長老會青年聯誼所
Tiúⁿ-ló-hoē Chheng-liân Liân-gî-só͘
文獻資訊
| 項目 | 資料 |
|---|---|
| 作者 | 莊丁昌 Chng Teng-chhiong |
| 卷期 | 台灣教會公報 |
| 卷期 | 第784卷 |
| 日期 | 1954/4 |
| 頁數 | 11 |
白話字（原文數位化）
Tiúⁿ-ló-hoē Chheng-liân Liân-gî-só͘
1954.04 784 hō p.11
(Chng Teng-chhiong)
Kong-ho̍k āu tī Tâi-pak ū choē-choē kàu-phài lâi choè kang, tiong-kan ū Lâm Bí, Pak Bí ê Tiúⁿ-ló-hoē, in ka-kī bô siat kàu-hoē, sī kap lán saⁿ-kap choè kang. Tiong-kan ū kuí-nā uī tī Tâi-pak siat chi̍t keng “Ki-tok-kàu Tiúⁿ-ló-hoē Liân-gî-só͘, (Friendship Corner). Tī kū-nî 10 ge̍h, ū tī Tâi-oân Toā-o̍h sin-piⁿ khí chi̍t keng hoē-só͘. Ū Eng-gú cha-keng, Eng-gú hoē-oē (tām-lūn(sic.) tō-lí), ū ūn-tōng siat-pī. goân-lâi sī uī-tio̍h Tâi-oân Toā-o̍h ê ha̍k-seng siat--ê, chóng-sī iā chin hoan-gêng kî-thaⁿ ê toā-choan ha̍k-seng lâi chham-ka.
Choè-kūn ū kak-tek chin choē tuì kok tē-hng lâi ê hoē-iú ha̍k-seng, khì tī pa̍t kàu-phài chham-ka Eng-gú cha-keng, á-sī Eng-gú lé-pài, tì-kàu ū-sî sìn-gióng iô-tāng, pún-só͘ ū siūⁿ koh khah tio̍h chek-ke̍k-tek pang-chān hiah ê Ki-tok-tô͘ ha̍k-seng, ū beh ka-kiông choè kang, iā beh sin siat Eng-gú lé-pài, chin ǹg-bāng kok-uī saⁿ-thoè kî-tó kap hia̍p-le̍k.
-
Chhiáⁿ lán thong-ti hoē-iú chai, ū lán Tiúⁿ-ló-hoē Liân-gî-só͘ ê kang-chok.
-
Chhiáⁿ lán thong-ti chhut-goā tī Tâi-pak ê ha̍k-seng chai, pún-só͘ ū Eng-gú cha-keng kap Eng-gú lé-pài, soà lâi chham-ka tit-tio̍h lī-ek.
-
Koh chhiáⁿ lán nā oē chiong lín chhut-goā ê ha̍k-seng, pò goán chai in ê chū-só͘ sìⁿ-miâ hō͘ in chai, ìn oē siá-phoe khì chhiáⁿ in lâi, che iā-sī chin hó.
Hiān-sî ū Lâm Bí ê Hái Bo̍k-su, Bo̍k-su-niû (Rev and Mrs E. H. Hamilton), koh ū Song Kàu-su (Miss M. Selle) teh chò kang. Thong-sìn chhiáⁿ siá. 台北市温州街九六巷四號基督敎長老會青年聯誼所海侔登牧師収. (Chng Teng-chhiong).
漢羅（Ùi原文改寫）
長老會青年聯誼所
1954.04 784 hō p.11
(莊丁昌)
光復後佇台北有濟濟教派來做工，中間有南美，北美的長老會，in家己無設教會，是佮咱相佮做工。中間有幾若位佇台北設一間「基督教長老會聯誼所，(Friendship Corner)。佇舊年10月，有佇台灣大學身邊起一間會所。有英語查經，英語會話(談論道理)，有運動設備。原來是為著台灣大學的學生設--的，總是也真歡迎其他的大專學生來參加。
最近有角的真濟對國地方來的會友學生，去佇別教派參加英語查經，á是英語禮拜，致到有時信仰搖動，本-所有想閣較著積極的幫贊遐的基督徒學生，有欲加強做工，也欲新設英語禮拜，真向望各位相替祈禱佮協力。
1.請咱通知會友知，有咱長老會聯誼所的工作。
2.請咱通知出外佇台北的學生知，本所有英語查經佮英語禮拜，紲來參加得著利益。
3.閣請咱若會將恁出外的學生，報阮知in的住所姓名予in知，ìn會寫批去請in來，這也是真好。
現時有南美的海牧師，牧師娘(Rev and Mrs E. H. Hamilton)，閣有Song教師(Miss M. Selle) teh做工。通訊請寫。台北市温州街九六巷四號基督敎長老會青年聯誼所海侔登牧師収。(Chng Teng-chhiong)。