消息
Siau-sit
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第781卷 |
| 日期 | 1954/1 |
| 頁數 | 25 |
白話字（原文數位化）
Siau-sit
- 01, no. 781, pp. 25-26
T. K. C. beh phài tāi-piáu khì hù sè-kài Chóng-hoē á bô?
Kūn-lâi ū siu-tio̍h sè-kài Tiúⁿ-ló-hoē chóng-kàn-sū ê phoe, mn̄g khoàⁿ Tâi-oân T. K. C. beh phài lâng khì hù tē 17 hoê ê Chóng-hoē (7 ge̍h 27-8 ge̍h 5 ji̍t, tī Bí-kok Princeton Sîn-ha̍k-ĪN) á-bô?
Iû-goân tuì Phó͘-sè Liân-bêng ê chóng-kàn-sū siu-tio̍h phoe, mn̄g khoàⁿ lán T. K. C. beh phài tāi-piáu khì hù tē-jī hoê ê Chóng-hoē (8 ge̍h 14-31 ji̍t, tī Bí-kok Evanaton) á-bô?
Siu-tio̍h chit nn̄g tiuⁿ phoe, lán boē-bián-tit tio̍h siūⁿ khoàⁿ ū hoat-tō͘ thang khì hù á-bô? M̄-bián kóng, lán lóng chai che sī chin pit-iàu ê sū; nā ū hoat-tō͘, tuì Tâi-oân phài khì sī tē-it lí-sióng; nā bô, kiám-chhái thang phài chi̍t ê Tâi-oân-lâng hiān-sî tī Bí-kok teh tha̍k-chheh ê, khì hù ia̍h sī oē ēng-tit.
Chóng-sī bô-lūn sím-mi̍h lâng beh khì, tek-khak tio̍h ū chhin-chhiūⁿ ē-bīn chiah ê chu-keh:－
-
Tio̍h si̍t-chāi choè T. K. C. ê tāi-piáu, chiū-sī T. K. C. hoē-oân só͘ chun-kèng ê hoē-iú, ū bêng-pe̍k T. K. C. ê ì-gī kap gâu choè kàu-hoē ê kang-chok ê lâng.
-
Tńg-lâi Tâi-oân ê sî, tio̍h chì-goān te̍k-pia̍t choè T. K. C. kang-chok 2, 3 nî kú.
Chhiáⁿ T. K. C. hoē-oân chim-chiok siūⁿ, ǹg-bāng Chhun-lēng-hoē (2 ge̍h 8-11 ji̍t) chū-chi̍p tī Tâi-lâm ê sî, chiah beh lâi koat-tēng.
漢羅（Ùi原文改寫）
消息
1954.01，no.781，pp.25-26
T.K.C.欲派代表去赴世界總會á無？
近來有收著世界長老會總幹事的 批，問看台灣T.K.C.欲派人去赴第17回的總會(7月27-8月5日，佇美國Princeton神學院) á無？
猶原對普世聯盟的總幹事收著批，問看咱T.K.C.欲派代表去赴第二回的總會(8月14-31日，佇美國Evanaton) á無？
收著這兩張批，咱袂免得著想看有法度通去赴á無？毋免講，咱攏知這是真必要的事；若有法度，對台灣派去是第一理想；若無，撿彩通派一个台灣人現時佇美國teh讀冊的，去赴亦是會用得。
總是無論甚物人欲去，的確著有親像下面遮的資格：－
1.著實在做T.K.C.的代表，就是T.K.C.會員所尊敬的會友，有明白T.K.C.的意義佮gâu做教會的工作的人。
2.轉來台灣的時，著志願特別做T.K.C.工作2，3年久。
請T.K.C.會員斟酌想，向望春令會 (2月8-11日)聚集佇台南的時，才欲來決定。