雜錄：看天堂kap地獄

Cha̍p-lio̍k: Khoàⁿ Thian-tông kap Tē-ge̍k

文獻資訊

項目	資料
作者	Gô͘ Khêng-eng Gô͘ Khêng-eng
卷期	台灣教會公報
卷期	第788號
日期	1954/8
頁數	26

白話字（原文數位化）

CHA̍P-LIO̍K

Khoàⁿ Thian-tông kap Tē-ge̍k

1954.08  788 hō  p.25-27

(Gô͘ Khêng-eng)

Tī Kiâm-po͘-á ū chi̍t ê chí-moē, tuì 33 nî chêng kàu hiān-chāi, siū chhoā kuí-nā pái khì khoàⁿ thian-tông tē-ge̍k ê sū, pò hō͘ tāi-ke chai. Chit ê chí-moē 20 hoè chò chhin tī chháu-tē, tuì án-ni loé-chì léng-sim, tì-kàu ū phāng thang hō͘ Mô͘-kuí chhim-ji̍p. Sat-tàn nā lâi kā i chhoā--khì, i chiū hūn--khì, in pē-bó nā pek-chhiat kî-tó, i chiū koh hó--khí-lâi.

Ū chi̍t ji̍t, chi̍t ê lāu-lâng lâi kā i chhoā khì peh chi̍t ê ún-ku kiô, khí-thâu teh peh chin hó-sè, kàu āu-lâi teh peh kho̍k-kho̍k hián, kàu beh poa̍h--lo̍h-khì; i chin kiaⁿ, m̄-káⁿ peh. Lāu-lâng chiū kā i kóng, “Goá khan lí, m̄-bián kiaⁿ,” i chiū koh kā i kóng, “Lí khí-‘thâu teh peh chin hó-sè; che chiū-sī lâng nā jia̍t-sim teh peh lóng chin chāi, nā léng-sim ê sî teh peh chiū ē hián, beh poa̍h--lo̍h-khì.” In peh koè hit ê kiô chiū ti̍t-ti̍t kiâⁿ. Koh kàu chi̍t ê kiô chin tn̂g, koè-khì hit pêng ū chi̍t chiah sai pa̍k tī hia, peh khí-lâi kiâⁿ-lâi kiâⁿ-khì. I chin kiaⁿ, m̄-káⁿ koè, hit lâng chiū koh kā i âⁿ hit chiah sai, i chiū siám koè-khì. Koh ti̍t-tio̍h kiâⁿ kàu chi̍t khu koé-chí hn̂g, ū thiaⁿ-kìⁿ chin hó thiaⁿ ê siaⁿ-im, koh khoàⁿ-kìⁿ chin chē sèng-tô͘ tī hia teh bán koé-chí lâi chia̍h. I khoàⁿ liáu chin hoáⁿ-hí, iā ài kā i bong khoàⁿ--leh, chóng-sī bong lóng bô.

āu-lâi in chiū koh kiâⁿ kàu sèng-siâⁿ mn̂g-kháu, hut-jiân Chú Iâ-so͘ kap thiⁿ-sài chhoā chi̍t ê sìn-tô͘ beh ji̍p-khì sèng-siâⁿ, in chiū siám tī siâⁿ-mn̂g piⁿ hō͘ in koè-khì. Hit ê lâng sī tú-á tuì sè-kan siū chhoā--lâi ê, só͘ chhēng ê saⁿ bái-bái, koh bīn iā sī bô suí, sán-sán. Tī hia ū chi̍t khut pó-choâⁿ chuí, i chiū lo̍h-khì sé seng-khu, hit sî tuì sèng-siâⁿ ê lāi-bīn ū chi̍t ê lâng the̍h chi̍t su pe̍h-saⁿ té tī chi̍t ê kim poâⁿ-á, phâng chhut-lâi kā i chhēng. Hit sî hit ê lâng hut-jiân kap í-chêng lóng bô sio-siâng, piàn chi̍t ê chin êng-kng koh chin suí ê lâng. Tī siâⁿ-lāi ū chi̍t tīn chin kó͘-chui ê gín-á chhut-lâi ngiâ-chih i ji̍p-khì; in sī tuì tang-mn̂g ji̍p-khì. āu-lâi goán chiū tuì lâm-mn̂g ji̍p-khì, kàu mn̂g-kháu, mn̂g phah khui ū êng-kng chiò--chhut-lâi. Goá hō͘ hit ê kng chiò--tio̍h, goá chiū tò-thè chin kiaⁿ, m̄-káⁿ ji̍p-khì, hit lâng kā goá kóng, Lí ū toà choē lâi, chiah ē kiaⁿ. Chhin-chhiūⁿ án-ni, saⁿ-pái hō͘ kng chiò, goá lóng tò-thè, m̄-káⁿ ji̍p-khì; āu-lâi i chiah khan goá ê chhiú ji̍p--khì.

