介紹聖畫
Kài-siāu Sèng-oē
文獻資訊
| 項目 | 資料 |
|---|---|
| 作者 | 高守仁 Ko Siú-jîn |
| 卷期 | 台灣教會公報 |
| 卷期 | 第764號 |
| 日期 | 1952/8 |
| 頁數 | 23 |
白話字（原文數位化）
Kài-siāu Sèng-oē
“Choè-āu ê Boán-chhan.”
1952.08 764 hō p.23-24
(Chiap 7 goe̍h 22 bīn).
Chit tiuⁿ tô͘ tàu-tí oân-sêng liáu á-boē? Kin-kù le̍k-sú ê kì-chài, tī 1499 nî, Hoat-kok Lo͘is ū chìn-kun ji̍p Ì-tāi-lī, tuì Bí-lân koáⁿ-chhut 公爵, hit sî Bûn-se Sian-siⁿ iáu-kú teh siu-chéng chit tiuⁿ bêng-oē, bô loā-kú i iā hō͘ lâng koáⁿ-chhut Bí-lân, só͘-í chit tiuⁿ tô͘ tī Bûn-se Sian-siⁿ ê sim-tiong sī iáu-boē oân-sêng, Lo͘is kàu Bí-lân chiū suî-sî cháu-khì Sèng Má-lī-a Siu-tō-īⁿ khoàⁿ chit tiuⁿ Sèng-oē “Choè-āu ê Boán-chhan,” khoàⁿ chin kú, m̄-kam lī-khui; chiū kiò i ê pō͘-hā kā in kóng, “Chiong chit ê ku̍t tńg-lâi Hoat-kok.” Tī chit ê phò-hoāi kang-chok í-chêng, ū chhut chi̍t ê sîn-jia̍h[jiah], chiū-sī ū lâng tuì i tiong-kò, i chiū pó-choân chit ê bô hō͘ lâng phò-hoāi, m̄-kú kî-thaⁿ Bí-lân siâⁿ-lāi ê hó mi̍h lóng chhiúⁿ kàu khang-khang.
Sui-bóng Bûn-se ēng te̍k-pia̍t ê châi-tiāu lâi oē, Bí-lân ê khì-hāu chin sip, só͘-í āu-lâi chiām-chiām siⁿ-chhut chi̍t têng pe̍h-mo͘h8. Tô͘ ê sek-chhái iā sit kng-bêng. 1517 nî, le̍k-sú-siōng chiū ū kì-chài kóng, “Che sī chi̍t tiuⁿ choè iu-siù ê bêng-chok, m̄-kú khai-sí sún-hoāi, chit ê siau-sit thoân chhut í-āu, choē-choē lâng khai-sí ài lâi siu-lí.
1796 nî, Ná-pho-lûn chiàm Bí-lân ê sî, iā ji̍p lâi khoàⁿ tī chit ê beh pháiⁿ-khì ê bêng-oē chêng, siū liáu chin toā ê kám-tōng; kiò i ê pō͘-hā m̄-thang sún-hoāi i, nā sī hiah ê peng-á ēng chio̍h-thâu-á sún-hoāi choē-choē só͘-chāi.
Chin choē oē-ka gián-kiù pó-chûn ê hong-hoat. Kàu tē-jī chhù sè-kài tai-chiàn, bô hoat-tō͘, chiū ēng soa-pau thia̍p tī chhiûⁿ-á ê sì-bīn lâi pó-hō͘ i. Chà-tân phò-hoāi Sèng Má-lī-a Siu-tō-īⁿ chin thiám, to̍k-to̍k chit ê piah oân-choân chûn-chāi.
Í-āu choē-choē lâng ēng kho-ha̍k ê hong-hoat, chiong chit ê piah ka jia̍t, hek-sī boah-iû, kàu lō͘-boé tit-tio̍h sêng-kong. Koh chhut-hiān kuí-nā sè-kí am-ba̍t ê kng. Chit-tia̍p chin-chiàⁿ tit-tio̍h kiù lah. Lán siong-sìn chit tiuⁿ “Choè-āu ê Boán-chhan” oē tàng éng-kiú chûn-chāi hō͘ lâng o-ló. (Ko Siú-jîn).
漢羅（Ùi原文改寫）
介紹聖畫
「最後的晚餐」
1952.08 764號 p.23-24
(接7月22面)。
這張圖到底完成了抑未？根據歷史的記載，佇1499年，法國Lo͘is有進軍入意大利，對米蘭趕出公爵，彼時文西先生猶過teh修整這張名畫，無偌久伊也予人趕出米蘭，所以這張圖佇文西先生的心中是猶未完成。Lo͘is到米蘭就隨時走去聖瑪利亞修道院看這張聖畫「最後的晚餐」，看真久，毋甘離開；就叫伊的部下共in講：「將這个掘轉來法國。」佇這个破壞工作以前，有出一个神跡，就是有人對伊忠告，伊就保全這个無予人破壞，毋過其他米蘭城內的好物攏搶到空空。
雖罔文西用特別的才調來繪，米蘭的氣候真濕，所以後--來漸漸生出一層白膜。圖的色彩也失光明。1517年，歷史上就有記載講：「這是一張最優秀的名作，毋過開始損壞，這个消息傳出以後，濟濟人開始愛來修理。
1796年，拿破侖佔米蘭的時，也入來看，佇這个欲歹--去的名畫前，受了真大的感動；叫伊的部下毋通損壞伊。但是遐的兵仔用石頭仔損壞濟濟所在。
真濟畫家研究保存的方法。到第二次世界大戰，無法度，就用沙包疊牆仔的四面來保護--伊。炸彈破壞聖瑪利亞修道院真悿，獨獨這个壁完全存在。
以後濟濟人用科學的方法，將這个壁加熱，或是抹油，到路尾得著成功。閣出現幾若世紀掩密的光。這霎真正得著救--lah。咱相信這張「最後的晚餐」會當永久存在予人呵咾。 （高守仁）。