設教一百週年倍加運動
Siat-kàu chi̍t-pah chiu-nî poē-ka ūn-tōng
文獻資訊
| 項目 | 資料 |
|---|---|
| 作者 | 許有才 Khó͘ Iú-châi |
| 卷期 | 台灣教會公報 |
| 卷期 | 第790號 |
| 日期 | 1954/10 |
| 頁數 | 3-4 |
白話字（原文數位化）
Siat-kàu chi̍t-pah chiu-nî Kàu hoē poē-ka ūn-tōng
(Lâm Tāi Gī-tiúⁿ: Khó͘ Iú-châi)
- 10, no. 790, pp. 3-4
Chit kài ê Lâm-pō͘ Tāi-hoē thong-koè chi̍t ê gī-àn, chiū-sī siat-kàu chi̍t-pah chiu-nî kàu-hoē poē-ka ūn-tōng. Chú-chí chiū-sī Lâm-pō͘ siat-kàu sī Chú-āu 1865 nî, sǹg kàu 1965 nî chiū moá chi̍t-pah chiu-nî, tuì taⁿ sǹg-khí thâu-boé koh 11 nî, khàu-si̍t sī 10 nî kú, lán chiū ngiâ-chih--tio̍h. uī-tio̍h tio̍h pī-pān ū ì-gī ê kì-liām kap khèng-chiok, chiū koat-tēng tī chit 10 nî kan, tio̍h chhut-la̍t thoân hok-im, kiàn-siat kàu-hoē, kàu hit-sî hō͘ kàu-hoē pí chit-tia̍p ke-thiⁿ têng-poē, chò lé-mi̍h lâi kám-siā Chú. Gī-koat ê sî, choân-oân khí-li̍p chàn-sêng, koh chek-sî piáu-sī chàn-tông kap kám-kek ê sim, chū-iû hiàn-kim chò chit ê lō͘-ēng, 120 goā ê gī-oân, kiōng hiàn 3 bān goā kho͘, chit hō ê piáu-koat kap chit khoán ê piáu-hiān, si̍t-chāi sī bī-cheng-iú ê chòng-kú.
Siūⁿ--khí-lâi che sī tiōng-tāi ê koat-chhek, chit ê ūn-tōng sī siat-kàu chi̍t sè-kí ê hó ê kiat-boé, iā sī tē-jī ê sè-kí ê hó ê khai-sí. Sī bī-cheng-iú ê siông-chhì (嘗試), sī chi̍t hāng ê mō͘-hiám, iā sī chi̍t ê sìn-sim. Sìn-sim siông-siông sī ū mō͘-hiám, koh sìn-sim sī iông-ún mō͘-hiám ê. Í-hā ài tuì chit chân sū kóng kuí kù ê kám-sióng.
- Che sī hó sî-ki ê hó kè-e̍k.
Chi̍t-pah chiu-nî si̍t-chāi sī chi̍t ê hó sî-ki, ta̍t-tit hō͘ lán thang kì-liām. Chú kàng-seng kàu taⁿ chiah lím-lím ū 20 ê chi̍t-pah chiu-nî. Siōng-tè hō͘ lán ê kàu-hoē keng-koè chi̍t-pah nî, ēng an-jiân kap chìn-tián lâi tō͘-koè kan-lân khi-khu ê lō͘-kèⁿ, put-lūn ge̍k-kéng, put-lūn sūn-tiau, lóng hō͘ lán kiâⁿ tī heng-thong kap sūn-lī ê lō͘. Ū kóng boē chīn ê un-sù tuì lán ê chiân-poè, thàu kàu tī lán lâi tì-ìm lán. Lán kiám m̄-tio̍h kám-siā mah? Koh lán oē tit ū hūn tī chit-ê, sǹg sī chin hó ê hēng-gū , lán bô lâng oē tú-tio̍h nn̄g pái ê chi̍t-pah chiu-nî. Taⁿ lán beh ēng sím-mi̍h lé-pài lâi kám-siā Chú. Lán bô thâi-ti, tô͘-iûⁿ, iā m̄ kan-ta hán-hoā, nāu-jia̍t. Lán sī kè-e̍k tī 10 nî lāi, kiàn-siat ka-poē ê kàu-hoē. Hiān-sî lán ū 150 keng, ǹg-bāng 10 nî āu koh tit-tio̍h 150 keng í-siōng, thang chò lé-mi̍h lâi kám-siā Chú. uī-tio̍h chit ê lâi-kè-e̍k, lâi ló͘-le̍k, lâi oa̍h-tāng, lâi hōng-hiàn, lâi kî-tó. Chit ê ūn-tōng sī muí chi̍t ê hoē-iú lóng ū hūn ê kè-e̍k. Che iā sī kai-jiân ê ūn-tōng, beh hō͘ Ki-tok ê thé ná tióng-toā ê.
- Ū te̍k-sek.