Sèng-siâⁿ ê lāi-bīn ke-lō͘ lóng pho͘ kim, chhù sī kng-liāng ê pó-chio̍h lâi khí ê, ta̍k keng pâng-keng lóng chin suí. Goán ji̍p-khì ê sî, ta̍k ê lâng lóng teh chia̍h mi̍h, ta̍k ê lóng teh khoàⁿ goá, siūⁿ-tio̍h ka-kī ê seng-khu kap lâng bô sio-siâng, chin kiàn-siàu, m̄-káⁿ kia̍h thâu khí-lâi khoàⁿ lâng. Goá chiū thâu-khak chhih-chhih ti̍t-ti̍t koè--khì.

Kàu goá ê pâng-keng, i kā goá kóng, Chit keng sī lí ê, goá chiū chin hoaⁿ-hí beh tiàm tī hia; bîn-chhn̂g sī pó-chio̍h lâi chò ê, piah-nih ū tiàu chi̍t su êng-kng chhàn-lān suí ê pe̍h-saⁿ, chhiú chhun khì beh kā i bong, bong bô, beh chē bîn-chhn̂g iā chē bô, in-uī sî iáu-bē kàu. Hit lâng chiū ti̍t-ti̍t kā goá koáⁿ, kiò goá tio̍h koh toè i khì. Goá ìn i kóng, M̄ ah, beh tiàm chia chiū hó, bô ài koh khì pa̍t uī. I kóng, bē sat2-tit, tio̍h kín-kín chhut-lâi khì, in-uī lí ê sî iáu-bē kàu, koáⁿ-kín chhut-lâi khì, nā bô siâⁿ-mn̂g, teh-beh koaiⁿ lah. āu-lâi goá hō͘ i kiông-pek, chiū koh kap i khì.

Goán nn̄g ê kiáⁿ kàu chi̍t ê chhim-ian ê só͘-chāi, i chiū chhun chhiú khan goá poe koè--khì, hit lāi-bīn ū thî-khàu ai-chhám ê siaⁿ, koh ū khoàⁿ-kìⁿ o͘-ian tuì lāi-té ti̍t-ti̍t chhèng--chhut-lâi, goá chiū mn̄g khoàⁿ he siáⁿ-hoè, he siáⁿ-hoè? I ìn goá kóng, Che sī chá-chêng ê pháiⁿ sîn tiàm tī hia teh hêng-hoa̍t ê só͘-chāi. Koh kàu chi̍t ê só͘-chāi chhin-chhiūⁿ bōng chin toā-ê, iā chin chē. Goá chiū koh mn̄g, he siáⁿ-hoè? I kóng, hit lāi-bīn iā sī teh hêng-hoa̍t lâng. Koh kàu chi̍t só͘-chāi khoàⁿ-kìⁿ chheng-chheng bān-bān chhó-chhó ê lâng bē sǹg-tit; ū-ê chhēng chin suí, ū-ê chhēng chin bái, ū-ê thâu-mn̂g kim-kim, ū-ê thâu-mn̂g sàm-sàm, tī chi̍t ê toā ê chháu-po͘ ê só͘-chāi. Goá khoàⁿ liáu chin siong-sim, in-uī in lóng bô chhù thang khiā, goá mn̄g he sī án-choáⁿ-iūⁿ? Thài tiàm tī hia? I ìn kóng, hiah ê lâng teh thèng-hāu sím-phoàⁿ.

