講壇：新年恭喜
Káng-toâⁿ:Sin-nî kiong-hí
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第781號 |
| 日期 | 1954/1 |
| 頁數 | 8 |
白話字（原文數位化）
KÁNG-Toâⁿ
Sin-nî kiong-hí
(Siau Lo̍k-siān)
- 01, no. 781, pp. 08-09
Si-phian 102:27, “To̍k-to̍k Lí bô piàn-oāⁿ, Lí ê hè-siū bô kiông-chīn.”
Kū-nî toā hong-thai ê sî, ū chi̍t bé toā go̍k-hî, hō͘ hong-éng phah kàu Tâi-tang Sin-káng, tuì hia chiūⁿ-lio̍k, hō͘ lâng chin kî-koài, cháiⁿ-iūⁿ i oē keng-kè hn̄g koh toā hong-lōng ê toā-hái. I ê chiūⁿ-lio̍k, chiū-sī chhin-chhiūⁿ lâng kè sin-nî ê hoaⁿ-hí. I sui-jiân bô só͘ thang oá-khò, iā i ê le̍k-liōng m̄-sī oē tuì-khòng toā chū-jiân ê ui-le̍k, iáu-kú i oē tō͘-kè chit ê toā-hái, Sè-kan lâng sui-jiân tī chit ê put-sî teh piàn-tōng ê sè-kan teh khiā-khí, iáu-kú i teh tō͘-kè tuì kū-nî kàu sin-nî. Chóng-sī bô lóng án-ni, ū ê tō͘ boē kè; só͘-í oē thang keng-kè chit ê nî ê lâng sī hok-khì, sī sèng-lī-chiá.
Kàu tī sin-nî ê sî, ū sin ê nî, ū kū ê nî. Hō͘ lâng só͘ toā kám-kak ê, chiū-sī piàn-tōng; tuì kū piàn sin; tuì sin piàn kū; che sī put-hēng kap guî-hiám ê kì-hō. Ki-tok-tô͘ boē thang chi̍t sî choè sin ê lâng, bô kú piàn choè kū ê lâng. Sè-kan tē-it hō͘ lâng kiaⁿ ê, chiū-sī piàn-lâi piàn-khì ê lâng. Hit khoán ê lâng bô lâng káⁿ sìn-iōng. Ū sî kóng si̍t-chāi; ū sî sit-lo̍h chin-si̍t; ū sî jia̍t-sim tī kàu-hoē; ū sî kiáu-jiáu kàu-hoē; ū sî ū thiàⁿ-sim, iā tī pa̍t uī sī chân-jím. Che sī bô ki-chhó͘ ê sìn-gióng seng-oa̍h. Bat thiaⁿ chi̍t ê tuì tāi-lio̍k lâi ê lâng teh kóng, toà Tâi-oân khak-si̍t chin hó; chí-ū kám-kak chi̍t hāng chin kan-khó͘, chiū-sī khì-hāu piàn-lâi piàn-khì. Ū sî chin joa̍h, hut-jiân toā koâⁿ; liâm-piⁿ toā hong, liâm-piⁿ toā-hō͘. Chiàn-sî ê kan-khó͘, chiū-sī ta̍k hāng toā piàn-tōng.
Lán keng-kè sin-nî ê hoaⁿ-hí, kap it-poaⁿ ê lâng ê hoaⁿ-hí sī bô saⁿ-tâng. Lán m̄-sī chhin-chhiūⁿ it-poaⁿ lâng tī chit khoán piàn-tōng, guî-hiám tiong teh keng-giām sin-nî hoaⁿ-hí ê ji̍t. Chhin-chhiūⁿ bat ū chi̍t ê chèng-tī-ka, ū lâng kā i kiong-hí sin-nî ê sî, i ìn kóng, “Sin-nî ê ji̍t tio̍h pí kū-nî ê ji̍t khah hoaⁿ-hí; chóng-sī goá bē bat tó chi̍t ê hoaⁿ-hí ê ji̍t. “Lán si̍t-chāi tī chit ê piàn-tōng ê sè-kan chhē bô chi̍t ê hoaⁿ-hí ê ji̍t, chí-ū tī chi̍t khoán piàn-tōng ê sè-kài ê poè-āu lán ū chi̍t ê sìn-liām, chiū-sī “Bô piàn-oāⁿ ê Siōng-tè” ê sìn-liām. Lán khîⁿ-tiâu chit ê sìn-liām, kap boē piàn-oāⁿ ê Siōng-tè ū chit ê liân-lo̍k, lán chiū chhē tio̍h kiong-hí ê ji̍t. Chhin-chhiūⁿ lâng tī o͘-àm-tiong teh kiâⁿ, bong-lâi bong-khì bong bô lō͘; chóng-sī i nā hoat-kiàn-tio̍h ū chi̍t-tiám-á kng bô teh tín-tāng, i chiū siⁿ-chhut ióng-khì lâi kiâⁿ. Koh iā sī chhin-chhiūⁿ sái chûn ê lâng só͘ ài khoàⁿ ê, chiū-sī thiⁿ chhiⁿ, in-uī chûn kap hái lóng teh tín-tāng, kan-ta chhiⁿ bô teh tín-tāng, iā chit ê thiⁿ chhiⁿ choè in ê chhoā-lō͘ kàu káng-kháu.
