感謝上帝

Kàm-siāSiōng-tè

文獻資訊

項目	資料
作者	陳添旺 Tân Thiam-ōng
卷期	台灣教會公報
卷期	第782號
日期	1954/2
頁數	26

白話字（原文數位化）

Kám-siā Siōng-tè
(Tân Thiam-ōng)
1954. 02, no. 782, pp. 26-28
Tuì kū-nî sin-le̍k 11:12－12:16 hō, uī hóng-būn kàu-hoē, chhin-chhek, pêng-iú, ū kàu tang-pō͘. Ū choē-choē kám-siā Siōng-tè ê só͘-chāi; siá kuí-jī êng-kng Chú.
(1) Cha̍p-it ge̍h 12 ji̍t kàu Suī-hong, chhē chi̍t uī goā-séng chí-bē kap tiōng-hu, kiáⁿ-jî. Hit àm tâm-lūn tō-lí kàu 11 tiám goā. Ū siá phoe thok Iûⁿ Chiong Sian-siⁿ chio-ho͘ i, soà thoè in kî-tó.
(2) Lô-tong hioh nn̄g àm, pài-gō͘ hō͘ in lâu kàu lé-pài chá-khí káng-tō. Siū Tân Ngó͘-hok Sian-siⁿ kap Sian-siⁿ-niû hó khoán-thāi, sàng lú-huì; chin kám-siā. Lô-tong chū siat-kàu thâu-pái ū khí pài-tn̂g, siat-tì chin hó-sè, iā ū Chú-ji̍t-o̍h kàu-sek. Tân iāu-chong Bo̍k-su tī hia chú-chhî; hoē-iú chheng i jîn-keh-chiá.
(3) So͘-ò, Lâm-hong-ò, tâng sio̍k chi̍t uī kàu-hoē; thiaⁿ kóng ū sîn-jiah chin-choē, ū 20 goā hō͘ hoē-iú, Lâm-hong-ò ū 10 goā hō͘. Ū sî lia̍h-hî chûn tuì goā-uī lâi, bô uī hó lé-pài, só͘-í Lîm Eńg-choâⁿ Tiúⁿ-ló khí chi̍t keng hō͘ in chū-chi̍p. Chô Thiam-ōng Sian-siⁿ tī hia oa̍h-tāng.
(4) Hoe-liân chhī, kàu-hoē chìn-pō͘; 4 nî chêng goá khì ê sî chi̍t keng, taⁿ ū Hoe-liân, Sìn-gī, Bí-lūn 3 keng. Cha̍p-it ge̍h 21 àm, tī goá sió-tī Tân Chheng-gím ê ke, ū kú-hêng i kap hū-jîn-lâng 70 hè, kiat-hun 50 nî kám-siā lé-pài. I ū 5 kiáⁿ, 5 sim-pū, 3 cha-bó͘-kiáⁿ, 3 kiáⁿ-sài; lāi-sun 23 ê, goā-sun 10 ê, goā ka-ná-sun 4 ê. Goán ê cho̍k-chhin bē bat ū án-ni.
Jī-jī hō lé-pài chá-khí tī Sìn-gī kàu-hoē lé-pài chú-lí. Pêng-sî ū 120 chó-iū lé-pài; iù-tī-hn̂g ū 160 miâ. Hit àm tī Hoe-liân kàu-hoē lé-pài, iā 120 lâng í-siōng. Cha̍p-jī ge̍h 13 hō tī Hoe-liân kàu-hoē, ū 350 goā lâng. Hit ē-po͘ ū khì Siū-hong pò͘-kàu-só͘; hit àm koh lâi Hoe-liân lé-pài, pah-goā miâ; iù-tī-hn̂g 170 miâ. Hoe-liân Tân Suī-san, Sìn-gī Oân Hù-lâi, Bí-lūn Gô͘ Thian-sù, 3 uī bo̍k-su teh chú-chhî. Bí-lūn ū 80 miâ chū-hoē, pài-tn̂g lāi-bīn ê piah bē chiâu hó, khiàm keng-huì. Nā ū thiàⁿ Chú ê hiaⁿ-chí, chhiáⁿ kā in tàu oān-chō͘, lâi oân-sêng chin hó ê kang.
