上帝是疼
Siōng-tè sī thiàⁿ
文獻資訊
| 項目 | 資料 |
|---|---|
| 作者 | 陳溪圳 Tân Khe-chùn |
| 卷期 | 台灣教會公報 |
| 卷期 | 第785卷 |
| 日期 | 1954/5 |
| 頁數 | 9 |
白話字（原文數位化）
Siōng-tè sī thiàⁿ
(Bo̍k-su: Tân Khoe-chùn).
- 05, no. 785, pp. 9
Chong-kàu sī teh lūn-khí Sîn kap lâng ê koan-hē, iā hit ê koan-hē sī sím-mi̍h khoán lâi koat-tēng. Koh hit ê chong-kàu ê kàu-gī iā sī kun-kù tī sìn Siōng-tè sī sím-mi̍h ê sìn-gióng chhut-lâi ê; só͘-í Sîn ê kàu-gī nā chhò, só͘ ū ê kàu-gī chiū chhò, Sîn ê kàu-gī nā tuì, chiū só͘ ū ê kàu-gī sī chin. Nā-sī lán só͘ sìn ê Sîn sī to̍k-it ê Chú-cháiⁿ, choân-lêng, choân-tì, chì-sèng, kong-gī, thiàⁿ-thàng ê Thiⁿ-pē.
Thiàⁿ ê khài-liām sī chiàm Ki-tok-kàu choân-thé, á-sī Sèng-keng choân-pō͘ ê tiong-sim tē-uī. Sèng-keng kóng, “Hiān-kim só͘ chûn saⁿ-hāng kî-tiong tē-it toā ê sī jîn-ài.” Koh kóng, “Bô thiàⁿ ê m̄-bat Siōng-tè, in-uī Siōng-tè sī thiàⁿ.” Chóng-sī chit ê thiàⁿ (性愛), á-sī jio̍k-chhin-tek ê thiàⁿ (情愛), á-sī hit khoán siā-hoē-tek ê thiàⁿ (友愛). “Siōng-tè sī thiàⁿ,” sī sio̍k tī chong-kàu-tek, sèng-gī-tek, pau-hâm sîn-sèng kong-gī ê thiàⁿ. Si̍t-chāi bô oē thang soat-bêng, chí-ū chiàu Sèng-keng só͘ kóng, “Bô thiàⁿ ê m̄-bat Siōng-tè, in-uī Siōng-tè sī thiàⁿ. Siōng-tè chhe I to̍k-siⁿ ê Kiáⁿ ji̍p sè-kan, hō͘ lán tuì I lâi oa̍h, Siōng-tè ê thiàⁿ tuì chit ê hián-bêng tī lán, m̄-sī lán bat thiàⁿ Siōng-tè, sī I bat thiàⁿ lán, chhe I ê Kiáⁿ uī-tio̍h lán choè bán-hoê ê chè. Thiàⁿ chiū-sī chāi-tī chit ê ê.” Só͘-í Siōng-tè ê thiàⁿ chiū-sī Ki-tok-tek ê thiàⁿ, si̍p-jī-kè-tek, sio̍k-choē-tek ê thiàⁿ. Chì-sèng kong-gī ê Siōng-tè tuì Chú Iâ-so͘ só͘ khé-sī lán ê, chiū-sī chhin-kūn jîn-luī ê Thiⁿ-pē, thiàⁿ-thàng ê Siōng-tè, sī chhin-chhiūⁿ pàng-hē 99 chiah lâi chhē hit chiah phah sit-lo̍h ê, kap hoaⁿ-hí chiap-la̍p hòng-tōng kiáⁿ tò-tńg--lâi ê Pē. Che chiū-sī Ki-tok ê hok-im.
(Thāi-sio̍k).
漢羅（Ùi原文改寫）
上帝是疼
（牧師：Tân Khoe-chùn）
- 05, no. 785, pp. 9
宗教是teh論起神佮人的關係，也彼个關係是甚物款來決定。閣彼个宗教的教義也是根據佇信上帝是甚物的信仰出來的；所以神的教義若錯，所有的教義就錯，神的教義若對，就所有ê教義是真。若是咱所信的神是獨一的主宰，全能，全智，至聖，公義，疼痛的天父。
疼的概念是佔基督教全體，á是聖經全部的中心地位。聖經講，「現今所存三項其中第一大的是仁愛。」閣講，「無疼的毋捌上帝，因為上帝是疼。」總是這个疼(性愛)，á是肉親的的疼(情愛)，á是彼款社會的的疼(友愛)。「上帝是疼，」是屬佇宗教的，聖義的，包含神聖公義的疼。實在無話通說明，只有照聖經所講，「無疼的毋捌上帝，因為上帝是疼。上帝差伊獨生的囝入世間，予咱對伊來活，上帝的疼對這个顯明佇咱，毋是咱捌疼上帝，是伊捌疼咱，差伊的囝為著咱做挽回的祭。疼就是在佇這个的。」所以上帝的疼就是基督的的疼，十字架的，贖罪的的疼。至聖公義的上帝對主耶穌所啟示咱的，就是親近人類的天父，疼痛的上帝，是親像放下99隻來揣彼隻拍失落的，佮歡喜接納放蕩囝倒轉--來的父。這就是基督的福音。
(待續)。