倫敦大佈道會
Lûn-tun toā pò͘-tō-hoē
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第792號 |
| 日期 | 1954/12 |
| 頁數 | 27-28 |
白話字（原文數位化）
Lûn-tun toā pò͘-tō-hoē
(Dr. C. T. Cook pò-Tân Huī-chhiong e̍k).
- 12, no. 792, pp. 27-28
Che sī Khu̍k-khu̍k Phok-sū só͘ siá koan-hē Bí-lí Gu-lem (Billy Graham) Phok-sū Lûn-tun toā pò͘-tō-hoē ê cheng-chhái kiat-sok-kì.
Gō͘ goe̍h 22 ji̍t, Gu-lem Phok-sū tī Wembley ê Lûn-tun Hông-ka ūn-tōng-tiûⁿ, hiòng 120,000 lâng ê toā thiaⁿ-chiòng lâi káng-tō. Che sī ū kàu-hoē-sú í-lâi thiaⁿ-chiòng choè chē. Phok-sū í-keng saⁿ tiám chêng tī Shepherd’s Bush ê White City ūn-tōng-tiûⁿ hiòng 67,000 ê thiaⁿ-chiòng káng-tō. Ū 4000 lâng tī chit ê hoē koat-sim kiû-tō, kap tuì khai-sí khí, ū 35,000 í-siōng kap bô kè-sǹg ê kuí-nā chheng ê lâng sìn Ki-tok. Kàu ta̍k siâⁿ, ta̍k hiong kè-sio̍k choè kang. Wembley ê chū-hoē sī hō͘ lâng bô boē-kì-tit ê choa̍t-téng (絕頂), sī táⁿ-phò kiù lêng kang-chok ê kì-lio̍k.
Gu-lem Phok-sū khoàⁿ-tio̍h chhin-chhiūⁿ chuí ek--lâi ê thiaⁿ-chiòng ê sî, siū toā kám-tōng.
Khan-ta-be-lí (カンタベリー) toā kam-tok, Chū-iû kàu-hoē liân-ha̍p hoē-gī gī-tiúⁿ, kap pa̍t phài ê chí-tō-chiá lóng khiā tī tâi téng, kam-tok kap gī-tiúⁿ léng-tō uí-oân-hoē kî-tó. Lûn-tun chhī-tiúⁿ kap hu-jîn, siā-hoē-siōng ê jîn-sū saⁿ-kap lâi piáu-hiān tuì hok-im ê jia̍t-sêng. Ū choē-choē chē hoé-chhia, bé-chhia tuì hiong-chhoan lâi ê thoân-thé.
Tī léng-hong, léng-hō͘ iā bô lún-neh, ū-ê khiā, ū-ê chē. Cliff Barrow chí-hui ê 4,000 toā sèng-koa-tuī kui tiám-cheng kú teh chhiùⁿ hok-im koa.
M̄-bián kóng, Gu-lem Phok-sū í-keng pá-ak tio̍h sin-bûn kap kong-chiòng. Bat ū sin-bûn bô jī-gán thang siá, kóng, Chit ê pò͘-tō-hoē sī jîn-uî-tek sêng-kong. Chóng-sī khan-chhut liáu chiū chai in ê soat-bêng sī bô ha̍h ê.
Chit ê sū tuì “Sî-pò” ‘TIME’ lâi chèng-si̍t, ána-ni siá, “Tī Gu-lem Phok-sū ê choè-āu ê àm, chhin-chhiūⁿ khí-thâu ê khoán-sit, lâng ê sim teh tui-chhoē bêng-bêng ū chi̍t ê sū-si̍t, tī ta̍k ê chū-hoē ū kong-hāu lâi kám-tōng lâng ê sim-té, thang koat-sim choè Ki-tok-tô͘.
Chí-ū chi̍t ê tap-hok, chiū-sī Sèng Sîn ê toā kang-chok kap choân sè-kài sìn-tô͘ bô thêng ê kî-tó. Chiū-sī Phok-sū kiông-tiau tuì i jia̍t-sim ê pang-chān ê, á-sī léng-sim ê , giâu-gî ê lâng só͘ kóng ê.
Pài-la̍k Phok-sū hoat-piáu i ê khak-sìn kóng, Eng-kok ū tī ho̍k-heng tiong. M̄-nā kan-ta tit-tio̍h choē-choē kiû-tō-chiá miâ-toaⁿ, thiaⁿ-chiòng ná ke-thiⁿ, hōng-hiàn iā ke-thiⁿ. Ū chi̍t ê kàu-hoē pò-kò kóng hiàn-kim ke saⁿ poē, thoân-kàu-chiá kiàn-chèng kóng tuì Phok-sū o̍h chin choē, hiān-chāi tī in soat-kàu āu, teh koan-sim hoán-hoé ê lâng, ài thang tit-tio̍h in.
Ū chi̍t hāng koh-khah thang chù-ba̍k ê sū, chiū-sī tuì Harringay tiong-kè lé-pài (中繼禮拜) ê sū. Chit ê sū sī hū-chek Harringay Arena hòng-sàng-kio̍k ê ki-su tuì tī thong mî kî-tó lâi choè ê.