(5) Tî-siōng kàu-hoē sin pài-tn̂g oē iông-ún 300 chó-iū lâng. Pêng-sî ū 60 chó-iū lé-pài. Goá 29 hō tī hia lé-pài. Hoê-sióng 20 goā nî chêng, goá khì Sin-khui-hn̂g Chhoà En̂g-hoâ Tiúⁿ-ló ê chhù khai-sí lé-pài, āu-lâi soá lâi Tî-siōng, chiū chhiáⁿ bo̍k-su. Taⁿ khí chi̍t keng sin pài-tn̂g, khai 7 bān goā kho͘; tī 12 goe̍h 23 hō hiàn-tn̂g kiam chiok Sèng-tàn. Hiān-chāi N̂g Se-chhoan Sian-siⁿ tī hia teh oa̍h-tāng. Goá ū chi̍t ê goā-sun 8 hè tī hia, i the̍h hō͘ goá boé chia̍h. Sui-bóng sī sió sū, hián-bêng gín-ná ê khiām-iok, ū hàu-sim ê kà-sī.
(6) Tâi-tang kàu-hoē oa̍h-tāng, 12 goe̍h 6 hō, goá tī hia lé-pài; pêng-sò͘ oá 200 lâng chhut-se̍k, pài-tn̂g teh siuⁿ oe̍h. In ū siat chū-iû cha̍p-hūn-chi̍t ê hiàn-kim, muí-ge̍h thâu lé-pài ēng tē-á toé lâi hē tī tâi-téng; chi̍t lé-pài siu 1,000 goā kho͘. Hoe-liân sī 3 kò-ge̍h hiàn chi̍t pái. Lo̍h Bo̍k-su ê kang-chok, tì-ì kiàn-siat, i só͘ sûn-sī ê kàu-hoē tiong ū 4,000 goā ê A-mi cho̍k teh lé-pài. Tâi-tang kàu-hoē sī Un Bo̍k-su teh chú-chhî.
(7) Hù-lí kàu-hoē ū khí chi̍t keng sin pài-tn̂g, choân-pō͘ thih-kun khòng-ku-lí, khai oá 20 bān, oē iông-ún-tit 3, 4 pah lâng, chi̍t ki thah 3 chàn, ū chi̍t ê kńg-lê-thui, chin sim-sek. Chit pang khí pài-tn̂g ê sî, thiaⁿ kóng, chi̍t hō͘ pêng-kun hiàn 3,000 kho͘, chin thang kám-sim. Hiān-sî Tè Hé-goân Sian-Siⁿ teh oa̍h-tāng.
(8) Tāi-lí (大庄) kàu-hoē-tn̂g, toā toē-tāng ū hāi--khì, taⁿ lóng siu-lí hó-sè, ū 200 chó-iū teh lé-pài. Hiān-sî Tiuⁿ Hûn-gím Sian-siⁿ (Tân Bîn-chàn Sian-siⁿ khoài-sài) teh chú-chhî. In tit-tio̍h Siōng-tè siúⁿ-sù in siang-siⁿ kiáⁿ, kiû Chú chiok-hok.
(9) Cha̍p-jī ge̍h 11 àm, beh tńg-lâi Gio̍k-lí hù kî-tó-hoē, chin hok-khì, tú ū Soaⁿ-tē thoân-tō i-liâu-thoân lâi chiò hoàn-teng, (siá kuí-hāng).
1. Hiān-sî Soaⁿ-tē ê pài-tn̂g ū 200 keng.
2. Ū chi̍t keng oē iông-ún 1000 lâng, lán pîⁿ-toē káⁿ bô.
3. Chi̍t ê lāu-pô 80 hè, chhē bô oa̍h-lō͘, thiaⁿ Iâ-so͘ ê tō-lí, chiū koat-sim sìn.
4. Nn̄g chí-bē, iáu siàu-liân m̄ khéng sìn, in-uī sió-bē kiat-hun siⁿ-kiáⁿ soà sí; a-ché chiū kín sìn Chú.
5. Hoat-kok lâng chhut miâ chia̍h hun-chiú, kóng 90 lâng ū chi̍t keng chiú-ka, só͘-í in ê jîn-teng ti̍t kiám-chió.
Taⁿ chit pái kàu tang-pō͘, siū kàu-hoē, pêng-iú, chhin-lâng, iú-hêng, bô-hêng ê pang-chān, chin kám-siā. Cha̍p-jī ge̍h 16 ji̍t chē hui-ki pêng-an kàu chhù. Kám-siā Siōng-tè.

