傳教ê動機
Thoân-kàu ê tōng-ki
文獻資訊
| 項目 | 資料 |
|---|---|
| 作者 | 柯設偕 Koa Siat-kai |
| 卷期 | 台灣教會報 |
| 卷期 | 第799卷 |
| 日期 | 1955/7 |
| 頁數 | 27 |
白話字（原文數位化）
1955 nî 7 goe̍h p.27
Thoân-kàu ê tōng-ki
(Koa Siat-kai)
Chú Iâ-so͘ chiūⁿ-thiⁿ ê sî, ū hoan-hù bēng-lēng sù-tô͘ tio̍h thoân hok-im.
Thoân-kàu ê sù-bēng sī chin tāng, hoān-uî sī chin khoah, khùn-lân ū chin choē, ló͘-le̍k tio̍h chin toā.
Thoân-kàu ê goân-tōng-la̍t sī Siōng-tè ê thiàⁿ, Chú Iâ-so͘ ê bēng-lēng kap Sèng Sîn ê ín-chhoā.
Siōng-tè beh chín-kiù sit-lo̍h ê sè-kài ê chi̍t ê toā ê sù-bēng, tī Sèng-keng ū 5 têng ê kì-chài.
Má-thài siá tī 28 chiuⁿ 18 chat, “……Thiⁿ-téng toē-ē ê koân í-keng lóng-chóng hō͘ goá,……” Kiông-tiau, Ki-tok ê koân-ui.
Má-khó siá tī 16 chiuⁿ 15, 16 chat, “……Lín khì phó͘ thiⁿ-ē thoân hok-im hō͘ bānpeh-sìⁿ.” “Sìn lâi siū sé-lé ê, beh tit-tio̍h kiù……” Kì-chài, hoān-uî kap kiat-kó ê phó͘-piàn-sèng.
Lō͘-ka siá tī 24 chiuⁿ 47 chat, “……iā hoán-hoé kap sià-choē ê tō-lí beh tī I ê miâ thoân kàu bān-pang, sī tuì Iâ-lō͘-sat-léng khí.”
iā siá tī Sù-tô͘ Hēng-toān 1 chiuⁿ 8 chat, “……koh tī Iâ-lō͘-sat-léng, piàn Iû-thài, kap Sat-má-lī-a, ti̍t-kàu toē-ke̍k……” Piáu-sī, chìn-hêng ê sūn-sū.
Iok-hān siá tī 20 chiuⁿ 21 chat, “……Goá chhe lín, chhin-chhiūⁿ Pē ū chhe goá.” Kì-su̍t, lêng-tek tiâu-kiāⁿ kap iau-kiû.
Chú Iâ-so͘ só͘ hoan-hù (bēng-lēng) ê, lán sìn-tô͘ ta̍k ê lóng ū choè chit ê iàu-kín ê kang-thoân-kàu (pò͘-tō) ê chek-jīm.
Chú Iâ-so͘ hō͘ in (sù-tô͘) khoàⁿ I ê chhiú ê sî, piáu-sī Siōng-tè ke̍k toā ê thiàⁿ-sim. Lí bat khoàⁿ-kìⁿ I ê chhiú á bô?
Chêng bat ēng Pe̍h-oē-jī jī-bú 24 jī choè ta̍k jī ê thâu jī, pâi-lia̍t sūn-sī siá choè 4 kù, thoân-pò hok-im ê koa. Chit-tia̍p keng-kè tām-po̍h siu-kái, koh siá hō͘ tha̍k-chiá chham-khó.
ài beh chin Tsú chhe ēng goán, Hōng I Jī Keng khek khùn lâu; M̄nā n̂g âng chang oē hūn, O͘ pe̍h phó͘ sè tit thiⁿ un.
(Chin Chú, ì-sù sī Siōng-tè. Jī keng, ì-sù sī Sin Kū-iok Sèng-keng. N̂g, âng, chang, o͘, pe̍h, ì-sù sī ta̍k khoán bah sek ê lâng. Thiⁿ un, ì-sù sī Siōng-tè ê toā un). (Oân).
漢羅（Ùi原文改寫）
傳教ê動機
主耶穌上天ê時，有吩咐命令使徒tio̍h傳福音。
傳教ê使命是真重，範圍是真闊，困難有真濟，努力tio̍h真大。
傳教ê 原動力是上帝ê疼，主耶穌ê命令kap聖神ê引chhoā。
上帝beh拯救失落ê世界ê一個大ê使命，tī聖經有5層 ê記載。
馬太寫tī 28章18節，「……天頂地下ê koân 已經攏總hō͘我，……」強調，基督ê 權威。
馬可寫tī 16 章15， 16節，「……恁去普天下傳福音hō͘ 萬百姓。」「信來受洗禮ê， beh得著救……」記載，範圍kap結果ê 普遍性。
路加寫tī 24 章 47 節，「……也反悔kap赦罪ê 道理beh tī伊ê名傳教萬邦，是tuì耶路撒冷起。」
也寫tī使徒行傳 1 章 8節，「……koh tī耶路撒冷，變猶太，kap撒馬利亞，直地極……」表示，進行ê順序。
約翰寫tī 20 章21 節，「……我差恁，親像父有差我。」Kì-su̍t， lêng-tek條件kap要求。
主耶穌所吩咐(命令) ê，咱信徒逐ê 攏有做這個要緊ê 工--傳教(佈道) ê責任。
主耶穌hō͘ in (使徒)看伊ê手ê時，表示上帝極大ê疼心。你bat看見伊ê手抑無？
前bat用白話字字母24字做逐字ê 頭字，排列順序寫做4句，傳報福音ê歌。 這霎經過淡薄修改，koh寫hō͘讀者參考。
ài beh真主差用阮，
奉伊二經khek khùn lâu;
M̄ nā 黃紅棕會混，
烏白普世得天恩。
(真主，意思是上帝。二經意思是新舊約聖經。黃， 紅， 棕， 烏，白，意思是逐款肉色ê人。天恩，意思是上帝ê大恩)。(完)。