信條是sím-mi̍h？
Sìn-tiâu sī sím-mi̍h?
文獻資訊
| 項目 | 資料 |
|---|---|
| 作者 | 吳天命 Gô͘ Thian-bēng |
| 卷期 | 台灣教會報 |
| 卷期 | 第800卷 |
| 日期 | 1955/8 |
| 頁數 | 9 |
白話字（原文數位化）
1955 nî 8 goe̍h p.9
Sìn-tiâu sī sím-mi̍h?
(Gô͘ Thian-bēng chok)
Tuì khoah ê ì-sù lâi kóng, Sìn-tiâu, á-sī Sìn-gióng kò-pe̍k kap Sìn-keng sī siāng-khoán. Chiū-sī ēng khak-tēng ê bûn-jī lâi piáu-bêng sìn-gióng ê si̍t-chit, piáu-hiān Ki-tok-kàu ê ki-pún sìn-gióng. Chóng-sī nā tuì khah oe̍h ê ì-sù lâi kóng, chiū chhin-chhiūⁿ thang hun-piat Sìn-keng kap Sìn-tiâu, á-sī sìn-gióng kò-pe̍k. Chiū-sī Eng-gú só͘ kiò-choè Creed kap Confession of faith ê hun-piat. Hiān-sî lán Chóng-hoē ū Sìn-tiâu pō͘-hoē, teh chún-pī lán Tâi-oân Tiúⁿ-ló Kàu-hoē ê Sìn-tiâu, uī-tio̍h án-ni, ū lâng soà kóng, lán to í-keng ū Sìn-tiâu (chí-khí Sù-tô͘ Sìn-keng), ná-nih tio̍h koh li̍p Sìn-tiâu, kiám sī beh koé-oāⁿ lán ê sìn-gióng mah? uī-tio̍h chit khoán in-toaⁿ, kiám-chhái lán thang chiàu oe̍h ê ì-sù, lâi hun-piat Sìn-keng kap Sìn-tiâu, ì-sù sī lán-só͘ beh li̍p ê, m̄-sī Sìn-keng, sī sìn-gióng kò-pek7 nā-tiāⁿ. Ū lâng iā ū hùn-choè ki-pún sìn-keng kap te̍k-sû sìn-keng. Chiong Sù-tô͘ Sìn-keng, Nî-se-a Sìn-keng, A-tha-loē-se-o͘ Sìn-keng, chheng choè ki-pún Sìn-keng, iā chiong kî-thaⁿ ê sî-tāi-sèng ê kò-pe̍k choè te̍k-sû Sìn-keng. Chit ê te̍k-sû Sìn-keng, chiū-sī lán só͘ beh kóng ê Sìn-tiâu.
Hi-lia̍p Chèng-thóng kàu-hoē, tû-khí Sù-tô͘ Sìn-keng í-goā, khah bô ēng pa̍t khoán ê bûn-jī lâi piáu-hiān in ê sìn-gióng. Lô-má Thian-chú kàu-hoē chiū ū í-goā choē-choē ê sìn-gióng kò-pe̍k. Chong-kàu kái-kek liáu-āu, Keng-chèng kàu-hoē chiū ū ēng choē-choē khoán ê hong-sek kap bûn-jī lâi piáu-bêng in ê sìn-gióng. In m̄-sī hó͘-jīn Sìn-keng, Nî-se-a Sìn-keng, A tha loē-se-o͘ Sìn-keng, chóng-sī ū lēng-goā chiong in ê sìn-giòng koh ēng bô siâng ê bûn-jī lâi piáu-bêng. In-uī Thian-chú-kàu ū chiap-la̍p chiah ê sìn-keng, Keng-chèng-kàu iā ū chiap-la̍p, só͘-í uī-tio̍h beh piáu-bêng chí-ū ēng Sèng-keng choè sìn-gióng ê kui-hoān, m̄-sī ū chham kàu-koân, á-sī thoân-thóng ê koan-hē chiū ū chéng-chéng ê Sìn-tiâu, á-sī sìn-gióng kò-pe̍k ê chhut-hiān. In-uī ài tuì sî-tāi lâi pián-hiān lán só͘ sìn ê, kan-ta ēng kó͘-tāi ê piáu-hiān sī bô kàu-gia̍h, in-uī kok sî-tāi ū bô sio-siâng ê koan-liām kap iōng-gú.
