世界消息：別國教會
Sè-kài Siau-sit:Pa̍t kok kàu-hoē
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第785號 |
| 日期 | 1954/5 |
| 頁數 | 11 |
白話字（原文數位化）
SÈ-KÀI SIAU-SIT
- 05, no. 785, pp. 11-13
(1) Eng-kok Sèng-keng-hoē.
Chiàu chit ê hoē ê pò-kò, kū-nî 1953 nî sī chin hó ê nî. Chit ê Sèng-keng-hoē ū ēng chin-choē khoán oân-choân iáu m̄-bat choè jī lâi siá ê khiuⁿ-kháu ìn Sèng-keng. Tī A-hui-lī-ka 12 khoán, Lâm A-bí-lī-ka 3 khoán, A-sè-a 15 khoán, Lâm-iûⁿ 13 khoán.
(2) Suī-se kok.
Tī kok-lāi chi̍t séng ê kàu-hoē ê tāi-hoē kūn-lâi chū-chi̍p ê sî, ū tit-tio̍h Karl Barth Sîn-ha̍k Phok-sū ê chí-tō káng-ián. I ê toê-ba̍k sī koan-hē kin-nî beh chū-chi̍p tī Bí-kok Phó͘-sè kàu-hoē tē-jī Chóng-hoē só͘ beh tú-tio̍h ê būn-toê. I kóng, chiàu i khoàⁿ, hit ê hoē khoàⁿ hiān-tāi ê sù-bēng tuì chi̍t hong-bīn tio̍h tuì Sèng-keng só͘ ū ê kà-sī kóng. iā koh chi̍t hong-bīn tio̍h khoàⁿ hiān-sè ê lâng só͘ oē hiáu thiàⁿ ê oē-gú lâi kóng. I mn̄g kóng, Ū ǹg-bāng bô? ìn kóng, Ū, ǹg-bāng sī tī Iâ-so͘ Ki-tok. In-uī tī Ki-tok só͘ ū ê ǹg-bāng ū khah chìn-pō͘ ê só͘-chāi. Sè-kài ê lâng ū toā ǹg-bāng: Tī bîn-chú ū ǹg-bāng, tī kho-ha̍k ū ǹg-bāng, tī kok-ka ū ǹg-bāng, tī kū chong-kàu ū ǹg-bāng; chóng-sī chiah ê lóng sī hó͘-tēng kap lîm-sî--ê.
(3) Tiâu-sián.
Hiān-sî tī Tiâu-sián kàu-hoē sui-jiân tú-tio̍h le̍k-sú m̄-bat ū ê kan-khó͘, iáu-kú ū teh toā chìn-pō͘. Phì-jū lâi kóng, Taegu chhī chiàn-cheng chêng ū sin-kàu pài-tn̂g 7 keng, 1947 nî ū 17 keng, 1952 nî ū 60 keng, kin-nî chiaⁿ-ge̍h chhoe-it ū 104 keng. Hit ê to͘-chhī sī khah bô Tāi-pak ê jîn-sò͘ hiah choē.
(4) Bông-à-hoē
Kūn-lâi chin chhut-miâ ê chhiⁿ-mî lâng Mr.Bo͘lter ū lâi Tâi-oân thàm lâm-pak bông-à ha̍k-hāu. I sī Eng-kok siū ko-téng kàu-io̍k ê chheng-liân lâng. Tī tē-jī chhù chiàn-cheng siū siong chhiⁿ-mî. I khí-thâu chin sit-bāng, āu-lâi tuì tō-lí kám-kak toā sù-bēng, ài pang-chān pa̍t ê chhiⁿ-mî lâng. hiān-sî tiàm tī New York (紐約) choè sè-kài Bông-à-hoē ê chóng-kàn-sū. Koan-hē chit ê sū, kūn-lâi khoàⁿ chit ê hoē ê pò-kò kóng, ū chi̍t uī chheng-liân cha-bó͘ lâng, ba̍k-chiu ū guî-hiám ê pīⁿ. I-seng kā i kóng, koh kuí ge̍h-ji̍t i oē chhiⁿ-mî, bô hoat-tō͘ thang tî-hông. Só͘-í i koáⁿ-kín àm-kì 500 chat ê Sèng-keng, kóng i chhiⁿ-mî ê sî ài thoân Chú ê hok-im, só͘-í khiàm-ēng 500 chat thang choè hó ê toê-ba̍k.
漢羅（Ùi原文改寫）
世界消息
- 05, no. 785, pp. 11-13
(1)英國聖經會。
照這个會的報告，舊年1953年是真好的年。這个聖經會有用真濟款完全猶毋捌做字來寫的腔口印聖經。佇亞非利加12款，南亞美利加3款，亞細亞15款，南洋13款。
(2)瑞西國。
佇國內一省的教會的大會近來聚集的時，有得著 Karl Barth神學博士的指導講演。伊的題目是關係今年欲聚集佇美國普世教會第二總會所欲拄著的問題。伊講，照伊看，彼个會看現代的使命對一方面著對聖經所有的教示講。也閣一方面著看現世的人所會曉疼的話語來講。伊問講，有向望無？應講，有，向望是佇耶穌基督。因為佇基督所有的向望有較進步的所在。世界的人有大向望：佇民主有向望，佇科學有向望，佇國家有向望，佇舊宗教有向望；總是遮的攏是否定佮臨時時--的。
(3)朝鮮。
現時佇朝鮮教會雖然拄著歷史毋捌有的艱苦，猶過有teh大進步。譬喻來講，Taegu市戰爭前有新教拜堂7間，1947年有17間，1952年有60間，今年正月初一有104間。彼个都市是較無台北的人數遐濟。
(4) 盲啞會
近來真出名的青暝人Mr. Bo͘lter有來台灣探南北盲啞學校。伊是英國受高等教育的青年人。佇第二次戰爭受傷青暝。伊起頭真失望，後來對道理感覺大使命，幫贊別的青暝人。現時踮佇New York (紐約)做世界盲啞會的總幹事。關係這个事，近來看這个會的報告講，有一位青年查某人，目睭有危險的病。醫生共伊講，閣幾月日伊會青暝，無法度通持防。所以伊趕緊暗記500節的聖經，講伊青暝的時愛傳主的福音，所以欠用500節通做好的題目。