兒童宗教教育ê重要性
Jî-tôngChong-kàukàu-io̍k
文獻資訊
| 項目 | 資料 |
|---|---|
| 作者 | 高安賜 Ko An-sù |
| 卷期 | 台灣教會報 |
| 卷期 | 第796卷 |
| 日期 | 1955/4 |
| 頁數 | 26 |
白話字（原文數位化）
1955 nî 4 goe̍h p.26
Jî-tông chong-kàu kàu-io̍k ê tiōng-iàu sèng
(Ko An-sù chok)
Lāu-bú ê chek-jīm.
- Lāu-bú ê sim kap kiáⁿ ê sim iàu saⁿ-pâi lâi cháu.
Bí-kok Tāi-thóng-léng Lîm Khéng chheng-chàn i ê lāu-bú (繼母) chò sī “Thiⁿ-sài, sèng-tô͘ ê lāu-bú.” Lāu-bú chiap-tio̍h Lîm Khéng sí, pò ê sî, pi-siong lâu ba̍k-sái kóng, “Lîm Khéng ê sim sī goá ê sim, goán nn̄g lâng ê sim saⁿ-pâi teh cháu.” án-ni thang chai, Lîm Khéng hiah-ni̍h toā o-ló i ê lāu-bú ê goân-in, sī in-uī lāu-bú ê sim sî-siông kap Lîm Khéng saⁿ-pâi teh cháu, teh kek-lē, teh chō-chiū i. Hó koh gâu ê lāu-bú, chi̍t hong-bīn giâm-giâm chek-tok kà-sī kiáⁿ-jî, chi̍t hong-bīn gâu tông-chêng, thé-thiap, lí-kái kiáⁿ-jî ê sim. Lāu-bú choa̍t-tuì m̄-thang pàng hō͘ kiáⁿ-jî koè-thâu chū-iû hòng-chhiòng, ka-kī pháu-cháu; iàu-kín tio̍h bat kiáⁿ-sim, iā tio̍h hō͘ kiáⁿ bat lāu-bú ê sim, nn̄g lâng ê sim tio̍h saⁿ-pâi, ǹg só͘ chhah ê pio lâi pháu-cháu, kàu tit-tio̍h Siōng-tè tī Ki-tok Iâ-so͘ tuì téng-bīn tiàu lán ê siúⁿ. Pó-lô kóng, “Kiáⁿ-jî eng-kai hàu-sūn kèng-uì pē-bú; nā-sī pē-bú tek-thak m̄-thang kek kiáⁿ-jî ê siū-khì, to̍k-to̍k tio̍h ēng Chú ê kéng-kài kap kàu-hùn lâi poê-iúⁿ in” (Í-hut-só͘ 6:1-4).
Lāu-bú à! lán chai tuì kū-nî Lâm-pō͘ Tāi-hoē í-lâi, P. K. U. ê cheng-siaⁿ hiáng-liāng tī Lâm Tāi Kàu-hoē lāi. Tāi-hoē kó͘-lē kok kàu-hoē, kàu-hoē kó͘-lē chèng sìn-tô͘ chham-ka chit ê kang-chok. Chò lāu-bú ê lâng iā siūⁿ ài chīn sìn-tô͘ ê gī-bū, m̄-kú ū-ê tio̍h āiⁿ kiáⁿ, sé saⁿ, ū-ê tio̍h sàu-tè, chú-pn̄g, tuì thiⁿ-kng boâ kàu ê-hng, chin-chiàⁿ lân-tit chhut-mn̂g. Lāu-bú sui-jiân bē thang khì kàu chin hn̄g lâi thoân Chú ê hok-im, m̄-kú tī lán ê sin-piⁿ ū Chú kau-tài ê kiáⁿ-jî, lán tio̍h tāi-seng iàu-kín choân-ke ê kui Chú kap kiáⁿ-jî ê tit-kiù. án-ni jî-tông chong-kàu kàu-io̍k kap P. K. U. ê kang-chok khoà tī lāu-bú ê keng-thâu téng. Lāu-bú tio̍h chò Ki-tok ióng-chòng ê peng-teng, lâi chīn Siōng-tè só͘ kau-tài lú-sèng ê sú-bēng.
漢羅（Ùi原文改寫）
兒童宗教教育ê重要性
高安賜 作
老母ê責任。
4.老母ê心kap 囝ê心iàu相排來走。
美國大統領林肯稱讚伊ê老母(繼母) 作是「天使，聖徒ê老母。」老母接著林肯死，報ê時，悲傷流目屎講：”林肯ê心是我ê心，阮兩人ê心相排teh走。」án-ni thang知，林肯hiah-ni̍h 大o-ló伊ê老母ê原因，是因為老母ê心時常kap 林肯相排teh走，teh激勵，teh造就伊。好koh gâu ê老母，一方面嚴嚴責督教示囝兒，一方面gâu同情，體貼，理解囝兒ê心。老母絕對m̄-thang放hō͘ 囝兒過頭自由放縱，家己跑走;要緊tio̍h bat 囝心，也tio̍h hō͘ 囝 bat老母ê心，兩人ê心tio̍h相排，向所插ê 標來跑走，到得著上帝tī基督耶穌tuì頂面召咱ê賞。保羅講：”囝兒應該孝順敬畏父母;若是父母tek-thak m̄-thang激囝兒ê受氣，獨獨tio̍h用主ê警戒kap教訓來培養in” (以弗所6:1-4)。
老母啊!咱知tuì舊年南部大會以來，P. K. U. ê鐘聲響亮tī 南大教會內。大會鼓勵各教會，教會鼓勵眾信徒參加這個工作。作老母ê人也想ài盡信徒ê義務， m̄-kú有ê tio̍h āiⁿ 囝， 洗衫，有ê tio̍h 掃地， 煮飯， tuì天光磨到 ê昏，真正難得出門。老母雖然bē thang去到真遠來傳主ê福音，m̄-kú tī咱ê身邊有主交代ê 囝兒，咱tio̍h事先要緊全家ê 歸主kap 囝兒ê得救。án-ni 兒童宗教教育kap P. K. U. ê工作掛tī老母ê肩頭頂。老母tio̍h作基督勇壯ê兵丁，來盡上帝所交代女性ê 使命。