祈禱的力
Kî-tó ê la̍t
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第790號 |
| 日期 | 1954/10 |
| 頁數 | 9-10 |
白話字（原文數位化）
Kî-tó ê la̍t
(Bo̍k-su: Lí Kiàⁿ-tì).
- 10, no. 790, pp. 9-10
Chit ê tê-ba̍k sī siū chí-tēng ê. Goá lâi ín kuí kù Sèng-keng chat, kán-lio̍k hoat-piáu goá ê só͘ sìn, lâi oân goá ê siū thok. Goá siūⁿ beh ū iú-le̍k ê kî-tó, tio̍h ū í-hā ê sam tiâu-kiāⁿ.
(1) Kap Chú put-toān ê it-tì.
“Lín-nā tiàm tī goá, goá ê oē tiàm tī lín, hoān-nā só͘ ài ê lín tio̍h kiû, chiū beh kā lín chiâⁿ” (Iok 15:7).
(2) Ho̍k-chiông Pē ê chí-ì.
“Sim nā bô chek-pī lán, chiū lán ǹg Siōng-tè ū hó-táⁿ, koh kìⁿ-nā lán só͘ kiû ê, chiū tuì I tit-tio̍h, in-uī lán siú I ê bēng-lēng, tī I ê bīn-chêng kiâⁿ I só͘ hoaⁿ-hí ê tāi-chì” (I Iok 3:21-23).
(3) Bô iô-choah ê sìn-sim.
“To̍k-to̍k tio̍h ēng sìn lâi kiû, lóng bô giâu-gî, in-uī giâu-gî ê lâng phì-jū chhin-chhiūⁿ hái-éng hō͘ hong phah, lâi khí-lo̍h. Hit hō lâng bián phah-sǹg tuì Chú ū tit-tio̍h sím-mi̍h” (Ngá 1:6, 9).
Taⁿ lâi khoàⁿ, í-siōng chit khoán ê kî-tó ū sím-mi̍h la̍t.
(1) Hō͘ lán chai pún-sin ê chin-siōng, soà lâi pó-chhî sèng-kiat ê seng-oa̍h.
Lán beh tit-tio̍h hong-hù ê lêng-le̍k, choè tiōng-iàu ê sī jīn-sek chū-kí, koh kî-tó tiong chiah oē jīn-sek chū-kí. “Tng O͘-se-a ông sí hit nî, i (Í-sài-a) bīn-tú-bīn khoàⁿ-kìⁿ Chú, tâng-sî khoàⁿ-kìⁿ i chū-kí ê ù-oè.” Hit sî i kóng, goá ū chai-ē ah, goá bia̍t-bô lah, in-uī goá sī chhuì-tûn bô chheng-khì ê lâng, koh tiàm tī chhuì-tûn bô chheng-khì ê peh-sìⁿ (Sài 6:1-5).
Koh ū kî-tó seng-oa̍h ê lâng, chiah chai-iáⁿ ka-kī ê khiàm-kheh, chiah ū la̍t thang thiat-té-tek hoán-hoé thoat-lī choē. “Kî-tó tiong chiah oē sèng-kè choē” (Si 51:2).
(2) Hō͘ lán ke-thiⁿ kian-kò͘ ê sìn-sim.
“Chú Iâ-so͘ hō͘ lâng boē hit mî, chiàu-siông khì Ka-ná-soaⁿ, ha̍k-seng iā tè i, kàu hit só͘-chāi chiū kā in kóng, Lín tio̍h kî-tó, bián-tit ji̍p tī bê-he̍k” (Lō͘ 22:40).
(3) Hō͘ lán khah bêng-pe̍k Sîn ê tō-lō͘ kap oē.
Chai Sîn ê lō͘ kap oē lâi kiâⁿ tī hit tiong-kan, sī hô-téng ê khoài-lo̍k, chit ê khoài-lo̍k sī tuì kî-tó lâi tit, “Iâ-hô-hoa ah! kiû Lí chiong Lí ê lō͘-tô͘ kà-sī goá” (Si 25:4). Kiû Lí khui goá ê ba̍k-chiu, hō͘ goá khoàⁿ-chhut Lí lu̍t-hoat tiong kî-biāu” (Si 119:18).