Goán koh kiâⁿ, khoàⁿ-kìⁿ chi̍t ê soaⁿ ū hoé teh to̍h, iā ū chi̍t-tīn chi̍t-tīn ê lâng tī hia teh thèng-hāu beh lo̍h-khì hoé-nih sio, in-uī hoé-lāi ê lâng nā sio liáu khí-lâi, chiū koh oāⁿ pa̍t tīn ê lâng lo̍h-khì sio, án-ni sio thè teh hêng-hoa̍t. Goá khoàⁿ tī hoé-lāi ê lâng sio kàu gê-á giàng-giàng, goá chin kiaⁿ, chiū kā i kóng, goá m̄-káⁿ khoàⁿ, chin kiaⁿ, i chiū kā goá kóng, lí nā kiaⁿ, khan goá ê saⁿ-á-ku khì am lí ê ba̍k-chiu. Goá chiū koáⁿ-kín khiú i ê saⁿ lâi am, liâm-piⁿ kàu goá ê chhù cheng-sîn khí--lâi. Chóng-sī ba̍k-chiu lóng bū-bū khoàⁿ bē bêng, ke-lāi ê lâng kap chhù-piⁿ, chhin-lâng lóng cháu lâi khoàⁿ, sio-cheⁿ mn̄g, lí tńg-lâi lah, lí ū khoàⁿ-tio̍h goá bó͘-lâng á-bô? Goá tú-á hūn-khì 3 ji̍t nn̄g mî. Hit sî lâng nā mn̄g goá khoàⁿ goán bó͘-lâng ū tit-kiù á-bô? Chiū thâu-khak téng ū kng-kng ê só͘-chāi, koh ū chi̍t lâng khiā tī hia teh ìn kóng, kā i kóng ū o͘h! ū tit-kiù tī chia, án-ni kàu àm, chiū bô koh khoàⁿ-kìⁿ, ba̍k-chiu chiū ē thí kim.

Hit sî ke-lāi ê lâng kóng beh chú moê hō͘ goá chia̍h, goán lāu-pē kóng, m̄-thang, hiah kú bô chia̍h kiaⁿ-liáu ē guî-hiám, chia̍h ám khah hó. Goá chiū kap goán hiaⁿ-só teh kóng, chit sî nā lâi sí iáu ē tit-kiù, nā āu-ji̍t lâi sí m̄-chai ē á-bē? iáu m̄-chai. Tú teh kóng ê sî, hut-jiân khoàⁿ-kìⁿ thiⁿ-sài kap Chú Iâ-so͘ lâi beh chhoā i khì, chhiú-nih ū phâng chi̍t ê kim-poe, kiò i chhun chhiú khì chih. Goá toā siaⁿ kóng, Chú lâi lah, kiò goá chhun chhiú khì chih poe. Goán lāu-pē thiaⁿ-tio̍h, kín-kín cháu lâi tuì Chú kiû kóng, Chú ah, m̄-thang chit sî chhoā i tò-khì, kiaⁿ-liáu sí ê miâ ē tú-tio̍h ki-chhì, hō͘ lâng huí-pòng, án-ni pek-chhiat tuì Chú ti̍t-ti̍t kiû. āu-lâi Chú kap thiⁿ-sài bīn oa̍t koè-khì, chiū ti̍t-ti̍t kiâⁿ-khì. Goá kā goán pâ kóng, Chú tò-khì lah. Tuì hit sî goá chiū hó--khí-lâi.

Tī 15, 6 nî chêng ài chhut tī Kàu-hoē-pò, hō͘ tāi-ke chò chham-khó, tú-tio̍h Tāi-tang-a chiàn-cheng, Pe̍h-oē-jī (Kong-pò-siā) soà thêng-pán, tuì án-ni bô thang ìn, iân-chhiân kàu kin-á-ji̍t. āu-ji̍t ū ki-hoē beh koh siá, in-uī tī chit cha̍p-goā nî kú koh siū chhoā khì khoàⁿ chin chē pái.

(Gô͘ Khêng-eng)

漢羅（Ùi原文改寫）

雜錄

看天堂佮地獄

1954.08  788號  p.25-27

(Gô͘ Khêng-eng)

佇鹹埔仔有一个姊妹，對33年前到現在，受chhoā幾若擺去看天堂地獄的事，報予逐家知。這个姊妹20歲做親佇草地，對按呢餒志冷心，致到有縫通予魔鬼侵入。撒旦若來共chhoā去，伊就暈--去，in父母若迫切祈禱，伊就閣好--起來。

有一日，一个老人來共伊chhoā去跁一个ún-ku橋，起頭teh跁真好勢，到後--來teh跁kho̍k kho̍k hián，到欲跋--落去；伊真驚，毋敢跁。老人就共伊講：「我看你，毋免驚，」伊就閣共伊講：「你起頭teh跁真好勢，這就是人若熱心teh跁攏真在，若冷心的時teh跁，著會hián，欲跋--落去。」In跁過彼个橋就直直行。閣到一个橋真長，過去彼爿有一隻獅縛佇遐，跁起來行來行去，伊真驚，毋敢過，彼人就閣共伊âⁿ彼隻獅，伊就閃--過去。閣直直行到一坵果子園，有聽見真好聽的聲音，閣看見真濟聖徒佇遐teh挽果子來食。伊看了真歡喜，也愛共伊摸看--leh，總--是摸攏無。