Koè-khì lán ê thoân-tō, tû-khì chho͘ siat sî-tāi í-goā, khah-siông sī chū-jiân phêng-tiòng. Khoàⁿ-kìⁿ ū hoē-iú tī hia teh chū-chi̍p lah, jiân-āu chiah phài sian-siⁿ khì chū-chāi. Sīm-chì í-keng sêng-li̍p kàu-hoē lah, iáu-kú thèng-hāu bô sian-siⁿ thang khì. Lán khoàⁿ Pó-lô in sī tuì-hoán. Sī khì bô hoē-iú, bô kàu-hoē ê só͘-chāi thoân-tō. In kéng siong-tong ê chhī-tìn chò tiong-sim lâi siat kàu-hoē. Chiū-sī tāi-seng phài lâng khì thoân-tō, jiân-āu siat kàu-hoē. Chit ê ūn-tōng chiū-sī beh chhin-chhiūⁿ án-ni. Tāi-seng soán-te̍k kàu-hoē ê hāu-pó͘-tē, nā-sī sek-tòng, put-lūn hia ū hoē-iú á bô hoē-iú, iā beh khì siat. Tī lán lâm-pō͘ 4 Tiong-hoē lāi, iáu ū 90 ê hiong-tìn kóng bô kàu-hoē. Tiōng-iàu ê pō͘-thâu iáu chin-chē, èng-kai tio̍h khì siat.
Koh chāi-lâi lán ê pò͘-tō sī soáⁿ-soáⁿ iā, soáⁿ-soáⁿ pò͘, bô ū kè-e̍k sèng. Taⁿ sī ū kè-e̍k kū-thé ê ān-hoat, sī beh chi̍p-tiong tī só͘ soán-te̍k ê só͘-chāi, iā pò͘-tō keng-koè it-tēng ê sî-kan, chiū beh sêng-li̍p kàu-hoē.
Chit ê ūn-tōng ū hun chò 7 ê pō͘-bûn, chiū-sī chhuí-hêng-pō͘, châi-chèng-pō͘, liân-lo̍k-pō͘, chu-liāu-pō͘, thoân-tō-pō͘, hùn-io̍k-pō͘, i-liâu thoân-tō-pō͘ téng, teh kè-e̍k kap chhui-chìn.
- Ū khó-lêng.
(1) Káu-cha̍p nî kú chiah ū 150 keng , nā-sī chhú-āu 10 nî kú iā siūⁿ beh siat 150 keng, kiám m̄-sī khong-sióng hong-hàm mah? Koè-khì chi̍t nî pêng kin siat bô chiūⁿ nn̄g keng, ū-iáⁿ sī chin bān, lán tio̍h sêng-jīn lán ê ló͘-le̍k bô kàu. Chóng-sī lán tio̍h chai, hoān-sū khí-thâu lân, sī tuì tī bô poàⁿ keng chò chhut-hoat--ê. Nā-sī hiān-sî lán ū 150 keng ê kàu-hoē, ū 44500 ê hoē-iú, ū 130 ê thoân-kàuchiá, ū 500 goā-ê tiúⁿ-ló, ū 700 goā ê chip-sū, chò lán ê ki-chhó͘. Nā muí keng kàu-hoē 10 nî tiong-kan ló͘-le̍k khì siat chi̍t keng chiū kàu-gia̍h, á-sī muí 10 keng kàu-hoē, chi̍t nî ke siat chi̍t keng iā ū. He̍k-sī lán ū 4 ê Tiong-hoē chi̍t nî ha̍p-le̍k siat 4 keng, chiū 10 nî āu kiám m̄-sī chiū 160 keng mah? Nā ū kè-e̍k, ū ló͘-le̍k , ún oē.
(2) Châi-chèng àn-sǹg chi̍t-chheng bān, m̄-sī kón bô chi̍t-chheng bān chiū boē thang kiàn-siat. Chóng-sī nā-sī pit-su lâi kóng, iā m̄-sī lán só͘ bē-khí--ê. Muí-nî nā ū 1000 lâng hoaⁿ-hí muí goe̍h hiàn 100 kho͘ chiū ū. Á-sī muí-nî nā ū 10000 lâng muí goe̍h hiàn 10 kho͘ chiū ū. Châi-chèng-cho͘ oē thè lán siūⁿ, hō͘ lán hó hōng-hiàn ê lō͘. Koh chit 10 nî kú, in-uī ài châi-le̍k chi̍p-tiong tī chit ê ūn-tōng, ū thêng-chí kí-sêng kàu-hoē khí pài-tn̂g hiòng pa̍t kàu-hoē bō͘-koan ê sū. Lán nā ū ló͘-le̍k, m̄-sī chò bē kàu ê sū.
- M̄-thang bē kì-tit--ê.
Put-kò bô͘-sū chāi lâng, beh hō͘ i sêng sī chāi Iâ-hô-hoa. Kî-si̍t chit ê sū Iâ-hô-hoa piān-piān ê ì-sù beh kā lán chiâⁿ. Chí-ū sī teh thèng-hāu lán kè-bô͘ nā-tiāⁿ. Lán tio̍h kî-tó Siōng-tè, pang-chān lán choân-thé ê hiaⁿ-tī chí-moē, lóng siâng chi̍t ê sim-chì, oē uī-tio̍h Siōng-tè kè-e̍k toā ê sū, oē hia̍p-le̍k uī-tio̍h Siōng-tè chò toā ê sū. Tio̍h kiû lah.
