四粒種子

Sì-lia̍p chéng-chí

文獻資訊

項目	資料
作者	無lo̍h名
卷期	台灣教會公報
卷期	第768號
日期	1952/12
頁數	22

白話字（原文數位化）

Sèng-keng tuì-oā ke̍k

“Sì-lia̍p chéng-chí”

768 hō  1952.12  p.22-23

(Kin-kù Má-thài 13:4-9, 18-22, uī-tio̍h iù-liân ê ha̍k-seng siá ê).

Jîn-bu̍t: 10 miâ.

Lóng-tho̍k: Sèng-keng Má-thài 13:4-9, (jiân-āu choh-sit lâng chiūⁿ-tâi,kia̍h tî-thâu, koāⁿ nâ, beh khì hn̂g-ni̍h ê khoán).

Goá sī pi-bî choh-sit lâng,

Ta̍k-ji̍t liâu-bāng i toā-châng;

Lô-khó͘ tio̍h-boâ chò hn̂g-kang,

Lâng-la̍t iú-hiān bô hoat-tō͘,

Khîn lê èng puî iā bô-pō͘;

Chí kiû Thiⁿ-pē kàng kam-lō͘,

Tuì thiⁿ lo̍h-hō͘ tàu pang-chō͘.

Ji̍t chhut ji̍t lo̍h chiàu chhù-sū,

Liâng-hong oa̍h-khì khò tit chū;

Ngó͘-kok siu-sêng khǹg chhek-chhng,

Kám-siā Thiⁿ-pē moá chhù kng.

Taⁿ iā-chéng ê sî kàu lah, tio̍h chò kang, m̄-thang siūⁿ siān, (gîm sèng-si 217 siú 1 chat, se̍h tâi kàu tiong-ng). Goá ū 4 lia̍p chéng-chí, taⁿ tio̍h sè-jī lâi iā.

Tē 1 lia̍p ê chéng-chí khì ah! (1 lâng chiàu i só͘ pí ê hong-hiòng cháu chhut-lâi, khû tī kak-á).

Tē 2 lia̍p ê chéng-chí khì ah! (Tē 2 ê ha̍k-seng chhut-lâi).

Tē 3 lia̍p ê chéng-chí khì ah! (Tē 3 ê ha̍k-seng chhut-lâi).

Tē 4 lia̍p ê chéng-chí khì ah! (Tē 4 ê ha̍k-seng chhut-lâi).

iā-chéng í-keng bêng-pe̍k, taⁿ thèng-hāu toā-châng. (Chiū koh gîm gó͘-kok siu tò-lâi……se̍h tâi thè tiûⁿ).

Tē 1 lia̍p chéng-chí: (peh khí-lâi khiā). Goá sī hó chéng-chí, thái-ē kā goá iā tī lō͘-piⁿ? Ah! goá chai, goá ê chú-lâng liù-chhiú-khì, chiong goá iā tuì chia lâi. Taⁿ goá tī chia tio̍h tèng-kin hoat gê.

O͘-a: Khah, khah, khah. Kin-á-ji̍t lóng iáu-boē chia̍h pn̄g, pak-tó͘ iau, poe lóng bē kiâⁿ, tó-uī ū hó chia̍h-mi̍h ah ? O͘h! Tī chia ū chi̍t-lia̍p chhek. Kám-siā, kám-siā.

Tē 1 lia̍p: O͘-a hiaⁿ, o͘-a hiaⁿ, Lí beh lâi chia̍h goá mah? Chhiáⁿ lí lī-khui goá, iông-ún goá tī chia toā-châng.

O͘-a: Gōng ê chéng-chí. Lí tiàm tī chia thái-thó ē toā-châng. Lí khoàⁿ, chia sī lō͘, lâng teh kiâⁿ, chhia teh koè, gû-bé teh óng-lâi. Lí nā ē chhut-sì, iā ē hō͘ in ta̍h sí--lah. Nā beh hō͘ in lap sí, m̄-ta̍t-tio̍h chím-á hō͘ goá pak-tó͘ pá.

