介紹聖畫
Kài-siāu Sèng-oē
文獻資訊
| 項目 | 資料 |
|---|---|
| 作者 | 江守仁 Kang Siú-jîn |
| 卷期 | 台灣教會公報 |
| 卷期 | 第761號 |
| 日期 | 1952/5 |
| 頁數 | 19 |
白話字（原文數位化）
Kài-siāu Sèng-oē
“Choè-āu ê Boán-chhan”
1952.05 761 hō p.19-20
(Kang Siú-jîn e̍k)
1943 nî 8 goe̍h, Bí-kun khong-si̍p Ì-tāi-lī ê Bí-lân (Milan) toē-hng ê sî, ū nn̄g lia̍p chà-tân hiat tī 15 sè-kí só͘ kiàn-tiok ê Sèng Má-lī-a Siu-tō-īⁿ. Chin kai-chài, hit ê sè-kài choè chhut-miâ, choè pó-poè ê chhiûⁿ-piah, ū oē hit sè-kí choè chhut-miâ, choè pó-poè Bûn-se Sian-siⁿ (Leonardo da Vinci) choè toā chok-phín, “Choè-āu ê boán-chhan.”
Chit tiuⁿ bêng-oē tī 15 sè-kí chhut-sì í-lâi siông-siông gū-tio̍h chéng-chéng ê guî-hiám, kàu-taⁿ í-keng ū 3, 4 pah tang, iáu-kú tī hit tè piah hō͘ chèng-lâng o-ló chheng-chàn.
Cha̍p-gō͘ sè-kí boé, Bí-lân 大公爵 (Ludovico Sforza) ê kiong-têng, sī Au-chiu chhut-miâ suí ê chi̍t ê. Chit ê thâi-sí hông-tè chhoàn-uī ê thóng-tī-chiá chin ho͘nn3 ha̍k-gē (學藝). I chhiáⁿ chin choē chin ū ha̍k-būn ê ha̍k-chiá, i-seng, bí-su̍t-ka, tī i ê kiong-lāi. uī-tio̍h beh lī-iōng in ê châi-lêng; siông-siông tī kiong-lāi kú-hêng toā iân-sia̍h, chí-tēng in tio̍h choè chong-kàu-siōng, á-sī tiat-ha̍k-siōng ê piān-lūn chò û-hèng ê chiat-bo̍k.
Thian-bûn-ha̍k-chiá tio̍h ū-giân ú-tiū bī-lâi ê tāi-chì. Liān-kim-su̍t ê lâng (鍊金術) tio̍h piáu-ián sin ê hoat-bêng. iàn-hoē-tiong nā ū kuì hu-jîn iàu-kiû kóng, “Hō͘ goán khoàⁿ sim-sek ū chhì-kek ê mi̍h” chiah ê (多才多藝) ê lâng, chiū chhut-hiān khai-sí tián pún-sū, nā ū jia̍t-lia̍t piān-lūn, tì-sú seⁿ-khí chhiong-tu̍t, hiah ê chng-thāⁿ chin suí ê kuì hu-jîn, chiū khah moá-chiok.
Bí-su̍t-ka uī-tio̍h án-ni, sî-sî lô-le̍k lâi gián-kiù kok-chióng mi̍h, ài tī kiong-lāi chhut-miâ hō͘ lâng o-ló.
米蘭公爵ê bó͘ (Beatrice hū-jîn, iā-sī chi̍t uī ho͘nn3 gē-su̍t ê hū-jîn-lâng; i 16 hoè kiat-hun, kàu Bí-lân kok ōng-sēng ê sî, tú-tú 20 hoè, chhin-chhiūⁿ gín-ná ài hoaⁿ-hí khoài-lo̍k, hō͘ chit ê hoan-hoa ê ông-kiong, ke chi̍t luí hoe. Sui-jiân sī chi̍t ê siàu-liân bí-lē ê hū-jîn, i chin ū châi-tiāu, tuì chèng-tī-siōng ê chhiú-toāⁿ pí 公爵 khah ū, só͘-í kok-ka ê kè-oē, im-bô͘ i lóng ū pang-chān 公爵; sui-bóng ū kuí-nā-uī goā-sek thióng-ki (外室寵姬), iáu-kú ông choè-thiàⁿ ê chiū-sī Beatrice, nā uī-tio̍h ài hō͘ i hoaⁿ-hí, bô-sioh chē-chē ê suí-saⁿ, chu-pó, la̍h-káu, si, tô͘-oē téng-téng hiàn hō͘ i.
漢羅（Ùi原文改寫）
介紹聖畫
「最後的晚餐」
1952.05 761號 p.19-20
(江守仁譯)
1943年8月，美軍空襲意大利的米蘭（Milan）地方的時，有兩粒炸彈hiat佇15世紀所建築的聖瑪利亞修道院。真佳哉，彼的世界出名，最寶貝的牆壁有繪彼世紀最出名、最寶貝文西先生（Leonardo da Vinci）最大作品「最後的晚餐」。
這張名畫佇15世紀出世以來常常遇著種種的危險，到今已經有三、四百冬，猶過佇彼塊壁予眾人呵咾稱讚。
十五世紀尾，米蘭大公爵Ludovico Sforza的宮廷，是歐洲出名媠的一个。這个刣死皇帝篡位的統治者真好學藝。伊請真濟真有學問的學者、醫生、美術家，佇伊的宮內。為著欲利用in的才能；常常佇宮內舉行大宴席，指定in著做宗教上，抑是哲學上的辯論做餘興的節目。
天文學者著預言宇宙未來；鍊金術的人著表演新的發明。宴會中若有貴夫人要求講：「予阮看心適有刺激的物…」 遮的多才多藝的人，就出現開始展本事；若有熱烈辯論，致使生起衝突，遐的妝飾真媠的貴夫人，就較滿足。
美術家為著按呢，時時勞力來研究各種物，愛佇宮內出名予人呵咾。
米蘭公爵的某（Beatrice 夫人），也是一位好藝術的婦人人；伊16歲結婚，到米蘭國旺盛的時，拄拄20歲，親像囡仔愛歡喜快樂，予這个繁華的王宮，加一蕊花。雖然是一个少年美麗的婦人，伊真有才調，對政治上的手段比公爵較有，所以國家的計劃、陰謀伊攏有幫贊公爵；雖罔有幾若位外室寵姬，猶過王最疼--的就是Beatrice，若為著愛予伊歡喜，無惜濟濟的媠衫、珠寶、獵狗、詩、圖畫等等獻予伊。