北中秋季中會
Pak Tiong chhiu-kuì Tiong-hoē
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第792號 |
| 日期 | 1954/12 |
| 頁數 | 10 |
白話字（原文數位化）
Pak Tiong chhiu-kuì Tiong-hoē.
- 12, no. 792, pp. 10
Tâi-pak Tiong-hoē tē 3 kài chhiu-kuì Tiong-hoē, tī 10 goe̍h 18 ji̍t siōng-ngó͘ 10 tiám, ū khui tī Sin-chng kàu-hoē lé-pài-tn̂g. Gī-tiúⁿ ēng “Ki-tok-tô͘ ê chit-hūn” choè tê léng-tō chèng gī-oân khui-hoē. Tī chit-pang ê khui-hoē kám-kak hui-siông hoaⁿ-hí ê chi̍t hāng, chiū-sī tuì khai-sí kàu kiat-sok lóng bô ū lâng chá-thè, tuì thâu kàu bé lóng sī chiah ê 20 goā lâng teh saⁿ-kap siūⁿ, chēng kàu-taⁿ m̄-bat ū án-ni ê kéng-hóng, ǹg-bāng í-āu ia̍h oē siông-siông saⁿ kek-lē, chiàu án-ni ê chhù-sū chìn-hêng pān tāi-chì.
Tī pún Tiong-hoē lāi ū nn̄g keng ê kàu-hoē lóng iáu m̄-bat chhut-se̍k saⁿ-kap kè-e̍k, saⁿ-kap siūⁿ, sī pún Tiong-hoē lāi ê chi̍t ê khó͘-sim kap put-chí teh siàu-liām, ia̍h te̍k-pia̍t uī-tio̍h uī-tio̍h chit nn̄g keng kàu-hoē, goán ū te̍k-pia̍t phài lâng khoàn-bián ài in saⁿ-kap choè kang, siāng-sî ia̍h uī-tio̍h in khui kî-tó-hoē, thang tuì Siōng-tè ê chí-sī kap ín-chhoā. ia̍h Sèng-keng ha̍k-iⁿ& ê hiàn-kim ū chin-choē bô kau; ta̍k lâng put-chí kám-kak-tio̍h sú-bēng, só͘-í ke̍k-le̍k beh koan-hiàn lâi chīn só͘ tio̍h chīn ê gī-bū. Chit-pang lán Tâi-oân kàu-hoē ia̍h ū tit-tio̍h chin hó ê ki-hoē, thang tit-tio̍h choē-choē hong-bīn ê chhì-kek kap oān-chō͘, í-ki̍p poê-iúⁿ. Só͘-í ū tit-tio̍h chit ê “Ecumenical Scholarship” thang tuì Tâi-oân ê kàu-hoē tiong tit-tio̍h chi̍t lâng thang khì Bí-kok tha̍k-chheh. Tī choân Tâi ê kok Tiong-hoē tiong thang chhui-chiàn lâng; só͘-í pún Tiong-hoē boán-tiûⁿ it-tì, ū chhui-chiàn chi̍t lâng kàu tī tiû-pī pō͘-hoē. ǹg-bāng tī chiong-lâi oē thang ū chit khoán ê hó ki-hoē thang koh-khah thê-ko Tâi-oân kàu-hoē ê khuì-la̍t.
漢羅（Ùi原文改寫）
北中秋季中會。
1954.12，no.792，pp.10
台北中會第 3 屆秋季中會，佇10月18日上午 10點，有開佇新莊教會禮拜堂。議長用「基督徒的職份」做題領導眾議員開會。佇這pang 的開會感覺非常歡喜的一項，就是對開始到結束攏無有人早退，對頭到尾攏是遮的20外人teh saⁿ-kap想，chēng到今毋捌有按呢的景況，向望以後也會常常saⁿ激勵，照按呢的次序進行辦代誌。
佇本中會內有兩間的教會攏猶毋捌出席saⁿ-kap計畫，saⁿ-kap想，是本中會內的一个苦心佮不止teh數念，也特別為著為著這兩間教會，阮有特別派人勸勉愛in saⁿ-kap做工，siāng時也為著in開祈禱會，通對上帝的指示佮引chhoā。也聖經學院的獻金有真濟無交；逐人不止感覺-著使命，所以極力欲捐獻來盡所著盡的義務。這pang咱台灣教會也有得著真好的機會，通得著濟濟方面的刺激佮援助，以及培養。所以有得著這个「Ecumenical Scholarship」通對台灣的教會中得著一人通去美國讀冊。佇全台的各中會中通推薦人；所以本中會滿場一致，有推薦一人到佇籌備部會。向望佇將來會通有這款的好機會通閣較提高台灣教會的氣力。