(4) Chhiok-chìn lán lêng-bēng tióng-tāi, kang-chok ū lêng-le̍k.
Tī lán seng-oa̍h tiong muí chi̍t kiāⁿ pó-kuì sio̍k lêng ê hok-khì, to͘ sī lán ê pē thiaⁿ kî-tó só͘ sù hō͘ lán ê, pèng bô pa̍t-mi̍h chhin-chhiūⁿ kî-tó hit khoán oē chhiok-chìn lán lêng-bēng tióng-tāi, hō͘ lán koh-khah chhin-chhiūⁿ Ki-tok. “…..lóng piàn-hoà choè i ê siōng……” (II Lîm 3:18). “Kî-tó soah, chū-chi̍p ê só͘-chāi toā tín-tāng, chèng-lâng lóng siū Sèng Sîn chhiong-moá” (Hēng 4:31).
(5) Ū lêng-le̍k ta̍t-kàu sin (身) í-goā.
Hō͘ choē-jîn hoé-kái, kàu-hoē bông-hok, hō͘ thoân hok-im ê ū tì-huī, téng-téng. Sîn ū bû-hān ê lêng-le̍k chún-pī teh hō͘ lán iōng. Chhin-ài ê tho̍k-chiá, hi-bāng bo̍h-tit hut-lio̍k, kî-kiû lâi niá-siū. “Kiû chiū hō͘ lín, chhē chiū tú-tio̍h, phah mn̂g chiū kā lín khui……”
漢羅（Ùi原文改寫）
祈禱的力
(牧師：李鏡智)。
1954.10，no.790，pp.9-10
這个題目是受指定的。我來引幾句聖經節，簡略發表我的所信，來完我的受託。我想欲有有力的祈禱，著有以下的三條件。
(1)佮主不斷的一致。
「恁若踮佇我，我的話踮佇恁，凡若所愛的恁著求，就欲共恁成」(約15：7)。
(2)服從爸的旨意。
「心若無責備咱，就咱向上帝有好膽，閣見若咱所求的，就對伊得著，因為咱守伊的命令，佇伊的面前行伊所歡喜的代誌」(伊約3：21-23)。
(3)無搖choah 的信心。
「獨獨著用信來求，攏無僥疑，因為僥疑的人譬喻親像海湧予風拍，來起落。彼號人免拍算對主有得著啥物」(雅 1：6，9)。
今來看，以上這款的祈禱有啥物力。
(1)予咱知本身的真像，紲來保持聖潔的生活。
咱欲得著豐富的能力，做重要的是認識自己，閣祈禱中才會認識自己。「當烏西亞王死彼年，伊(以賽亞)面tú面看見主，同時看見伊自己的污穢。」彼時伊講，我有災厄ah，我滅無lah，因為我是喙唇無清氣的人，閣踮佇喙唇無清氣的百姓(Sài 6：1-5)。
閣有祈禱生活的人，才知影家己的欠缺，才有力通徹底的反悔脫離罪。「祈禱中才會勝過罪」(詩 51：2)。
(2)予咱加添堅固的信心。
「主耶穌予人賣彼暝，照常去Ka-ná山，學生也綴伊，到彼所在就共 in講，恁著祈禱，免得入佇迷惑」(路22：40)。
(3)予咱較明白神的道路佮話。
知神的路佮話來行佇彼中間，是何等的快樂，這个快樂是對祈禱來得，「耶和華ah！求你將你的路途教示我」（詩 25：4)。求你開我的目睭，予我看出你律法中奇妙」(詩 119：18)。
(4)促進咱靈命長大，工作有能力。
佇咱生活中每一件寶貴屬靈的福氣，就是咱的爸聽祈禱所賜予咱的，並無別物親像祈禱彼款會促進咱靈命長大，予咱閣較親像基督。「……攏變化做伊的像……」(II 林5 3：18)。「祈禱煞，聚集的所在大振動，眾人攏受聖神充滿」(行4：31)。
(5)有能力達到身以外。
予罪人悔改，教會蒙福，予傳福音的有智慧，等等。神有無限的能力準備teh予咱用。親愛的讀者，希望莫得忽略，祈求來領受。「求就予恁，揣就拄著，拍門就共恁開……」