北中：牧師解任式
Pak Tiong: Bo̍k-su kái-jīm-sek
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第784號 |
| 日期 | 1954/4 |
| 頁數 | 11 |
白話字（原文數位化）
PAK TIONG
II. Bo̍k-su kái-jīm-sek.
- 04, no. 784, pp. 11-13
In-uī lán tī kàu-hoē chhiáⁿ bo̍k-su sī chin hoaⁿ-hí koh nāu-jia̍t, chóng-sī bo̍k-su lī-Jīm lóng án-ni tiām-tiām lī-khui, chit-pang ū kú-hêng bo̍k-su ê kái-jīm tián-lé, ì-sù ia̍h sī hoaⁿ-hí i lī-khui.
Sin-tiàm kàu-hoē bo̍k-su kái-jīm tián-lé, tī 3 goe̍h 15 ji̍t siōng-ngó͘ 10 tiám ū kú-hêng, hù-hoē-chiá iā put-chí choē. Tiong-hoē Gī-tiúⁿ Tiuⁿ Khun-oán Bo̍k-su chhoā chèng-lâng khui-hoē, ū tit-tio̍h Pak Tāi Gī-tiúⁿ Tân Khoe-chùn Bo̍k-su ê siōng-sû (頌詞), ia̍h ū iú-chì-chiá ê chiok-sû, jiân-āu ū Koeh Chuí-lêng Bo̍k-su ê lī-jīm-sû. Chit chūn tām-po̍h lâi kài-siāu lán kàu-hoē ê lāu chiong-kun, iā-sī lāu goân-ló ê thoân-kàu seng-oa̍h.
Koeh Chuí-lêng Bo̍k-su bo̍k-hoē ê kang kàu kin-nî ê 7 goe̍h, chiū moá 54 nî, sī thang kóng Tâi-oân kàu-hoē-sú-siōng hán-iú--ê, hit tiong-kan lóng bô chi̍h-chām kè-sio̍k kàu kin-ná-ji̍t, i ū nn̄g ê tông-kî ê bo̍k-su, hiān-sî iáu tī-teh, iáu teh choè kang, koh chi̍t hong-bīn, chit 3 uī bo̍k-su ê bo̍k-su-niû iū-goân(sic.) lóng iáu kiān-khong, lâi gâu pang-chān in ê kang.
Sin-tiàm kàu-hoē lé-pài-tn̂g (hiān-sî--ê), sī 32 nî chêng, tī i ê chhiú lâi khí--ê. I khí chit keng pài-tn̂g, sī ū toā ê tōng-ki, 32 nî goā chêng, Sin-tiàm tú-tio̍h toā-chuí, pài-tn̂g siū lâu, hit-sî i tī sim-lāi án-ni kóng, tek-khak beh uī-tio̍h Siōng-tè lâi khí pài-tn̂g, só͘-í kó-jiân si̍t-hiān, hiān-kim lán só͘ bat ê pài-tn̂g, sī khí tī put-chí kian-kò͘ ê tē-ki téng (tē-ki sī chio̍h), lóng boē iô-tāng, kéng-tì hó (tī poàⁿ-soaⁿ nih), khong-khì hó, sok-chēng bô kiáu-jiáu, chin ha̍h tī kàu-hoē ê lō͘-ēng. I choè kang (choè bo̍k-su), sī tī chit keng Sin-tiàm kàu-hoē, tiong chām ū uī-tio̍h Tè Jîn-siū I-seng beh khí Tām-chuí Pat-lí-hun ê Thái-ko pīⁿ-īⁿ ê iân-kò͘, ū khì siat-hoat chit ê kang, hiah ê pīⁿ-tòng kiàn-bu̍t ê it-chhè lóng sī i lâi siat-hoat, uī-tio̍h chiah ê siū lâng só͘ boē kì-tit ê khó-lîn lâng lâi choè chiah ê kang, sī m̄-sī sió-khoá sū, hit tiong-kan Sin-tiàm ū phèng-chhiáⁿ kuí-nā uī bo̍k-su, kàu kong-ho̍k liáu-āu Sin-tiàm kàu-hoē bô bo̍k-su, ta̍k lâng siàu-liām chit uī lāu bo̍k-su, iû-goân koh phèng i choè bo̍k-su, che sī tē 2 pái tī Sin-tiàm kàu-hoē bo̍k-su kàu kin-ná-ji̍t.
