洪金先生的天路歷程
Âng Kim Sian-siⁿ ê Thian-lō͘ Le̍k-thêng
文獻資訊
| 項目 | 資料 |
|---|---|
| 作者 | 楊天豪 Iûⁿ Thian-hô |
| 卷期 | 台灣教會公報 |
| 卷期 | 第731號 |
| 日期 | 1949/11 |
| 頁數 | 16 |
白話字（原文數位化）
Âng Kim Sian-siⁿ ê Thian-lō͘ Le̍k-thêng
1949.11 tē 731 hō p.16
(Iûⁿ Thian-hô siá)
(Chiap 10 goe̍h 15 bīn)
Hit-sî Gô͘ Chhiu-bî iā tī hia, i sī Tâi-pak chut-gia̍p--ê, thiaⁿ-tio̍h chiū kóng, “Lí kiám ū ài khì? Nā ài, goá bîn-á-chài beh khì Tâi-lâm kā goán ko-á kóng.” I hit-sî tú-chiah chò Siù-îⁿ tiāⁿ-tio̍h nā-tiāⁿ. Goá chiū ìn i hó. Lân I-seng, I-seng-niû iā hoaⁿ-hí. Gô͘ Chhiu-bî lâi hoê-tap kóng hó, goá chiū khì Thài-pêng-kéng káng-si̍p 40 ji̍t, ū Ko Lò-thâu, Âng Tiâu-thiu, Khó͘ Chín-hong tâng-oh. āu-lâi chiū toà kàu-hoē: Sin-chhī, A-lí-káng, iâm-po͘, Ka-gī Koè-kau, Lîm-kí-po͘, Soaⁿ-pà, Lo̍k-moâ-sán, Chi̍p-chi̍p kàu Chuí-lí-kheⁿ, Tek-san.
Chit tiong-kan ū khí 3 keng pài-tn̂g; koh Lo̍k-moâ-sán ê pài-tn̂g, tuì chhân-chng siat-hoat î-choán lâi ke-chhī. Kàu taⁿ chò sìn-chiá 16 nî, chò thoân-tō 35 nî kú, koh 3 ji̍t chiū 72 hoè. Siōng-tè sù goá ióng-kiāⁿ, iáu ē sì-kè cháu, hiān-sî chi̍t ji̍t kiâⁿ nn̄g-phò͘ iáu ē kham-tit. Tuì chá kàu taⁿ, put-kò ài kóng tō-lí; lō͘-tiong iā kóng, tī jîn-ke chē iā kóng, chí-ū kóng bī-sī. Bô ha̍k-būn, n̂g-sng tah-meh ê lâng, kin-á-ji̍t ē-tit ióng-kiāⁿ chò kang, oân-choân sī Siōng-tè ê siúⁿ-sù. Nā bô pài Siōng-tè, cha̍p-sin iā sí lah! Kiat-hun chêng kap Lân I-seng pî-tāng pah-jī kin, siāng tāng bat kàu chi̍t-pah siap-peh kin, hiān-sî iáu ū chi̍t pah saⁿ-cha̍p kin.
Goá sī Ko Kim-seng Bo̍k-su ê ha̍k-seng, sī sì-cha̍p ji̍t o̍h chhut-lâi--ê; che sī goá ê ha̍k-le̍k. Chèng thoân-tō tiong goá pâi tē it, tē-it bô ha̍k-būn, tē-it gû-gōng.
Chheh-pâng nā ū hoat-bē Lô-má-jī ê chheh, goá chiū bé, hia ū--ê, ta̍k pún goá to ū. Put-kò po̍k-kek í-lâi chiū m̄-bat koh bé.
(Boē-oān)
漢羅（Ùi原文改寫）
洪金先生的天路歷程
1949.11 第731號 p.16
(楊天豪寫)
(接10月15面)
彼時吳秋微也佇遐，伊是台北卒業--的，聽著就講：「你敢有愛去？若愛，我明仔再欲去台南共阮哥仔講。」伊彼時拄才做秀圓定著若定。我就應伊好。蘭醫生、醫生娘也歡喜。吳秋微來回答講好，我就去太平境講習40日，有高lò頭、洪朝抽、許振芳同學。後--來就蹛教會--新市、阿里港、鹽埔、嘉義過溝、林杞埔、山霸、Lo̍k-moâ-sán、集集到水裡坑、竹山。
這中間有起3間拜堂；閣Lo̍k-moâ-sán的拜堂，對田庄設法移轉來街市。到今做信者16年，做傳道35年久。閣3日就72歲。上帝賜我勇健，猶會四界走，現時一日行兩舖 猶會堪--得。對早到今，不過愛講道理；路中也講，佇人家坐也講，只有講唯是。無學問，黃酸tah-meh的人，今仔日會得勇健做工，完全是上帝的賞賜。若無拜上帝，十身也死--lah！結婚前佮蘭醫生平重百二斤，上重捌到148斤，現時猶有130斤。
我是高金聲牧師的學生，是「40日學」出來--的；這是我的學歷。眾傳道中我排第1，第1無學問、第1愚戇。
冊房若有發賣羅馬字的冊，我就買，遐有--的，逐本我都有。不過爆擊以來就毋捌閣買。
(未完)