見學：田嬰你有常看著無？

Kiàn-ha̍k：Chhân-eⁿ lí ū siông khoàⁿ tio̍h bô?

文獻資訊

項目	資料
作者	無lo̍h名
卷期	台灣教會公報
卷期	第708期
日期	1947/12
頁數	11

白話字（原文數位化）

Kiàn-ha̍k

Chhân-eⁿ lí ū siông khoàⁿ tio̍h bô?

1947.12 tē 708 hō p.11

Siông, bô kui-nî lóng ū. Put-lūn tī Tâi-oân, á-sī Tn̂g-soaⁿ to lóng ū khoàⁿ-tio̍h. Seng-khu ū 6 ki kha; nn̄g-tuì si̍t, toā koh po̍h-tiah. Sek-tī ū-ê chhiah, ū-ê le̍k. Poe ê la̍t chin toā, kín chhin-chhiūⁿ hong. Thâu-khak ū nn̄g-luí ba̍k-chiu phòng-chhut koh thang-kng. Che ba̍k-chiu sī ké--ê, chhòng án-ni, sī beh phah chhiⁿ-kiaⁿ pa̍t-mi̍h ê oa̍h-mi̍h. Chin ba̍k-chiu tī chhuì-phoé nih, chin sè. Chhuì khoah, chhuì-phoé tēng, só͘-í gâu kā mi̍h.

I só͘ chia̍h ê mi̍h, sī báng-á, hô͘-sîn, boé-ia̍h, hit khoán ê thâng-thoā. Sèng-chêng tham chia̍h, chi̍t-tiám cheng kú, ē chia̍h kuí-nā cha̍p chiah. Gín-ná siông-siông ài liam chhân-eⁿ, tio̍h khǹg i m̄-thang. In-uī chhân-eⁿ sī teh chia̍h hāi- thâng, ū lī-ek lán.

Lán bat khoàⁿ tio̍h chhân-eⁿ teh poe, kīn chuí-bīn, seng-khu áu-khiau, ēng boé-á tam-chuí. He sī teh siⁿ nn̄g. I chhiu-thiⁿ pàng nn̄g, kàu mê-nî chhun-thiⁿ chiah pū-chhut. Nn̄g lo̍h tī chuí-lāi, he̍k-sī liâm tī chio̍h-nih, á-sī tiâu tī chháu-téng; tī hia pū-chhut chò sè-boé thâng. I ū 6 ki kha, chiām-chiām toā, chiū hoat-si̍t. Che thâng miâ chuí-khit-chia̍h. Seng-khu tn̂g nn̄g-chhùn, khoah nn̄g-hun poàⁿ khah ke, sek-tī bô suí, khah oá chang-sek. Sèng-chêng hiong-ok, siông-siông kā sè-bé thâng khì chia̍h. Kàu ū chi̍t-ê sî-chūn, sin-thé ià-siān bô la̍t, chia̍h-liōng kiám chió, chiū sô khì oá chuí-piⁿ ê chháu-téng, khî tī hia, ka-chiah pit-li̍h, ū pa̍t-khoán ê hêng-thé nǹg chhut-lâi; si̍t chiū hoat tn̂g. Che chiū-sī lán só͘ khoàⁿ ê chhân-eⁿ. Suí-suí ê sin-thé, chū-iû chū-chāi, poe-lâi poe-khì. Lán ū him-bō͘, beh tit-tio̍h chit-khoán bô?

漢羅（Ùi原文改寫）

見學

田嬰你有常看著無？

1947.12 第708號 p.11

常，無規年攏有。不論佇台灣，抑是唐山都攏有看著。身軀有六枝跤，兩對翅，大閣薄tiah。色緻有的赤、有的綠。飛的力真大、緊親像風。頭殼有兩蕊目睭膨出閣通光。這目睭是假--的，創按呢，是欲扑生驚別物的活物。真目睭佇喙phoé--裡，真細。喙闊，喙phoé硬，所以gâu咬物。

伊所食的物，是蠓仔、胡蠅、尾蝶，彼款的蟲thoā。性情貪食，一點鐘久，會食幾若十隻。囡仔常常愛拈田嬰，著勸伊毋通。因為田嬰是teh食害蟲，有利益咱。

咱捌看著田嬰teh飛，近水面，身軀拗曲，用尾仔tam水。彼是teh生卵。伊秋天放卵，到明年春天才孵出。卵落佇水內，或是黏佇石--裡，抑是牢佇草頂；佇遐孵出做細尾蟲。伊有6枝跤，漸漸大，就發翅。這蟲名水乞食。身軀長兩寸，闊兩分半較加，色緻無媠，較倚棕色。性情兇惡，常常咬細尾蟲去食。到有一个時陣，身体厭siān無力，食量減少，就趖去倚水邊的草頂，khî佇遐，ka-chiah pit裂，有別款的形體nǹg --出來；翅就發長。這就是咱所看的田嬰。媠媠的身體，自由自在，飛來飛去。咱有欣慕，欲得著這款--無？