Keng-chèng kàu-hoē ê sìn-gióng kò-pe̍k khah chú-iàu ê chiū sī (1) Lō͘-tek-hoē ê Gô-su-pó Sìn-tiâu sī 1530 nî só͘ li̍p-ê. (2) Ka-ní-bûn phài-ê Sìn-tiâu sī 1530 nî só͘ li̍p-ê. (3) Sèng-kong-hoē ê 39 tiâu Sìn-tiâu sī 1571 nî só͘ li̍p-ê. (4) Se-bîn-su-tek Sìn-tiâu sī 1647 nî Eng-kok ê Hui-kok kàu-hoē phài só͘ li̍p-ê, chit ê chiâⁿ-choè choē-choē Tiúⁿ-ló-hoē hē-thóng ê kàu-hoē ê Sìn-tiâu.
án-ni Sìn-tiâu sī sím-mi̍h? Sìn-tiâu ê chè-tēng m̄-sī beh tāi-thoè Sèng-keng, iā m̄-sī beh tāi-thoè Sù-tô͘ Sin-keng, á-sī Nî-se-a Sìn-keng, nā-sī lán Tiúⁿ-ló-hoē iā oē thang kóng m̄-sī beh tāi-thoè Se-bîn-su-tek Sìn-tiâu; sī kan-ta kun-kù chiah-ê, ài ēng khah kán-bêng ê bûn-jī lâi tuì hiān-tāi piáu-bêng lán só͘ sìn ê nā-tiāⁿ. Chiong lán kun-kù Sèng-keng só͘ sìn ê hok-im, ēng hiān-tāi ê bûn-jī, koan-liām téng, lâi piáu-hiān ê sìn-gióng kò-pe̍k, chiū-sī lán ê Sìn-tiâu. Sī beh ēng Sìn-tiâu lâi kán-kiat piáu-bêng lán só͘ sìn ê, tek-khak m̄-sī beh lâi koé-oāⁿ lán só͘ sìn kun-kù Sèng-keng lāi ê hok-im sìn-gióng.
漢羅（Ùi原文改寫）
信條是sím-mi̍h？
Tuì闊ê意思來講：信條，抑是信仰告白kap信經是siāng款。就是用確定ê文字來表明信仰ê實質,表現基督教 ê基本信仰。總是若tuì khah oe̍h ê意思來講：就親像thang分別信經kap信條，抑是信仰告白.就是英語所叫做Creed kap Confession of faith ê分別。現時咱總會有信條部會, teh準備咱台灣長老教會ê信條，為著án-ni,有人soà講：咱to已經有信條(chí-khí使徒信經)，ná-nih tio̍h koh立信條，kiám是beh改換咱ê 信仰 mah?為著這款因端，kiám-chhái咱thang照oe̍h ê意思，來分別信經kap信條，意思是咱所beh立ê, m̄是信經,是信仰告白nā-tiāⁿ.有人也有混做基本信經kap特殊信經.將使徒信經, Nî-se-a信經, A-tha-loē-se-o͘信經,稱做基本信經,也將其他ê時代性ê告白做特殊信經. 這個特殊信經,就是咱所beh講ê信條。
希臘Chèng-thóng教會，除去使徒信經以外，khah無用別款ê文字來表現in ê信仰。羅馬天主教會就有以外濟濟ê信仰告白.宗教改革了後，更正教會就有用濟濟款ê方式kap文字來表明in ê信仰。In m̄是否認信經, Nî-se-a信經, A tha loē-se-o͘信經,總是有另外將in ê信仰koh用無siâng ê文字來表明。因為天主教有接納chiah ê信經, 更正教也有接納，所以為著beh表明只有用信經做信仰ê 規範, m̄是有chham 教權, 抑是傳統ê關係就有種種ê信條，抑是信仰告白ê出現。因為ài tuì時代來表現咱所信ê, kan-ta用古代 ê表現是無夠額，因為各時代有無相像ê觀念kap 用語.
更正教會ê信仰告白khah 主要 ê就是(1) 路德會ê 俄書部信條是1530年所立--ê. (2) Ka-ní-bûn派-ê信條是1530年所立--ê. (3)聖公會ê 39條信條是1571年所立--ê. (4) Se-bîn-su-tek信條是1647年英國ê Hui-kok教會派所立--ê, 這個成做濟濟長老會系統ê教會ê信條。
án-ni信條是甚麼？信條ê 制訂m̄是beh 代替信經，也m̄是beh 代替使徒信經, 抑是Nî-se-a信經,若是咱長老會也會thang講m̄是beh 代替Se-bîn-su-tek信條;是kan-ta根據chiah ê, ài用khah簡明ê文字來對現代表明咱所信ê nā-tiāⁿ.將咱根據聖經所信ê福音，用現代ê文字，觀念等,來表現ê信仰告白,就是咱ê信條。是beh用信條來堅決表明咱所信ê,的確m̄是beh來改換咱所信根據聖經內ê福音信仰。