世界消息
Sè-kài Siau-sit
文獻資訊
| 項目 | 資料 |
|---|---|
| 作者 | 明有德 Bêng Iú-tek |
| 卷期 | 台灣教會公報 |
| 卷期 | 第786號 |
| 日期 | 1954/6 |
| 頁數 | 11 |
白話字（原文數位化）
Se-kài Siau-sit
(Bêng Iú-tek).
- 06, no. 786, pp. 11-12
Lûn-tun.
Saⁿ ge̍h 7 ji̍t, tī Lûn-tun kap sè-kài kok só͘-chāi ū ngiâ-chih 150 chiu-nî siat Sèng-keng-hoē ê kì-liām. Chi̍t-pah gō͘-cha̍p nî chêng, chiū-sī 1804 nî, ū 4, 5 ê lâng tī 3 ge̍h 7 ji̍t chá-khí-sî, saⁿ-kap chū-chi̍p chia̍h chá-tǹg, kap kî-tó kè-e̍k ài hoan-e̍k Sèng-keng choè choē-choē khoán ê khiuⁿ-kháu. Tī kì-liām-hoē ê sî, ū pò-kò kóng in ê hoē tī 150 nî ê tiong-kan ū chhut-pán 820 khoán ê khiuⁿ-kháu ê Sèng-keng. Chóng-sī chiong-lâi ê kang iáu chin choē, in-uī iáu ū 1000 goā khoán khiuⁿ-kháu ê lâng iáu bē ū Sèng-keng, iā ū 2400 bān lâng bē ū in pún khiuⁿ ê Sèng-keng thang tha̍k.
Hoat-kok.
Tī Hoat-kok Thian-chú-kàu ê lāi-bīn, kin-nî ū tú-tio̍h chin oh kái-koat ê būn-toê, chiū-sī choē-choē sîn-hū khì ji̍p tī choē-choē kang-tiûⁿ ê tiong-kan, choè chhin-chhiūⁿ lô-tōng kai-kip ê pêng-siông lâng. In ê ì-sù sī beh chhin-kūn chiah ê lâng, o̍h Chú ê bô͘-hoān kap in kau-poê. In-uī án-ni, in ê tong-kio̍k kā in chek-pī, chóng-sī in iáu-kú bô hâng-ho̍k in ê bēng-lēng.
Hi-lia̍p kok.
Kū-nî chhiu-thiⁿ kap kin-nî kuí lé-pài chêng, Hi-lia̍p kok í-ki̍p Tē-tiong-hái hū-kūn ê só͘-chāi ū tú-tio̍h toā tē-tāng, kuí-nā ê toā to͘-chhī lóng tó--khì, choē-choē lâng sí kap siū tāng-siong. Au-chiu kap Bí-kok ê kàu-hoē choē-choē uī teh bō͘-chi̍p chîⁿ, chia̍h-mi̍h í-ki̍p saⁿ téng-téng, iā koh phài lâng khì hia siat-hoat chióng-chióng ê sū-hāng. Sin-bûn pò-kò kóng, bē bat tú-tio̍h chhin-chhiūⁿ chiah-nih khó-lîn ê sū, choē-choē lâng uī-tio̍h án-ni sit-chì; chóng-sī kî-tiong tē-it bô sit-chì ê chiū-sī Ki-tok-tô͘. Kiàn-tiok-bu̍t ê tiong-kan, pài-tn̂g tē-it khoài siu-lí hó-sè.
ìn-tō͘.
Lâm ìn-tō͘ Liân-ha̍p Kàu-hoē ê Chóng-hoē, tī kin-nî chiaⁿ-ge̍h chū-chi̍p tī Madras ê sî, ū kéng sin ê gī-tiúⁿ, chiū-sī Sumitra (Su-bi̍t-to-lia̍p Bo̍k-su). Lâm ìn-tō͘ ê kàu-hoē sī tī 1947 nî, 5 ê toā kàu-phài liân-ha̍p ê kàu-hoē, Tiúⁿ-ló-hoē, Cho͘-ha̍p Kàu-hoē í-ki̍p Kái-kek Kàu-hoē. Chit ê sin ê gī-tiúⁿ í-chêng sī choè Cho͘-ha̍p Kàu-hoē ê bo̍k-su. Hiān-sî Lâm ìn-tō͘ Liân-ha̍p Kàu-hoē ū 800 ê bo̍k-su. Sumitra Bo̍k-su siū kéng liáu-āu, ū káng-ián kóng, ìn-tō͘ ê kàu-hoē sui-jiân khiàm-kheh keng-chè ê khuì-la̍t, iáu-kú bián-lē in m̄-thang oá-khò pa̍t kok kàu-hoē ê pang-chān, kiaⁿ liáu oē chó͘-tòng tio̍h kàu-hoē pò͘-tō ê cheng-sîn kap chìn-pō͘.