Tē 1 lia̍p: Ai ah! Kiù lâng leh, o͘-a kiông-kiông beh kā goá thun-chia̍h-khì, phah-sńg goá sī hó ê chéng-chí. (O͘-a thoa tē 1 lia̍p chéng-chí thè tiûⁿ).

Tē 2 lia̍p: (Khí-lâi). Goá sī tē 2 lia̍p ê hó chéng-chí. Chú-lâng iā goá tī chio̍h-keh, thô͘ chhián ê uī. Tī chia goá iā beh lâi chhut-la̍t, ǹg-bāng toā-châng. Khó-sioh ē-bīn sī chio̍h-keh, kin pàng lóng bē lo̍h-khì.

Ji̍t-thâu: (Chhēng pe̍h-saⁿ,tì âng-bō, chhiú kia̍h teng). Goá sī ji̍t-thâu, goá ēng goá ê sio-lō ê jia̍t hō͘ bān-mi̍h seng-tióng, nā bô goá, bān-mi̍h bē chûn-chāi. Tī chia ū suí-suí khó-ài ê chéng-chí teh tióng-sêng, goá tio̍h ēng sio-lō ê jia̍t-tō͘ hō͘ i khah gâu toā(ēng teng chiò tī chéng-chí ê thâu-khak tiap-á-kú, chiū thè tiûⁿ).

Tē 2 lia̍p: Ah, ah, chin sio, chin jia̍t, tuì kha-té ti̍t-ti̍t jia̍t khí-lâi, goá tòng-bē-tiâu, tòng-bē-tiâu, goá kiōng beh sí lah, goá ê kin bô chuí thang suh, goá chhuì-ta, chhuì-ta, goá hō͘ ji̍t pha̍k beh sí lah. Kiù lâng leh (chiū thâu-khak tàm-tàm, ná-chún ko͘-tâ).

Tē 3 lia̍p: Goá sī tē 3 lia̍p ê chéng-chí, goá ka-la̍uh tī chhì-phè tiong, goá m̄ su chhì-phè, beh chhut-la̍t ǹg thiⁿ toā châng. Sui-jiân in khàm goá, goá beh lòng hō͘ i koè, thang khui-hoe kiat-chí.

Chhì-phè: (The̍h phoē-toaⁿ lâi khiā tī Tē 3 lia̍p ê āu-bīn).

oé! Hó chéng-chí, chia sím-mi̍h só͘-chāi, lí chai mah? Chia sī goá ê tē-kài, lí siáⁿ-sū chiàm-ji̍p goá ê só͘-chāi. Lí khó-o͘N3 ê chéng-chí, goá thái-ē pàng lí kan-hiu, goá ê chong-cho̍k ke̍k chē, goá ê chhiú ū la̍t, put-lūn sím-mi̍h hō͘ goá kìⁿ--tio̍h, goá chiū bô pàng khui, ti̍t-ti̍t jia-pè i, sok hō͘ i sí. Lí ê ūn-miā chiàⁿ sī án-ni. (Chiū chiong phoē-toaⁿ chiām-chiām khàm tī tē 3 ê chéng-chí).

Tē 3 lia̍p: Ai ah! Kiù lâng leh, goá beh bô khuì lah, àm-bîn-bong, chhiáⁿ iông-ún chi̍t-kak-á pun goá khiā. Chhiáⁿ lí chhiú pàng khah lēng.

Chhì-phè: Bô pàng lí kan-hiu(chhut-la̍t sok).

Tē 3 lia̍p: Ai ah, ai ah(chiū khiā-n̂g sí ê khoán).

Tē 4 lia̍p: Kám-siā chú-lâng khǹg goá tī puî koh sang ê thó͘-tē. Goá tio̍h tī chia tióng-sêng, kiat-chí lâi pò-tap i ê lô͘-khó͘.

