東門教會葬
Tang-mn̂g Kàu-hoē-chòng.
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第784卷 |
| 日期 | 1954/4 |
| 頁數 | 16 |
白話字（原文數位化）
Tang-mn̂g Kàu-hoē-chòng.
- 04, no. 784, pp. 16-17
Kàu-kài ê goân-ló, kò͘ Tēⁿ Tek-hô Tiúⁿ-ló tī 1 goe̍h 4 ji̍t, chāi Tang-mn̂g kàu-hoē chú-lí kî-tó-hoē tiong hoat-pīⁿ (náu-ek-hoeh), sui-jiân liâu-ióng 3 lé-pài kú, iáu-kú Siōng-tè ê chí-ì chiâⁿ, tī 24 ji̍t lé-pài ē-po͘ 6 tiám 30 hun pia̍t-sè. uī-tio̍h tán-hāu tī Thài-kok (泰國) hêng-I ê tē 3 kong-chú hoê-kok, kàu tī 3 goe̍h 12 ji̍t ē-po͘ 2 tiám, tī Tang-mn̂g kàu-hoē kú-hêng chòng-sek. Tân Huī-chhiong Bo̍k-su su-sek, N̂g Bú-tong Bo̍k-su chú-lí, ēng “Tiông-seng put-hiú(長生不朽) ê tê káng-tō, lâi kú-hêng hui-siông giâm-siok ê tián-lé. Tuì N̂g Bo̍k-su ê káng-tō, kàu tī kok kàu-hoē, kok ki-koan tāi-piáu ê tiàu-sû to͘ kóng-khí Tēⁿ Tiúⁿ-ló siⁿ-chêng tī ka-têng, kàu-hoē, siā-hoē, i ê sìn-gióng seng-oa̍h, i ê tek-hēng, i ê chò lâng, ū hō͘ iok 500 miâ ê hoē-chòng-chiá tit-tio̍h toā kám-kek, bô-m̄ lâu m̄-kam ê ba̍k-sái.
iā tong-ji̍t lâm tuì Thài-kok (泰國), pak tuì Ji̍t-pún í-ki̍p tó-lāi ū chē-chē tiàu-tiān lâi saⁿ-kap m̄-kam. Saⁿ-tiám poàⁿ lé-sêng, chhut-soaⁿ ê sî ū chiàu kò͘ Tēⁿ Tiúⁿ-ló ê uî-giân, lóng bô ēng ga̍k-tuī kap sím-mi̍h chng-thāⁿ, sī chin-chiàⁿ giâm-siok ê chòng-sek.
Kò͘ Tēⁿ Tiúⁿ-ló hióng-siū 70 hoè, ū seⁿ 5 lâm 3 lú, i tui Tiông-êng Tiong-o̍h pit-gia̍p, chiū toè lāu Lân I-seng gián-kiù i-su̍t, chiū hêng-i kàu pia̍t-sè. I it-seng tī kàu-hoē chīn-tiong chò kang, cha̍p-goā nî kú tam-tng Chú-ji̍t-o̍h, thâu-boé 40 nî kú tam-tng chip-sū, tiúⁿ-ló ê chit, iā sī hiān-jīm Tang-mn̂g kàu-hoē ê tiúⁿ-ló, thang kóng i ê pia̍t-sè sī hō͘ lán kàu-hoē sit-liáu chi̍t-uī pó-poè ê jîn-bu̍t. I seⁿ-chêng só͘ ài gîm ê si, sī 105 siú. Goān Chú an-uì kap chiàu-kò͘ i ê uî-cho̍k, hō͘ in lóng toè i ê kha-pō͘ lâi êng-kng Siōng-tè ê sèng-miâ.
(Chhî Io̍k-lîn pò).
漢羅（Ùi原文改寫）
東門教會葬
- 04, no. 784, pp. 16-17
教界的元老，故鄭德和長老佇1月4日，在東門教會主理祈禱會中發病（腦溢血），雖然療養3禮拜久，猶過上帝的旨意成，佇24日禮拜下晡6點30分別世。為著等候佇泰國行醫的第3公子回國，到佇3月12日下晡2點，佇東門教會舉行葬式。陳Huī-chhiong牧師司式，黃Bú-tong牧師主理，用「長生不朽」的題講道，來舉行非常嚴肅的典禮。對黃牧師的講道，到佇各教會，各機關代表的弔辭都講起鄭長老生前佇家庭、教會、社會，伊的信仰生活，伊的德行，伊的做人,有予約500名的會葬者得著大感激,無毋流毋甘的目屎。
也當日南對泰國，北對日本以及島內有濟濟弔電來saⁿ-kap毋甘。三點半禮成，出山的時有照故鄭長老的遺言，攏無用樂隊佮甚物裝thāⁿ，是真正嚴肅的葬式。
故鄭長老享壽70歲，有生5男3女，伊對長榮中學畢業，就綴老蘭醫生研究醫術，就行醫到別世。伊一生佇教會盡忠做工，十外年久擔當主日學，頭尾40年久擔當執行，長老的職，也是現今東門教會的長老，通講伊的別世是予咱教會失了一位寶貝的人物。伊生前所愛吟的詩，是105首。願主安慰佮照顧伊的遺族，予in攏綴伊的跤步來榮光上帝的聖名.
(徐Io̍k-lîn報)。