Tiān-sìn-kio̍k iā toā-toā pang-chān lán, uī-tio̍h beh hō͘ pò͘-tō-hoē ēng, tâi tē-hā tiān-soàⁿ tī chiàn-cheng tiong só͘ ká-siat ê só͘-chāi. Kiat-kó, tī choè-āu 6 lé-pài kú ê pò͘-tō só͘ ū ê chū-hoē, lóng tuì Harringay tiong-kè kàu tī 400 ê kàu-hoē, hoē-tn̂g, tī choân Eng-kok, ài-ní-lân kok só͘-chāi, siông-siông taō keng ê kiàn-bu̍t sī hō͘ kûn-chiòng chiàm-léng khì thiaⁿ, khoàⁿ boē-tio̍h ê chhiùⁿ-koa kap káng-tō ê siaⁿ.
Tuì tī Luke kong kap hu-jîn kap Texas ê bô miâ ê pêng-iú ê hó-ì, Gu-lem Phok-sū oē-thang tit-tio̍h ki-hoē tī Lûn-tun tē-it phiau-phiat ê Dorehester lí-siā ê sàng-pia̍t-iàn ê sî, tuì siā-hoē chin choē khoán lâng káng-tō, chiah ê lâng sī kuì-cho̍k, kuì -cho̍k hu-jîn, chèng-hú ê iàu-jîn, hā-īⁿ gī-oân, kun-pō͘ kap kî-thaⁿ tāi-piáu-tek ê jîn-bu̍t.
Kè chá-khí, tī Khu-kiat-ní Siú-siòng ê chiau-thāi hoē tiong, Phok-sū kap Siú-siòng tâm-lūn 40 hun-cheng kú.
Ta̍k lâng lóng tông-ì chit ê pò͘-tō-hoē ū tit-tio̍h téng-bīn ê toā chiok-hok.
漢羅（Ùi原文改寫）
倫敦大佈道會
(Dr.C.T.Cook報-陳惠昌譯)。
1954.12，no.792，pp.27-28
這是Khu̍k-khu̍k博士所寫關係Bí-lí Gu-lem (Billy Graham)博士倫敦大佈道會的精彩結束記。
五月22日，Gu-lem博士佇Wembley 的倫敦皇家運動場，向120,000人的大聽眾來講道。這是有教會史以來聽眾最濟。博士已經三點前佇Shepherd’s Bush 的 White City運動場向67,000 的聽眾講道。有4000人佇這个會決心求道，佮對開始起，有35,000以上佮無計算的幾若千个人信基督。到逐城，逐鄉繼續做工。Wembley 的聚會是予人無袂記得的絕頂，是打破救靈工作的記錄。
Gu-lem博士看著親像水溢--來的聽眾的時，受大感動。
Khan-ta-be-lí(カンタベリー)大監督，自由教會聯合會議議長，佮別派的指導者攏徛佇台頂，監督佮議長領導委員會祈禱。倫敦市長佮夫人，社會上的人士saⁿ-kap來表現對福音的熱誠。有濟濟坐火車，馬車對鄉村來的團體。
佇冷風、冷雨也無忍neh，有的徛，有的坐。Cliff Barrow指揮的 4,000大聖歌隊規點鐘久teh唱福音歌。
毋免講，Gu-lem博士已經把握著新聞佮公眾。捌有新聞無字眼通寫，講，這个佈道會是人為tik成功。總是刊出了就知in 的說明是無合的。
這个事對「時報」’TIME’來證實，按呢寫，「佇Gu-lem博士的最後的暗，親像起頭的款式，人的心teh 揣追明明有一个事實，佇逐个聚會有功效來感動人的心底，通決心做基督徒。
只有一个答覆，就是聖神的大工作佮全世界信徒無停的祈禱。就是博士強調對伊熱心的幫贊的，抑是冷心的，僥疑的人所講的。
拜六博士發表伊的確信講，英國有佇復興中。毋但kan-ta得著濟濟求道者名單，聽眾ná加添，奉獻也加添。有一个教會報告講獻金加三倍，傳教者見證講對博士學真濟，現在佇in說教後，teh關心反悔的人，愛通得著in。
有一項閣較通注目的事，就是對Harringay中繼禮拜的事。這个事是負責Harringay Arena 放送局的技師對佇暝祈禱來做的。
電信局也大大幫贊咱，為著欲予佈道會用，tâi 地下電線佇戰爭中所假設的所在。結果，佇最後6禮拜久的佈道所有的聚會，攏對Harringay中繼到佇400个教會，會堂，佇全英國，愛爾蘭各所在，常常大間的建物是予群眾佔領去聽，看袂著的唱歌佮講道的聲。
對佇Luke 公佮夫人佮Texas 的無名的朋友的好意，Gu-lem博士會通得著機會佇倫敦第一漂撇的 Dorehester旅社的送別宴的時，對社會真濟款人講道，chiah-ê人是貴族，貴族夫人，政府的要人，下院議員，軍部佮其他代表tik的人物。
隔早起，佇邱吉爾首相的招待會中，博士佮首相談論40 分鐘久。
逐人攏同意這个佈道會有得著頂面的大祝福。