婚姻問題歌
Hun-in Būn-tê-koa
文獻資訊
| 項目 | 資料 |
|---|---|
| 作者 | 賴江 Loā Kang |
| 卷期 | 台灣教會公報 |
| 卷期 | 第733號 |
| 日期 | 1950/1 |
| 頁數 | 9 |
白話字（原文數位化）
Hun-in Būn-tê-koa
1950.01 tē 733 hō p.9
(Loā Kang)
- Goá siá hun-in ê būn-tê,
Kàu-hoē put-chí toā koan-hē,
Hi-bōng bo̍k-su á hiaⁿ-ché,
uī-tio̍h chit chân tàu thê-hê.
- Kàu-hoē chò chhin mn̂g khah e̍h,
Tì-kàu bun-in toā lân-tê,
Beh chhoā m̄-chai tó chi̍t tè,
Beh kè m̄-chai tó chi̍t ê.
- Hái-kháu kàu-hoē bô iàu-kín,
In-uī liân-lo̍k ū khah kīn,
Lāi-soaⁿ kàu-hoē chin khó-lîn,
Chhoē bô ū lâng thang sio thīn.
- Pún-hoē chhin-chhiūⁿ chhài-koe-tîn,
Khan kàu ba̍t-ba̍t to sī chhin,
Beh chò hoē-iú chin iàu-kín,
Khó-sioh bô lâng lâi kóng chhin.
- Chhin-chiâⁿ uī-tio̍h bô lâng pò,
Ko͘-put jī-chiong bô nāi hô,
Hoē-goā put-sî lâi teh chò,
Kè hō͘ hoē-goā khah iâⁿ bô.
- Ū ê lú-chú to chin hó,
Khó-sioh bô lâng beh lâi pò,
Nî-hoè ná chē ná hoân-ló,
Pē-bó ê sim toā chiau-cho.
- Hiān-sî lú-chú sī chin-chē,
Thiaⁿ kóng ta̍k uī to khah ke,
Lán bô siat-hoat tī chit ê,
Chò chhut hoē-goā toā būn-tê.
- uī-tio̍h chò chhut kàu-hoē goā,
Hit ê būn-tê sī chin toā,
Chong-kàu bô siāng pháiⁿ seng-oa̍h,
Sìn sim chiām-chiām chiū pàng soah.
- Ū ê sè-sio̍k chhoā ji̍p-lâi,
Hit ê kiat-kio̍k lán lóng chai,
Bô beh tâng-sim lâi lé-pài,
Kàu boé kiat-kio̍k lóng bô lâi.
- Kàu-hoē ki-koan chin-chē hāng,
Bo̍k-tek ài kàu-hoē oa̍h-tāng,
Hun-in nā bô tàu saⁿ-kāng,
Kàu-hoē bē heng tuì chit hāng.
- Ū ê sìn-sim chin khiā-chāi,
Kian-sim beh chò kàu-hoē-lāi,
M̄-kú bô lâng lâi siāu-kài,
Beh chò hoē-lāi tuì tá lâi.
- Hi-bōng tong-kio̍k chèng Bo̍k-su,
uī-tio̍h chit chân lâi khó-lū,
Hun-in siat-hoat ē sūn-sū,
Kàu-hoē chi̍t hāng ê kip-bū.
(Loā Kang siá).
漢羅（Ùi原文改寫）
婚姻問題歌
1950.01 第733號 p.9
(賴江)
- 我寫婚姻的問題，
教會不只大關係，
希望牧師抑兄姐，
為著這層鬥提攜。
- 教會做親門較阨，
致到婚姻大難題，
欲娶毋知tó一tè,
欲嫁毋知tó一个。
- 海口教會無要緊，
因為聯絡有較近，
內山教會真可憐，
揣無有人通相thīn。
- 本會親像菜瓜藤，
牽到密密都是親，
欲做會友真要緊，
可惜無人來講親。
- 親情為著無人報，
姑不二將無奈何，
會外不時來teh做，
嫁予會外較贏無。
- 有的女子都真好，
可惜無人欲來報，
年歲那濟那煩惱，
父母的心大焦糟。
- 現時女子是真濟，
聽講逐位都較加，
咱無設法佇這个，
做出會外大問題。
- 為著做出教會外，
彼的問題是真大，
宗教無siāng歹生活，
信心漸漸就放煞。
- 有的世俗娶入來，
彼的結局咱攏知，
無欲同心來禮拜，
到尾結局攏無來。
- 教會機關真濟項，
目的愛教會活動，
婚姻若無鬥相共，
教會袂興對這項。
- 有的信心真徛在，
堅心欲做教會內，
毋過無人來紹介，
欲做會內對tá來。
- 希望當局眾牧師，
為著這層來考慮，
婚姻設法會順序，
教會一項的急務。