I só͘ toà ê kàu-hoē bô loā-chē uī, tû-khí(sic.) Ngāu-san-oân í-goā, to sī tī Sin-tiàm kàu-hoē. I ū the̍h-chhut sî-chit, ta̍k lâng chin m̄-kam, chóng-sī nî-hoè put-chí chē, ia̍h sī ko͘-put-chiong, án-ni i ū choè kang 54 nî kú, thang kóng sī í-keng cheng-chiàn hó ê cheng-chiàn, í-keng chīn pháu-cháu ê lō͘-chām. Sin-tiàm kàu-hoē kap i ū koah ia̍h koah boē tn̄g ê iân-kò͘, iû-goân ài i choè chit ê kàu-hoē ê chú-lâng. Sui-bóng tuì kong, tuì goā, ti̍t-chiap í-keng bô ū kan-sia̍p kàu-hoē. Sin-tiàm kàu-hoē ū the̍h-chhut chit ê gī-àn, lâi chhiok-chìn kàu-hoē kap kàu-hoē goân-ló ê iú-ki-tek kau-poê. “Hoān-nā choè kang moá 50 nî í-siōng ê bo̍k-su, tī kai-sio̍k ê Sió-hoē choè Sió-hoē ê chiàⁿ sió-hoē-oân, kai-sio̍k Tiong-hoē ê chiàⁿ gī-oân, kai-sio̍k Tāi-hoē ê chiàⁿ gī-oân.” ēng chit ê àn beh kiàn-gī Tiong-hoē, Tāi-hoē, kàu Chóng-hoē.
漢羅（Ùi原文改寫）
北中
II.牧師解任式。
1954.04，no.784，pp.11-13
因為咱佇教會請牧師是真歡喜閣鬧熱，總是牧師離任攏按呢恬恬離開，這pang有舉行牧師的解任典禮，意思亦是歡喜伊離開。
新店教會牧師解任典禮，佇3月15日上午10點有舉行，赴會者也不止濟。中會議長張Khun-oán牧師chhoā眾人開會，有得著北大議長陳Khoe-chùn牧師的頌詞，亦有有志者的祝詞，然後有郭水龍牧師的離任詞。這陣淡薄來介紹咱教會的老將軍，也是老元老的傳教生活。
郭水龍牧師牧會的工到今年的7月，就滿54年，是通講台灣教會史上 罕有--的，彼中間攏無折chām繼續到今仔日，伊有兩个同期的牧師，現時猶佇teh，猶teh做工，閣一方面，這3位牧師的牧師娘猶原攏猶健康，來gâu幫贊in的工。
新店教會禮拜堂(現時--的)，是32年前，佇伊的手來起--的。伊起這間拜堂，是有大的動機，32年外前，新店拄著大水，拜堂受流，彼時伊佇心內按呢講，的確欲為著上帝來起拜堂，所以果然實現，現今咱所捌的拜堂，是起佇不止堅固的地基等(地基是石)，攏未搖動，景緻好(佇半山裡)，空氣好，肅靜無攪擾，真合佇教會的路用。伊做工(做牧師)，是佇這間新店教會，中chām有為著綴仁壽醫生欲起淡水八里岔的Thái-ko病院的緣故，有去設法這个工，遐的病棟建物的一切攏是伊來設法，為著遮的受人所袂記得的可憐人來做遮的工，是毋是小可事，彼中間新店有聘請幾若位牧師，到光復了後新店教會無牧師，逐人數念這位老牧師，猶原閣聘伊做牧師，這是第2擺佇新店教會牧師到今仔日。
伊所蹛的教會無偌濟位，除去樂山園以外，都是佇新店教會。伊有提出辭職，逐人真毋甘，總是年歲不止濟，亦是孤不將，按呢伊有做工54年久，通講是已經爭戰好的爭戰，已經盡跑走的路站。新店教會佮伊有割亦割未斷的緣故，猶原愛伊做這个教會的主人。雖罔對公，對外，直接已經無有干涉教會。新店教會有提出這个議案，來促進教會佮教會元老的有機的交陪。「凡若做工滿50年以上的牧師，佇該屬的小會做小會的正小會員，該屬中會的正議員，該屬大會的正議員。」用這个案欲建議中會，大會，到總會。