“Iâ-hô-hoa ah! Kiû Lí tī chiah-ê nî ê tiong-kan koh heng-khí Lí ê só͘ chò; tī chiah ê nî ê tiong-kan hián-hiān” (Hap-pa-kok 3:2).
漢羅（Ùi原文改寫）
設教一百週年教會倍加運動
(南大議長：許有才)
1954.10，no.790，pp.3-4
這屆的南部大會通過一个議案，就是設教一百週年教會倍加運動。主旨就是南部設教是主後1865年，算到1965年就滿一百週年，對今算起頭尾閣11年，扣實是10年久，咱就迎接--著。為著著備辦有意義的記念佮慶祝，就決定佇這10年間，著出力傳福音，建設教會，到彼時予教會比這tia̍p加添重倍，做禮物來感謝主。議決的時，全員起立贊成，閣即時表示贊同佮感激的心，自由獻金做這个路用，120外个議員，共獻3 萬外箍，這號的表決佮這款的表現，實在是未曾有的壯舉。
想--起來這是重大的決策，這个運動是設教一世紀的好的結尾，也是第二个世紀的好的開始。是未曾有的嘗試，是一項的冒險，也是一个信心。信心常常是有冒險，閣信心是容允冒險的。以下愛對這chân事講幾句的感想。
- 這是好時機的好計畫。
一百週年實在是一个好時機，值得予咱通記念。主降生到今才lím-lím有20 个一百週年。上帝予咱的教會經過一百年，用安然佮進展來度過艱難崎嶇的路徑，不論逆境，不論順調，攏予咱行佇興通佮順利的路。有講盡袂的恩賜對咱的前輩，透到佇咱來致蔭咱。咱kiám毋著感謝mah？閣咱會得有份佇這个，算是真好的幸遇，咱無人會抵著兩擺的一百週年今咱欲用啥物禮拜來感謝主。咱無thâi豬，屠羊，也毋kan-ta 喊喝、鬧熱。咱是計畫佇10年內，建設加倍的教會。現時咱有150 間，向望10年後閣得著150 間以上，通做禮物來感謝主。為著這个來計畫，來努力，來活動，來奉獻，來祈禱。這个運動是每一个會友攏有份的計畫。這也是該然的運動，欲予基督的體ná長大的。
- 有特色。
過去咱的傳道，除去初設時代以外，較常是自然膨脹。看見有會友佇遐teh聚集lah，然後才派先生去駐在。甚至已經成立教會lah，iáu-kú聽候無先生通去。咱看保羅in是對反。是去無會友，無教會的所在傳道。In揀相當的市鎮做中心來設教會。就是代先派人去傳道，然後設教會。這个運動就是欲親像按呢。代先選擇教會的候補地，若是適當，不論遐有會友抑無會友，也欲去設。佇咱南部4中會內，猶有90 个2鄉鎮講無教會。重要的埠頭猶真濟，應該著去設。
閣再來咱的佈道是散散掖，散散播，無有計畫性。今是有計畫具體的辦法，是欲集中佇所選擇的所在，也佈道經過一定的時間，就欲成立教會。
這个運動有分做7 个部門，就是推行部、財政部、連絡部、資料部、傳道部、訓育部、醫療傳道部等，teh計畫佮推進。
- 有可能。
(1)九十年久才有150 間，若是此後10年久也想欲設150 間，kiám毋是空想風譀mah？過去一年平均設無上兩間，有影是真慢，咱著承認咱的努力無夠。總是咱著知，凡事起頭難，是對佇無半間做出發--的。但是現時咱有150 間的教會，有44500 个會友，有130 个傳教者，有500外个長老，有700外个執事，做咱的基礎。若每間教會10年中間努力去設一間就到額，抑是每10 間教會，一年加設一間也有。或是咱有4个中會一年合力設4 間，就10年後kiám毋是就160 間 mah？若有計畫，有努力，穩會。
(2) 財政按算一千萬，毋是講無一千萬就袂通建設。總是若是必須來講，也毋是咱所袂起--的。每年若有1000人歡喜每月獻100箍就有。抑是每年若有10000人每月獻10箍就有。財政組會替咱想，予咱好奉獻的路。閣這10年久，因為愛財力集中佇這个運動，有停止kí-sêng教會起拜堂向別教會募捐的事。咱但有努力，毋是做袂到的事。
- 毋通袂記得--的。
不過謀事在人，欲予伊成是在耶和華。其實這个事耶和華便便的意思欲共咱成。只有是teh聽候咱計謀nā-tiāⁿ。咱著祈禱上帝，幫贊咱全體的兄弟姊妹，攏siâng一个心志，會為著上帝計畫大的事，會協力為著上帝做大的事。著求lah。
「耶和華ah！求你佇遮的年的中間閣興起你的所做；佇遮的年的中間顯現」(哈巴谷3：2)。