Geneva.
Saⁿ ge̍h 16 ji̍t ū hoat-hêng chi̍t pún sin ê chheh, chiū-sī History of the Ecumenical Movement (Phó͘-sè Kàu Liân ê le̍k-sú). Chit ê le̍k-sú sī tuì 1517-1948 nî ê tiong-kan. Tù-chiá chiū-sī Ro͘se Ko͘-niû (bat choè lú chheng-liân-hoē ê kàn-sū) kap Bishop Neill (Neill Kam-tok, i bat lâi thàm Tâi-oân ê kàu-hoē). Chit pún chheh hoat-hêng ê sî, tī Lûn-tun ū khui chi̍t ê lé-pài-sek, Canterbury ê kam-tok ū choè chú-lí. I ū kóng hiān-sî choē-choē kàu-hoē ê chí-tō-chiá lóng ū teh siūⁿ chit ê Phó͘-sè Kàu Liân ê ūn-tōng sī tī hiān-tāi ê sè-kài tē-it ū ì-gī ê ūn-tōng.
Ngāu-san-oân siau-sit.
Ngāu-san-oân kàu-hoē tī Siū-lān ji̍t ê lé-pài ū hiàn 100 kho͘ beh pang-chān kok-lāi kan-khó͘ ê lâng. Chin kám-siā. Tām-suí kàu-hoē ê chi̍t uī lâi lé-pài ê lâng, tī chîⁿ-poàⁿ(sic) hiàn 10 kho͘; siá kóng sī beh pang-chān Ngāu-san-oân.
漢羅（Ùi原文改寫）
世界消息
(明有德)
- 06, no. 786, pp. 11-12
倫敦。
三月7日，佇倫敦佮世界各所在有迎接150 週年設聖經會的記念。一百五十年前，就是1804年，有4、5个人佇3月7日早起時，saⁿ-kap聚集食早頓，佮祈禱計畫愛翻譯聖經做濟濟款的腔口。佇記念會的時，有報告講in的會佇150年的中間有出版820款的腔口的聖經。總是將來的工猶真濟，因為猶有1000外款腔口的人猶未有聖經，也有2400 萬人未有in本腔的聖經通讀。
法國。
佇法國天主教的內面，今年有拄著真oh解決的問題，就是濟濟神父去入佇濟濟工場的中間，做親像勞動階級的平常人。In的意思是欲親近遮的人，學主的模範佮in交陪。因為按呢，in的當局共in責備，總是in猶過無降服in的命令。
希臘國。
舊年秋天佮今年幾禮拜前，希臘國以及地中海附近的所在有拄著大地動，幾nā的大都市攏倒--去，濟濟人死佮受重傷。歐洲佮美國的教會濟濟位teh募集錢，食物以及衫等等，也閣派人去遐設法種種的事項。新聞報告講，未捌拄著親像遮爾可憐的事，濟濟人為著按呢失志；總是其中第一無失志的就是基督徒。建築物的中間，拜堂第一快修理好勢。
印度。
南印度連合教會的總會，佇今年正月聚集佇Madras的時，有揀新的議長，就是Sumitra (Su-bi̍t-to-lia̍p牧師)。南印度的教會是佇1947年，5个大教派連合的教會，長老會，組合教會以及改革教會。這个新的議長以前是做組合教會的牧師。現時南印度連合教會有800个牧師。Sumitra牧師受揀了後，有講演講，印度的教會雖然欠缺經濟的氣力，猶過勉勵in毋通倚靠別國教會的幫贊，驚了會阻擋著教會佈道的精神佮進步。
Geneva。
三月16日有發行一本新的冊，就是History of the Ecumenical Movement (普世教聯的歷史)。這个歷史是對1517-1948年的中間。著者就是Ro͘se姑娘 (捌做女青年會的幹事) 佮Bishop Neill (Neill監督，伊捌來探台灣的教會)。這本冊發行的時，佇倫敦有開一个禮拜式，Canterbury的監督有做主理。伊有講現時濟濟教會的指導者攏有 teh想這个普世教聯的運動是佇現代的世界第一有意義的運動。
樂山園消息。
樂山園教會佇受難日的禮拜有獻100箍欲幫贊國內艱苦的人。真感謝。淡水教會的一位來禮拜的人，佇錢盤獻10箍；寫講是欲幫贊樂山園。