿ chò chú-lâng,

Siat-hoat it-chhè chin pîⁿ-pāng,

Siū-ú ha̍k-oân ê chèng-su,

Piáu-bêng siu-liáu ê ì-sù.

  1. Tng tī pì-hoē hi̍t chi̍t sî,

ǹg kok tan-uī kóng siā ì,

Koh ū teng-lêng tio̍h liû sim,

Tāi-ke tit-tio̍h ìn-siōng chhim!!!

漢羅（Ùi原文改寫）

南中

南中2期教員靈修會

1955.09 第801號 p.18-19

期日：8月1-5日。會址：長榮女學。赴的人員男女共126名；上少歲15歲，上濟歲70歲。

特別有對嘉中的鹹水教會9位教員有志來參加，真歡迎。照教育處所規定，這擺叫做第2期教員靈修會。課程：基督教教義，教會使，新舊約概論，實際問題，以及 音樂等。照看科目雖是濟閣硬，猶過各位講師得著神的贊，gâu備辦，資料豐富，講了真熟，真流利，熱切，真淺白閣有力，所以聽的人心熱，袂厭倦，予大家 受大利益，早暗的禮拜；主日學校長輪流擔任。開會：部長劉牧師有力的勉勵，句句予大家感激，加添會的精神。到結束的時，中會議長楊牧師領導，伊引濟濟實 例，懇切來奮起，列位閣較感覺主日學的工是真寶貴的職，以後更加著奮發努力，盡使命。

頭尾5日久，所感覺--的，真順利，大家親密好做伙。遵守時間，真有意義，著大大感謝上帝的恩典。

佇閉會的前夕，夕陽會的代先，有予大家發表感想。從中有一首的詩照下面：-

  1. 感謝主恩典格外，

通開教員靈修會，

出席有較加百二，

逐家喙仔笑gī-gī。

  1. 地址：長榮女學遮，

男，女分別蹛宿舍，

男--的小可愛行路，

往回四choā那散步。

  1. 會場禮堂四面風，

座席感覺真清爽，

照看這kài順序單，

功課排到滿滿滿。

  1. 昨天，夕陽禮拜時，

主日學校長主持，

加添逐家有活氣，

通聽逐點的教示。

  1. 部長牧師劉華義，

引chhoā教員學四是，

明忠先生做總務，

玉燦先生幫炊事。

  1. 閣再一項的分擔，

安賜先生當舍監，

論到鄙人不可kham，

梁，陳兩牧的部分。

  1. 講演新舊約概論，

關係基督教教義，

講師是翁修恭先生，

iáu有基督教會史。

  1. 主持：李嘉嵩牧師，

受惠長老所關係，

領導實際諸問題，

所討論一條一條。

  1. 攏是切實真重要，

大聲細聲真拚命，

個個學員注心聽，

麻豆教會老姊妹。

  1. 毋捌看伊tuh ka睡，

Teh聽目珠金khok-khok，

一看顯出真快樂，

雖是七十有元氣。

  1. 全體也是真致意，

聽了滿意心iû-ia̍h，

甚至飯頓無顧食，

鹽水教會有熱誠。

  1. 參加，咱遮大歡迎，

雖是hiah遠無想siān，

感心求道志有堅，

這句我真好膽講。

  1. 成績比較破天荒，

叫做二期學課定，

所聽也是真分明，

數念講師gâu備辦。

  1. 也有手冊相幫贊，

In真著磨gâu準備，

對心底喙表敬意，

頂山跤掌管搖鐘。

  1. 報知時間通向前，

光陰日子真正緊，

明天閉會直直近，

來赴真正有福氣。

  1. 通享奧妙好滋味，

聖經學識得研究，

教員資質得造就，

無來的人真可惜。

  1. 這回恩賜得無著，

深望轉去大發揮，

毋通囥密這恩惠，

培養細囝gâu招呼。

  1. 主日學的確進步，

中會議長閉會式，

激勵教員著盡力，

工作才通達目的。

  1. 這會部長做主人，

設法一切真平棒，

授與學員的證書，

表明修了的意思。

20.當佇閉會彼一時，

向各單位講謝意，

閣有叮嚀著留心，

逐家得著印象深！！！

可能mā有趣味：