普世教聯代表第一信
Phó͘-sè Kàu-liân Tāi-piáu tē-it sìn
文獻資訊
| 項目 | 資料 |
|---|---|
| 作者 | 楊士養 Iûⁿ Sū-ióng |
| 卷期 | 台灣教會公報 |
| 卷期 | 第790號 |
| 日期 | 1954/10 |
| 頁數 | 6-7 |
白話字（原文數位化）
Phó͘-sè Kàu-liân Tāi-piáu tē-it sìn
- 10, no. 790, pp. 6-7
Só͘ kèng-ài ê Chóng-kàu-sū Bú-tong Bo̍k-su siu phoe pêng-an.
Sió-tī chi̍t lō͘ pêng-an kàu uī, che sī Thiⁿ-pē ê in-tián kap lia̍t-uī ê tì-ìm. Chin kám-siā Chú. Ha̍p-kai tio̍h khah chá siá phoe chhéng-an kap pò-kò. In-uī tī Princeton kap Evanston ê hoē-gī tiong sî-kan chin kiap; í-goā chiah ê Tâi-oân pêng-iú nā hoah kiâⁿ tio̍h toè in. Só͘-í iân-chhiân kàu taⁿ chiah siá phoe, toā-toā sit-lé, chhiáⁿ khoan-iông.
Goán tī Princeton ê hoē, sî-ji̍t khah chió, hoē-tiûⁿ kap siok-sià khah chò-hoé, koh lóng sī Tiúⁿ-ló-hoē ê lâng, kap khah oá Tiúⁿ-ló-hoē--ê, lâng-sò͘ khah chió. Só͘-í ū kám-kak khah (ka-têng-tek) chhin-bi̍t ê khoán. Evanston ê chū-hoē sî-ji̍t khah tn̂g, hoē-tiûⁿ saⁿ-lī khah hn̄g, lâng-sò͘ chē, hoān-uî khoah. Chóng-sī tī Ki-tok lâi ha̍p-oá ê chū-hoē iā kám-kak chin hó.
Evanston ê Chóng-hoē pì-hoē liáu, goán chiū koh kàu Chicago, keh kuí-nā ji̍t chiū kàu Ka-ná-tāi thàm Bó-hoē. Tī chia siū-tio̍h Ka-ná-tāi Tiúⁿ-ló-hoē ê hó-ì, an-pâi ta̍k hāng hó-sè. In ū beh kā goán pâi ji̍t-thêng hō͘ goán khì sì-kè khoàⁿ-khoàⁿ. Chiong-hui Bo̍k-su beh toà chia kàu 13, āu-lâi beh khì New York. Goá beh toà chia kàu 9 goe̍h 24. āu-lâi beh khì Princeton.
Ū kìⁿ-tio̍h Lâu Tiong-kian Bo̍k-su kap Bo̍k-su-niû. In ióng-ióng, chin ài thiaⁿ Tâi-oân ê siau-sit. Goán kiaⁿ-liáu i siuⁿ siān, chóng-sī i chin ài kóng, iā ài thiaⁿ. Ū teh siat-hoat ài chū-chi̍p chiah ê bat khì Tâi-oân ê soan-kàu-su kap goán kóng-oē, iáu-boē tiāⁿ-tio̍h ji̍t. Cha-hng N̂g Bo̍k-su kap Tân Bo̍k-su khì chi̍t uī ha̍k-seng ê Camp khoàⁿ-khoàⁿ, N̂g Bo̍k-su ū káng-oā. Gô͘ Eńg-hoâ Bo̍k-su ka-kī khì koh chi̍t uī ê Camp khoàⁿ-khoàⁿ. Goá kàu chi̍t keng Tiúⁿ-ló Kàu-hoē hù lé-pài, kā in chhéng-an.
Goán kàu uī sin ê Kàu-sū Mr. Johnson kā goán kóng, ū kì-chiá beh lâi chhoē goán. āu-lâi kó-jiân nn̄g, saⁿ lâng lâi, 9 goa̍h 4 ji̍t chiū chhut chi̍t tè, iā hip goán 4 lâng ê siōng. Só͘ siá sī koan-hē goán lâi thàm Bú-hoē ê sū. Ū nn̄g tuī ê sin-bûn (Telegram kap The Globe and Mail) chhut té-té ê kì-sū.
Taⁿ siá chiah ê pò tām-po̍h siau-sit.
Tì-ì chhéng-an lí kap kuì ka-cho̍k.
-
-
- tī To-lûn-to.
-
Iûⁿ Sū-ióng kèng-siá.
漢羅（Ùi原文改寫）
普世教聯代表第一信
1954.10，no.790，pp.6-7
所敬愛的總教士武東牧師收批平安。
小弟一路平安到位，這是天爸的恩典佮列位的致蔭。真感謝主。合該著較早寫批請安佮報告。因為佇Princeton佮Evanston 的會議中時間真kiap；以外chiah-ê台灣朋友若hoah行著綴in。所以iân-chhiân到今才寫批，大大失禮，請寬容。
阮佇Princeton 的會，時日較少，會場佮宿舍較做伙，閣攏是長老會的人，佮較倚長老會--的，人數較少。所以有感覺較(家庭的)親密的款。Evanston 的聚會時日較長，會場相離較遠，人數濟，範圍闊。總是佇基督來合倚的聚會也感覺真好。
Evanston 的總會閉會了，阮就閣到Chicago，隔幾若日就到加拿大探母會。佇遮受著加拿大長老會的好意，安排逐項好勢。In有欲共阮排日程予阮去四界看看。Chiong-hui牧師欲蹛遮到13，後來欲去New York。我欲蹛遮到9月24。後來欲去Princeton。
有見著劉中堅牧師佮牧師娘。In 勇勇，真愛聽台灣的消息。阮驚了伊傷siān，總是伊真愛講，也愛聽。有teh設法愛聚集遮的捌去台灣的宣教師佮阮講話，猶未定著日。昨昏黃牧師佮陳牧師去一位學生的Camp看看，黃牧師有講話。吳永華牧師家己去閣一位的 Camp看看。我到一間長老教會赴禮拜，共 in請安。
阮到位新的教士Mr.Johnson 共阮講，有記者欲來揣阮。後來果然兩、三人來，9月4日就出一塊，也翕阮4人的像。所寫是關係阮來探母會的事。有兩隊的新聞(Telegram佮The Globe and Mail)出短短的記事。
今寫遮的報淡薄消息。
致意請安你佮貴家族。
1954.9.6.佇多倫多。
楊士養敬寫。