Chhut-chāi chit ê sè-kan cháiⁿ-iūⁿ teh piàn-tōng, Siōng-tè bô siū sím-mi̍h éng-hióng; tuì éng-oán kàu éng-oán, bô piàn-oāⁿ. Ú-tiū sī Siōng-tè ê saⁿ, saⁿ oē kū, oē pháiⁿ, to̍k-to̍k chhēng chit niá toā saⁿ ê Siōng-tè éng bô piàn-oāⁿ. Lán ê seng-oa̍h m̄-sī beh hō͘ teh keng-kè ê nî ná thun-chia̍h, kàu lō͘-bé sit-lo̍h lán ê chûn-chāi; sī tio̍h hō͘ éng bô piàn-oāⁿ ê Siōng-tè lâi kan-sia̍p lán ê jîn-seng, tek-khak m̄-thang ū kū-choa̍t, á-sī léng-tām ê thài-tō͘, chiah ū jîn-seng ê ǹg-bāng kap hoaⁿ-hí.
漢羅（Ùi原文改寫）
講壇
新年恭喜
(蕭樂善)
1954.01，no.781，pp.08-09
詩篇102：27，「獨獨你無變換，你的歲壽無窮盡。」
舊年大風颱的時，有一尾大鱷魚，予風湧扑到台東新港，對遐上陸，予人真奇怪，怎樣伊會經過遠閣大風浪的大海。伊的上陸，就是親像人過新年的歡喜。伊雖然無所通倚靠，也伊的力量毋是會對抗大自然的威力，猶過伊會度過這个大海，世間人雖然佇這个不時teh變動的世間teh徛起，猶過伊teh度過對舊年到新年。總是無攏按呢，有的度未過；所以會通經過這个年的人是福氣，是勝利者。
到佇新年的時，有新的年，有舊的年。予人所大感覺的，就是變動；對舊變新；對新變舊；這是不幸佮危險的記號。基督徒未-通一時做新的人，無久變做舊的人。世間第一予人驚的，就是變來變去的人。彼款的人無人敢信用。有時講實在；有時失落真實；有時熱心佇教會；有時攪擾教會；有時有疼心，也佇別位是殘忍。這是無基礎的信仰生活。捌聽一个對大陸來的人teh講，蹛台灣確實真好；只有感覺一項真艱苦，就是氣候變來變去。有時真熱，忽然大寒；liâm-piⁿ大風，liâm-piⁿ大雨。戰時的艱苦，就是逐項大變動。
咱經過新年的歡喜，佮一般的人的歡喜是無相同。咱毋是親像一般人佇這款變動，危險中teh經驗新年歡喜的日。親像捌有一個政治家，有人共伊恭喜新年的時，伊應講，「新年的日著比舊年的日較歡喜；總是我未捌tó一个歡喜的日。」咱實在佇這个變動的世間揣無一个歡喜的日，只有佇一款變動的世界的背後咱有一個信念，就是「無變換的上帝」的信念。咱擒牢這个信念，佮未變換的上帝有這个連絡，咱就揣著恭喜的日。親像人佇烏暗中teh行，摸來摸去摸無路；總是伊若發見著有一點仔光無teh振動，伊就生出勇氣來行。閣也是親像駛船的人所愛看的，就是天星，因為船佮海攏teh振動，kan-ta星無teh振動，也這个天星做in的chhoā路到港口。
出在這个世間怎樣teh變動，上帝無受甚物影響；對永遠到永遠，無變換。宇宙是上帝的衫，衫會舊，會歹，獨獨穿這領大衫个上帝永無變換。咱的生活毋是欲予teh經過的年ná吞食，到路尾失落咱的存在；是著予永無變換的上帝來干涉咱的人生，的確毋通有拒絕，á是冷淡的態度，才有人生的向望佮歡喜。