鹿滿教會
Lo̍k-boán kàu-hoē.
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第786號 |
| 日期 | 1954/6 |
| 頁數 | 15 |
白話字（原文數位化）
Lo̍k-boán kàu-hoē.
- 06, no. 786, pp. 15-16
Tuì Ka-gī chē chhia ji̍p soaⁿ-lāi 30 hun cheng, ū chi̍t ê hiuⁿ-siā kiò chò Lo̍k-moâ-sán. Khiok kau-thong chin lī-piān, chóng-sī sī soaⁿ-lāi sió-sè ê ke-lō͘. Tī khah téng-sì, āu-bīn ǹg-soaⁿ, chêng-bīn khoàⁿ lo̍h ke-lō͘, kong-kéng hó koh chheng-hiu ê só͘-chāi, ū chi̍t keng bo̍k-chō ê kàu-hoē-tn̂g, kó͘-chá kiò choè Lo̍k-moâ-sán, hiān-sî oāⁿ choè Lo̍k-boán kàu-hoē.
Chit keng kàu-hoē í-keng ū 46 nî ê le̍k-sú, chóng-sī khó-sioh bô sím-mi̍h te̍k-sek, kàu kin-á-ji̍t iáu-kú sī Tang-mn̂g kàu-hoē ê chi-hoē. Lé-pài-tn̂g ê piah-pang hō͘ pe̍h-hiā chia̍h kàu chin siong-tiōng, ū chi̍t-pō͘-hūn siu-lí, chóng-sī iā sī chin pháiⁿ khoàⁿ. Tī nn̄g nî chêng Peng Bêng-chhiong Sian-siⁿ siū phài lâi chia, kàu hiān-chāi put-chí chìn-pō͘. In ê tiúⁿ-ló án-ni kóng, Peng Sian-siⁿ chin ióng-kiāⁿ koh gâu bo̍k-hoē. Só͘-í ū ke kuí-nā hō͘, hiān-sî í-keng ū 30 goā hō͘, 60 ê hoē-oân, chóng jîn-sò͘ 200 goā lâng, muí lé-pài ū gō͘, la̍k cha̍p ê Chú-ji̍t-o̍h ha̍k-seng kap téng ē-po͘ chi̍t-pah-goā lâng teh lé-pài. Koh choè-kīn ū toā hùn-hoat, lé-pài-thiaⁿ ê í-liâu chóng oāⁿ, sin choè 26 liâu tn̂g-í kap káng-toh, káng-tâi-í, ēng 2000 goā kho͘; chin suí, chin chiâu-pī. Sió-hoē chin o-ló Peng Sian-siⁿ khîn-khîn choè kang. Chit pang iā ū kā i chhui-chiàn choè kang 30 nî í-siōng kàu-su chēng-ú ê su-luī lâi Tiong Uí. ǹg-bāng oē thang choè kàu-su. Phah-sǹg hit sî bô tek-khak oē seng tông-hoē, soà chhiáⁿ bo̍k-su. Che sī in só͘ ǹg-bāng ê.
Goān Siōng-tè kó-jiân chiâⁿ in ê khún-kiû. (Kang Chìn-hoat pò).
漢羅（Ùi原文改寫）
鹿滿教會
- 06, no. 786, pp. 15-16
對嘉義坐車入山內30分鐘，有一个鄉社叫做鹿滿sán。卻交通真利便，總是是山內小細的街路。佇較頂勢，後面向山，前面看落街路，光景好閣清休的所在，有一間木造的教會堂，古早叫做鹿滿sán，現時換做鹿滿教會。
這間教會已經有46年的歷史，總是可惜無甚麼特色，到今仔日猶過是東門教會的支會。禮拜堂的壁枋予白蟻食到真傷重，有一部分修理，總是也是真歹看。佇兩年前Peng Bêng-chhiong先生受派來遮，到現在不止進步。In的長老按呢講，Peng先生真勇健閣gâu牧會。所以有加幾nā戶，現時已經有30外戶，60个會員，總人數200外人，每禮拜有五、六十个主日學學生佮頂下晡一百外人teh禮拜。閣最近有大奮發，禮拜廳的椅條總換，新做26條長椅佮講桌，講台椅，用2000外箍；真媠，真齊備。小會真呵咾Peng先生勤勤做工。這pang也有共伊推薦做工30年以上教師贈予的師類來中委。向望會通做教師。拍算彼時無的確會/能seng tông-hoē，續請牧師。這是in所ǹg望ê。
願上帝果然成in的懇求。(江進發報)。