Sin-tiàm kàu-hoē phèng bo̍kPermalink

文獻資訊Permalink

白話字（原文數位化）Permalink

Sin-tiàm kàu-hoē phèng bo̍k.

1. 12, no. 792, pp. 11

Pak-pō͘ ê goân-ló kàu-hoē Sin-tiàm, tuì Koeh Chuí-lêng Bo̍k-su lī-jīm liáu, bô ū tú-hó ê lâng thang liāu-lí kàu-hoē ê sū, put-chí bô sím-mi̍h hó-sè. Só͘-í chit-pang tit-tio̍h Siōng-chú ê ín-chhoā, ū phèng-chhiáⁿ chi̍t uī siàu-liân sian-siⁿ Tīⁿ Liân-tek Kàu-su choè in ê Bo̍k-su, tuì taⁿ í-āu, lâng beh kiò i siàu-liân Tīⁿ Bo̍k-su, in-uī Tīⁿ Bo̍k-su chin choē ê, oh hun-piat, i siōng siàu-liân ê iân-kò͘ mah!

Cha̍p goe̍h 25 ji̍t siōng-ngó͘ 11 tiám, Tâi-pak Tiong-hoē khui Te̍k-hoē, Gī-tiúⁿ Tiuⁿ Khun-oán Bo̍k-su ê léng-tō-hā, kú-hêng bo̍k-su hong-li̍p tián-lé. Thiⁿ-khì bô sím-mi̍h hó, chóng-sī lâng chiū-sī lâng, khó chu̍t-chu̍t. Chit keng kàu-hoē sī put-chí hó ê kàu-hoē, koè-khì ê thoân-kàu-chiá thang kóng ia̍h sī tī kàu-kài siong-tong ê jîn-bu̍t bat toà koè ê kàu-hoē, chhin-chhiūⁿ kò͘ Koeh Hi-sìn Bo̍k-su, Siau An-ki Bo̍k-su (tong-ji̍t ia̍h chhut-se̍k kóng chiok-sû, kóng, “Sin-tiàm kàu-hoē sī chio̍h-poâⁿ, kàu-hoē éng-oán boē iô-choah.” Chin kám-khài bû-liōng bián-lē chèng-lâng). Koeh Chuí-lêng Bo̍k-su (tong-ji̍t ia̍h chhut-se̍k). Só͘-í sin-jīm ê Bo̍k-su ū khoàⁿ-tio̍h chiah ê toā sian-poè, ia̍h sī kàu-hoē ê goân-ló tī i ê thâu-chêng, tek-khak ū chi̍t hāng bô sio-siâng ê tiám chiah tio̍h, tong-ji̍t i ê tiūⁿ-lâng Tân Su-chhong Bo̍k-su ia̍h ū lia̍t-se̍k. Chit keng pài-tn̂g ū kái-tiok liáu iáu-bē oân-choân hó-sè, chóng-sī pí í-chêng sī chin hó-sè; pài-tn̂g-thiaⁿ, bo̍k-su-koán lóng oán-jiân chhin-chhiūⁿ sin--ê. In iáu ū koh chi̍t pái ê toā khèng-chiok-hoē, chiū-sī siat-kàu 80 chiu-nî ê kì-liām. Thiaⁿ in kóng kái-tiok pài-tn̂g oân-kang lo̍k-sêng, sūn-soà beh chiok-hō, só͘-í lán iáu ū thang tit-tio̍h in chi̍t pái ê toā chiok-hō-hoē. Chhiáⁿ tāi-ke kî-thāi.

漢羅（Ùi原文改寫）Permalink

新店教會聘牧。

1954.12，no.792，pp.11

北部的元老教會新店，對郭水龍牧師離任了，無有tú好的人通料理教會的事，不止無啥物好勢。所以這pang得著上主的引chhoā，有聘請一位少年先生鄭連德教師做in 的牧師，對今以後，人欲叫伊少年鄭牧師，因為鄭牧師真濟个，oh分別，伊上少年的緣故mah！

十月25日上午11點，台北中會開特會，議長張昆遠牧師的領導下，舉行牧師封立典禮。天氣無啥物好，總是人就是人，khó chu̍t-chu̍t。這間教會是不止好的教會，過去的傳教者通講也是佇教界相當的人物捌蹛過的教會，親像故郭希信牧師，蕭安居牧師(當日也出席講祝詞，講，「新店教會是石磐，教會永遠袂搖choah。」真感慨無量勉勵眾人)。郭水龍牧師(當日也出席)。所以新任的牧師有看著chiah-ê大先輩，也是教會的元老佇伊的頭前，的確有一項無相siâng 的點才著，當日伊的丈人陳思聰牧師也有列席。這間拜堂有改築了猶未完全好勢，總是比以前是真好勢；拜堂廳，牧師館攏宛然親像新--的。In猶有閣一擺的大慶祝會，就是設教80週年的記念。聽in講改拜堂完工築落成，順紲欲祝賀，所以咱猶有通得著in一擺的大祝賀會。請大家期待。