Lō͘-chuí: (Chhēng pe̍h-saⁿ, chhiú kia̍h chuí-choāⁿ-á), goá sī thiⁿ-téng ê lō͘-chuí, mê-sî lâng khùn chēng ê sî, goá chiū tuì thiⁿ lo̍h--lâi, tī lóng-chóng ê lō͘-chuí lūn-te̍k i, hō͘ i chheⁿ-chhuì toā châng. Tī chia ū khó-ài ê ngó͘-kok, goá ê hó pêng-iú ah! Lí thang tit-tio̍h kam-lō͘ lâi ióng-chòng(choāⁿ chuí ê khoán tī i ê téng-bīn).

Tē 4 lia̍p: To-siā, to-siā(Lō͘-chuí thè-tiûⁿ).

Ji̍t-thâu: Goá só͘ thiàⁿ ê hó pêng-iú, goān lí tit-tio̍h sio-lō ê jia̍t-tō͘ thang tióng-sêng kiat-si̍t(ēng teng chiò tī i ê sì-uî).

Tē 4 lia̍p: To-siā, to-siā(Ji̍t-thâu thè-tiûⁿ). Ò ah! Goá ê khuì-la̍t goá ê sim-lāi ti̍t-ti̍t beh chhèng--chhut-lâi, goá ê sim chhiong moá hoaⁿ-hí, ún-tàng ū hó ê kiat-si̍t beh thò͘ chhut--lâi. Che lóng sī chú-lâng ê gâu chiàu-kò͘ kap ji̍t-kng, kam-lō͘ ê pang-chān.

Lông-hu: Goá taⁿ tio̍h lâi khì sûn chhân.Goá ê chéng-chí tī tó-uī? Tē 1 lia̍p ê chéng-chí tī tó-uī? ún-tàng tī o͘-a ê pak-tó͘-lāi. Tē 2 lia̍p ko͘-tâ--khì, bô tē thang hō͘ i tèng-kin lah. Tē 3 lia̍p, khiā-n̂g--khì, hō͘ chhì-phè jia-pè, khó-lîn, khó-lîn. (Kàu tē 4 lia̍p). Ò ah! kia̍t-suī lah! 100 poē ê siu-sêng lah. Goá sui-jiân phah-sńg 3 lia̍p chéng-chí, nā-sī uī-tio̍h lí lâi bē kì-tit it-chhè ê kan-khó͘, goá beh chiong lí siu-ji̍p chhek-chhng lâi pó-sioh. (Gîm Gō͘-kak siu tò-lâi—--chiū thè-tiûⁿ)