漢羅（Ùi原文改寫）

感謝上帝
(陳添旺)
1954.02，no.782，pp.26-28
對舊年新曆11：12－12：16號，為訪問教會，親戚，朋友，有到東部。有濟濟感謝上帝的所在；寫幾字榮光主。
(1)十一月12日到瑞芳，揣一位外省姊妹佮丈夫，囝兒。彼暗談論道理到11點外。有寫批託楊Chiong先生招呼伊，紲替in祈禱。
(2)羅東歇兩暗，拜五予in留到禮拜早起講道。受陳五福先生佮先生娘好款待，送旅費；真感謝。羅東自設教頭擺有起拜堂，設置真好勢，也有主日學教室。陳耀宗牧師佇遐主持；會友稱伊人格者。
(3)蘇澳，南方澳，同屬一位教會；聽講有神跡真濟，有20外戶會友，南方澳有10外戶。有時掠魚船對外位來，無位好禮拜，所以林永泉長老起一間予in聚集。Chô Thiam-ōng先生佇遐活動。
(4)花蓮市，教會進步；4年前我去的時一間，今有花連，信義，美崙3間。十一月21暗，佇我小弟Tân Chheng-gím的家，有舉行伊佮婦人人70歲，結婚50年感謝禮拜。伊有5囝，5新婦，3查某囝，3囝婿；內孫23个，外孫10个，外ka-ná孫4个。阮的族親未捌有按呢。
二二號禮拜早起佇信義教會禮拜主理。平時有120左右禮拜；幼稚園有160名。彼暗佇花蓮教會禮拜，也120人以上。十二月13號佇花蓮教會，有350外人。彼下晡有去壽豐佈教所；彼暗閣來花蓮禮拜，百外名；幼稚園170名。花蓮Tân Suī-san，信義Oân Hù-lâi，美崙Gô͘ Thian-sù，3位牧師teh主持。美崙有80名聚會，拜堂內面的壁未齊好，欠經費。若有疼主的兄姊，請共in 鬥援助，來完成真好的工。
(5)池上教會新拜堂會容允300左右人。平時有60左右禮拜。我29號佇遐禮拜。回想20外年前，我去新開園蔡榮華長老的厝開始禮拜，後來徙來池上，就請牧師。今起一間新拜堂，開7萬外箍；佇12月23號獻堂兼祝聖誕。現在黃Se-chhoan先生佇遐teh活動。我有一個外孫8歲佇遐，伊提予我買食。雖罔是小事，顯明囡仔的儉約，有孝心的教示。
(6)台東教會活動，12月6號，我佇遐禮拜；平素倚200人出席，拜堂teh傷狹。In有設自由十份一的獻金，每月頭禮拜用袋仔貯來下佇台頂；一禮拜收1,000外箍。花蓮是3個月獻一擺。Lo̍h牧師的工作，致意建設，伊所巡視的教會中有4,000外的 A-mi族teh禮拜。台東教會是Un牧師teh主持。
(7)富里教會有起一間新拜堂，全部鐵筋khòng-ku-lí，開倚20萬，會容允得3、4百人，一支塔3層，有一個捲螺梯，真心適。這pang起拜堂的時，聽講，一戶平均獻3,000箍，真通感心。現時綴Hé-goân先生teh活動。
(8)大里(大庄)教會堂，大地動有害--去，今攏修理好勢，有200左右teh禮拜。現時張Hûn-gím先生(Tân Bîn-chàn先生快婿) teh主持。In得著上帝賞賜in 雙生囝，求主祝福。
(9)十二月11暗，欲轉來玉里赴祈禱會，真福氣，拄有山地傳道醫療團來照幻燈，(寫幾項)。
1.現時山地的拜堂有200間。
2.有一間會容允1000人，咱平地敢無。
3.一个老婆80歲，揣無活路，聽耶穌的道理，就決心信。
4.兩姊妹，猶少年毋肯信，因為小妹結婚生囝紲死；阿姊就緊信主。
5.法國人出名食薰酒，講90人有一間酒家，所以in 的人丁直減少。
今這擺到東部，受教會，朋友，親人，有形，無形的幫贊，真感謝。十二月16日坐飛機平安到厝。感謝上帝。