新宗教

Sin chong-kàu

文獻資訊

項目	資料
作者	Lâu Kî-suí Lâu Kî-suí
卷期	台灣教會報
卷期	第799卷
日期	1955/7
頁數	27

白話字（原文數位化）

Sin chong-kàu
1955.07 tē 799 hō p.27-28
(Lâu Kî-suí)
Tī oa̍t-lâm lâm-pō͘ ê kau-chí(交趾) ê só͘-chāi, ū chi̍t ê sin-heng ê chong-kàu, kiò-chò Ko-tâi-kàu (高台教) ū 150 bān ê sìn-tô͘.
Ko-tâi-kàu ê siat-li̍p sī A. D. 1926 nî. Tuì chi̍t lâng, miâ Ńg Bûn-kiû (阮文裘) só͘ chhòng-siat--ê, Ńg Bûn-kiû tī 1919 nî, chū-chheng Ko-tâi-jîn, siông-siông siū sîn ê kám-tiàu, 1925 nî tī Se-kòng (西貢), tī chi̍t pái kong-bū jîn-oân chi̍p-hoē tiong, chiūⁿ-tâng lâi kóng, I sī Tiong-kok ê si-jîn Lí Thài-pe̍k (李太白) lâi hián-sèng, kóng, “Ko-tâi sī ú-tiū ê Chú.” Lí Thài-pe̍k khó͘-khǹg chham-ka ê lâng, tio̍h siông-siông kap Ńg Bûn-kiû chiap-chhiok, tuì i lâi chí-sī kàu-gī, lâi cho͘-chit ê sin ê chong-kàu, kiò-chò Hoān-kong-tek (范公德).
Ko-tâi-kàu tī Se-kòng sêng-li̍p í-āu, thoân-pò͘ hui-siông kín, 20 goā nî kú, in ê sìn-tô͘ í-keng ū 150 bān lâng. In jīn “Sù-hái kai hiaⁿ-tī.” Chú-tiuⁿ lâng sí-āu lûn-hoê choán-sè, chong-siōng ài bu̍t, kìm-chí sat-seng, thê-chhiòng chū-chè chō͘-jîn. In ê kàu-tiâu kap kài-lu̍t, m̄-sī tuì kó͘-tāi ê tù-chok the̍h-lâi--ê, sī tuì Tiong-sè-kí Hoat-kok kap oa̍t-lâm ê bêng-tù chhau chhut--lâi-ê, nā ū sìn-tô͘ hoat-chhut gî-būn, thang tuì só͘ chí-tēng 12 chéng ê goân-su khì chhoē kái-tap.
Ko-tâi hiān-sî ê kàu-chú, kong-khai khip-siu Hu̍t-kàu, Tō-kàu, Jû-kàu kap Ki-tok-kàu ê kàu-gī, tông-sî iā sìn-hōng chiah ê chong-kàu ê kàu-chú. In uī kui-tēng it-tēng ê sî-kan kî-tó. Ko-tâi ê léng-siù kóng, “Goán ê sim-lêng ū siū-tio̍h kiâⁿ sé-lé Iok-hān, Sng Tiong-san Sian-seⁿ, Khêng-a-hu-khek (施洗約翰、孫中山先生、瓊阿夫克) ê sé-lé. Chit ê chong-kàu ū chèng-tī-tek ê sek-chhái tī-teh. (Lâu Kî-suí).

漢羅（Ùi原文改寫）

新宗教
1955.07 第799號 p.27-28
(Lâu Kî-suí)</P></P><p>佇越南南部的交趾的所在，有一个新興的宗教，叫做高台教，有150萬的信徒。
高台教的設立是A. D. 1926年。對一人，名阮文裘所創設--的， 阮文裘佇1919年，自稱高台人，常常受神的感召，1925年佇西貢，佇一擺公務人員集會中，上童來講，伊是中國的詩人李太白來顯聖，講：「高台是宇宙的主。」李太白苦勸參加的人，著常常佮阮文裘接觸，對伊來指示教義，來組織的新的宗教，叫做范公德。
高台教佇西貢設立以後，傳播非常緊，20外年久，in的信徒已經有150萬人。In認「四海皆兄弟。」主張人死後輪迴轉世，崇尚愛物，禁止殺生，提倡自濟助人。In的教條佮誡律，毋是對古代的著作提來--的，是對中世紀法國佮越南的名著抄--出來的，若有信徒發出疑問，通對所指定12種的原書去揣解答。
高台現時的教主，公開吸收佛教、道教、儒教、佮基督教的教義，同時也信奉遮的宗教的教主。因為規定一定的時間祈禱。高台的領袖講：「阮的心靈有受著行洗禮約翰、孫中山先生、瓊阿夫克的洗禮。」這个宗教有政治的的色彩佇--teh。 (Lâu Kî-suí)。</p><P><P>