Lóng-tho̍k: Má-thài 13:18-32

漢羅（Ùi原文改寫）

聖經對話劇

「四粒種子」

768號  1952.12  p.22-23

（根據馬太13：4-9，18-22，為著幼年的學生寫的)。

人物：10名。

朗讀：聖經馬太13：4-9，（然後作穡人上台，攑鋤頭，捾籃，欲去園--裡的款）。

我是卑微作穡人，

逐日瞭望伊大欉；

勞苦著磨做園工，

人力有限無法度，

勤犁壅肥也無步；

只求天父降甘露，

對天落雨鬥幫助。

日出日落照次序，

涼風活氣靠得住；

五穀收成囥粟倉，

感謝天父滿厝光。

今掖種的時到lah，著做工，毋通想siān，（吟聖詩217首1節，踅台到中央）。我有4粒種子，今著細膩來掖。

第1粒的種子去啊！（1人照伊所比的方向走出來，跍佇角仔）。

第2粒的種子去啊！（第2个學生出來）。

第3粒的種子去啊！（第3个學生出來)。

第4粒的種子去啊！(第4个學生出來)。

掖種已經明白，今聽候大欉。（就擱吟五穀收倒來…踅台退場）。

第1粒種子：（peh起來徛）。我是好種子，thái會共我掖佇路邊？啊！我知，我的主人溜手去，將我掖對遮來。今我佇遮著釘根發芽。

烏鴉：Khah，khah，khah。今仔日攏猶未食飯，腹肚枵，飛攏袂行，佗位有好食物啊？O͘h！佇遮有一粒粟。感謝，感謝。

第1粒：烏鴉兄，烏鴉兄，你欲來食我mah？請你離開我，容允我佇遮大欉。

烏鴉：憨的種子。你踮佇遮thái-thó會大欉。你看，遮是路，人teh行，車teh過，牛馬teh往來。你若會出世，也會予in踏死--lah。若欲予in la̍p死，毋值著這馬予我腹肚飽。

第1粒：Ai啊！ 救人leh，烏鴉強強欲共我吞食去，拍損我是好的種子。(烏鴉拖第1粒種子退場)。

第2粒：(起來)。我是第2粒的好種子。主人掖我佇石格，土淺的位。佇遮我也欲來出力，向望大欉。可惜下面是石格，根放攏袂落去。

日頭：(穿白衫，戴紅帽，手攑燈)。我是日頭，我用我的燒烙的熱予萬物生長，若無我，萬物袂存在。佇遮有suí-suí 可愛的種子teh長成，我著用燒烙的熱度予伊較gâu大（用燈照佇種子的頭殼霎仔久，就退場）。

第2粒：啊，啊，真燒，真熱，對跤底直直熱起來，我擋袂牢，擋袂牢，我強欲死lah，我的根無水通欶，我喙焦，喙焦，我予日曝欲死lah。救人leh（就頭殼頕頕，那準枯tâ)。

第3粒：我是第3粒的種子，我交落佇刺phè中，我毋輸刺phè，欲出力向天大欉。雖然in崁我，我欲挵予伊過，通開花結子。

刺phè：（提被單來徛佇第3粒的後面）。

oé！好種子，遮甚物所在，你知mah？遮是我的地界，你啥事佔入我的所在。你可惡的種子，我thái會放你干休，我的宗族極濟，我的手有力，不論甚物予我見--著，我就無放開，直直遮蔽伊，束予伊死。你的運命正是按呢。（就將被單漸漸崁佇第3个種子）。

第3粒：Ai啊！ 救人leh，我欲無氣lah，暗眠摸，請容允一角仔分我徛。請你手放較冗。

刺phè：無放你干休（出力束）。

第3粒：Ai啊，ai啊（就徛黃死的款）。

第4粒：感謝主人囥我佇肥擱鬆的土地。我著佇遮長成，結子來報答伊的勞苦。

露水：（穿白衫，手攑水濺仔），我是天頂的露水，暝時人睏靜的時，我就對天落--來，佇攏總的露水潤澤伊，予伊青翠大欉。佇遮有可愛的五穀，我的好朋友啊！你通得著甘露來勇壯（濺水的款佇伊的頂面）。

第4粒：多謝，多謝（露水退場）。

日頭：我所疼的好朋友，願你得著燒烙的熱度通長成結實（用燈照佇伊的四圍）。

第4粒：多謝，多謝（日頭退場）。Ò啊！我的氣力我的心內直直欲衝--出來，我的心充滿歡喜，穩當有好的結實欲吐出--來。這攏是主人的gâu照顧佮日光，甘露的幫贊。

農夫：我今著來去巡田。我的種子佇佗位？第1粒的種子佇佗位？穩當佇烏鴉的腹肚內。第2粒枯tâ--去，無地通予伊釘根lah。第3粒，徛黃--去，予刺phè遮蔽，可憐，可憐。（到第4粒）。Ò啊！結穗lah！100倍的收成lah。我雖然拍損3粒種子，但是為著你來袂記得一切的艱苦，我欲將你收入粟倉來寶惜。（吟五穀收倒來—--就退場）

朗讀：馬太13：18-32