介紹聖畫
Kài-siāu Sèng-oē
文獻資訊
| 項目 | 資料 |
|---|---|
| 作者 | 高守仁 Ko Siú-jîn |
| 卷期 | 台灣教會公報 |
| 卷期 | 第763號 |
| 日期 | 1952/7 |
| 頁數 | 22 |
白話字（原文數位化）
Kài-siāu Sèng-oē
“Choè-āu ê Boán-chhan.”
1952.07 763 hō p.22
(Chiap chêng-hō 20 bīn)
Bô lâng chai-iáⁿ chit tiuⁿ tô͘ sī oē loā-kú, ū lâng kóng Iâ-so͘ ê thâu siūⁿ cha̍p nî kú. Hit ê Siu-tō-īⁿ ê thâu-lâng tòng-boē-tiâu, siá phoe hō͘ 公爵 kóng, “公爵 hit tiuⁿ piah-tô͘ kan-ta chhun Iû-tāi ê thâu-khak iáu-boē oân-sêng; m̄-kú Bûn-se chi̍t nî kú lóng bô lâi bong chit tiuⁿ choè-āu ê Boán-chhan lah.” 公爵 chin siū-khì, kiò i lâi, tng-bīn chiong chit tiuⁿ phoe hō͘ i khoàⁿ. Bûn-se iā toā siū-khì kóng, “Chit ê lâng tàu-té chai-iáⁿ sím-mi̍h sī tô͘! ‘I kóng goá chi̍t nî kú bô khì hia,’ m̄-kú án-ni boē thang piáu-sī goá bô koan-sim chit tiuⁿ tô͘, goá ta̍k-ji̍t khì hā-kip siā-hoē chhoē goá khiàm-ēng ê lâng, kàu taⁿ iáu chhoē lóng bô chi̍t ê ha̍h goá ê ì-sù, kiám-chhái chit ê lāu-thâu khó-í chò Iû-tāi ê bô͘-hêng.”
I bô sit-chì, kè-sio̍k oē kàu oân-sêng, sui-sî tit-tio̍h choè ko ê siōng-chàn. “Choè-āu ê Boán-chhan” ê uí-tāi, miâ-siaⁿ hn̄g-hn̄g pò-iông kàu choân Au-chiu. Chit tiuⁿ tô͘, chhin-chhiūⁿ Sèng Má-lī-a Siu-tō-īⁿ lāi ê chi̍t keng chhù, ū thian-pông, ū êⁿ-á, tuì thang-á ū khoàⁿ-kìⁿ chheⁿ-sek ê Sek-an soaⁿ, toh-téng chhu tn̂g-tn̂g ê toh-kin, téng-bīn ū poâⁿ, poe, to kap piáⁿ. Bīn tài iu-iông teh hoân-ló ê Iû-tāi, seng-khu thêng khí-lâi, chhiú-kut gī-gī-chhoah, gīm hit ê chîⁿ-tē-á chin ân. Pí-tek tī i āu-bīn thiàu khí-lâi, chhin-chhiūⁿ teh mn̄g hiah ê sù-tô͘ kóng, “Boē Chú ê sī sím-mi̍h lâng?” I ê gîn-sek ê thâu-khak hoat-chhut chhin-chhiūⁿ hoé ê jia̍t-lia̍t kap kín-kip.
ǹg Sek-an soaⁿ hn̄g-hn̄g ê kéng-tì ê thang-á hit pêng, Iâ-so͘ chē tī Iok-hān kap Se-pí-thài ê kiáⁿ Ngá-kok ê tiong-kan, I ê bīn chhin-chhiūⁿ gín-ná lóng bô siâ-liām, ū lîn-bín ê piáu-chêng.
(Thāi-sio̍k).
漢羅（Ùi原文改寫）
介紹聖畫
「最後的晚餐」
1952.07 763號 p.22
(接前號20面)
無人知影這張圖是畫偌久，有人講耶穌的頭想十年久。彼的修道院的頭人擋袂牢，寫批予公爵講：「公爵彼張壁圖kan-ta賰猶大的頭殼猶未完成；毋過文西一年久攏無來摸這張『最後的晚餐』--lah。」公爵真受氣，叫伊來，當面將這張批予伊看。文西也大受氣講：「這个人到底知影甚物是圖！伊講我一年久無去遐，毋過按呢袂通表示我無關心這張圖，我逐日去下級社會揣我欠用的人，到今猶揣攏無一个合我的意思，檢彩這个老頭可以做猶大的模型。」
伊無失志，繼續畫到完成，雖是得著最高的頌讚。「最後的晚餐」的偉大，名聲遠遠報揚到全歐洲。這張圖，親像聖瑪利亞修道院內的一間厝，有天蓬，有楹仔，對窗仔有看見青色的錫安山，桌頂chhu長長的桌巾，頂面有盤、杯、刀佮餅。面帶憂容teh煩惱的猶大，身軀挺--起-來，手骨gī-gī掣，扲彼的錢袋仔真ân。彼得佇伊後面跳--起-來，親像teh問遐的使徒講：「賣主--的是甚物人？」 伊的銀色的頭殼發出親像火的熱烈佮緊急。
向錫安山遠遠的景緻的窗仔彼爿，耶穌坐佇約翰佮西庇太的囝雅各的中間，伊的面親像囡仔攏無邪念，有憐憫的表情。
(待續)。