後--來in就閣行到聖城門口，忽然主耶穌佮天使chhoā一个信徒欲入去聖城，in就閃佇城門邊予in過去。彼个人是拄仔對世間受chhoā--來的，所穿的衫bái-bái，閣面也是無媠，sán-sán。佇遐有一堀寶泉水，伊就落去洗身軀，彼時對聖城的內面有一个人提一軀白衫貯佇一个金盤仔，捧出來共伊穿。彼時的人忽然佮以前攏無相像，變一个真榮光閣真媠的人。佇城內有一陣真古錐的囡仔出來迎接伊入--去：in是對東門入--去。後--來阮就對南門入--去，到門口，門拍開有榮光照--出來。我予彼个光照--著，我就倒退真驚，毋敢入--去，彼人共我講，你有帶罪來，才會驚。親像按呢，三擺予光照，我攏倒退，毋敢入--去；後來伊才牽我的手入--去。

聖城的內面街路攏舖金，厝是光亮的寶石來起--的，逐間房間攏真媠。阮入--去的時，逐个人攏teh食物，逐个攏teh看我，想著家己的身軀 佮人無相像，真見笑，毋敢攑頭起來看人。我就頭殼chhih-chhih直直過--去。

到我的房間，伊共我講，這間是你的，我就真歡喜欲踮佇遐；眠床是寶石來做--的，壁--裡有吊一軀榮光燦爛媠的白衫，手伸去欲共伊摸，摸無，欲坐眠床也坐無，因為時猶未到。彼人就直直共我趕，叫我著閣綴伊去。我應伊講：「毋-ah，欲踮遮就好，無愛閣去別位。」伊講：「袂使得，著緊緊出--來去，因為你的時猶未到，趕緊出--來去，若無城門teh欲關--lah。」後來我予伊強迫，就閣佮伊去。

阮兩人行到一个深淵的所在，伊就伸手牽我飛--過去，彼內面有啼哭哀慘的聲，閣有看見烏煙對內底直直chhèng--出來，我就問看彼啥貨？伊應講：「這是早前的歹神踮佇遐teh刑罰的所在。」閣到一个所在親像墓真大个，也真濟。我就閣問，彼啥貨？伊講：「彼內面也是teh刑罰人。」閣到一所在看見千千萬萬chhó-chhó的人袂算--得；有的穿真媠，有的穿真bái，有的頭毛金金，有的頭毛sàm-sàm，佇一个大的草埔的所在。我看了真傷心，因為in攏無厝通徛，我問彼是按怎樣？Thài踮佇遐？伊應講：「遐的人聽候審判。」

阮閣行，看見一个山有火teh著，也有一陣一陣的人佇遐teh聽候欲落去火--裡燒，因為火內的人若燒了起--來，就閣換別陣的人落去燒，按呢相替teh刑罰。我看佇火內人，燒到牙仔giàng-giàng，我真驚，就共伊講：「我毋敢看，真驚。」伊就共我講：「你若驚，牽我的衫仔裾去掩你的目珠。」我就趕緊揪伊的衫來掩，連鞭到我的厝精神--起來。總是目珠攏霧霧看袂明，家內的人佮厝邊，親人攏走來看，相爭問，你轉--來lah，你有看著我某人抑無？我拄仔暈去三日兩暝。彼時人若問我：「看阮某人有得救抑無？」就頭殼頂有光光的所在，閣有一人徛佇遐teh應，共伊講有--o͘h！有得救佇遮，按呢到暗，就無閣看見，目珠就會展金。

彼時家內的人講欲煮糜予我食，阮老父講：「毋通遐久無食驚了會危險，食ám較好。」我就佮阮兄嫂teh講：「這時若來死猶會得救，若後日來死毋知會抑袂？猶毋知。」拄teh講的時，忽然看見天使佮主耶穌來欲chhoā我去，手--裡有捧一个金杯，叫我伸手去接。我大聲講：「主來--lah，叫我伸手去接杯。」阮老父聽--著，緊緊走來對主求講：「主--ah，毋通這時chhoā伊倒--去，驚了死的名會拄著譏刺，予人誹謗，按呢迫切對主直直求。」後--來主佮天使面越--過去，就直直行--去。我 共阮爸講：「主倒--去lah。」對彼時我就好--起來。

佇15、6年前愛出佇教會報，予逐家做參考，拄著大東亞戰爭。白話字(公報社)紲停版，對按呢無通印，延chhiân到今仔日。後日有機會欲閣寫，因為佇這十外年久閣受chhoā去看真濟擺。

(Gô͘ Khêng-eng)