見學：地，thài會振動？

Kiàn-ha̍k：Tē, thài ē tín-tāng?

文獻資訊

項目	資料
作者	無lo̍h名
卷期	台灣教會公報
卷期	第701期
日期	1947/5
頁數	11

白話字（原文數位化）

Kiàn-ha̍k

Tē, thài ē tín-tāng?

1947.05 te 701 hō p.11-12

1.Tē-kiû teh kiu.

Ke̍k kó͘-chá, tē-kiû sī jia̍t phok-phok, chhin-chhiūⁿ hoé-lô͘. āu-lâi chiām-chiām léng, chiū piàn chò nn̄g-khoán, chiū-sī thô͘ kap chuí. Thô͘, ûn-ûn-á tēng. Thô͘ tēng, chiū chiâⁿ-chò chi̍t-iân chi̍t-iân, che hō-chò tē-chân. Kian-tēng ê thô͘, pau tē-kiû, kiò-chò tē-khak.

Tē-kiû léng, chiū ē kiu, hō͘ tē-khak jiâu koh pit-li̍h. Tē-chân, sūn pit-li̍h ê choā, ū-ê chhèng koân, ū-ê lo̍h kē, á-sī pit-choā sio-kha̍p, lóng ē tín-tāng, tuì án-ni, chiah ū tē-tāng. Í-āu tē nā koh kiu, ē koh pit-li̍h, tē-tāng chiū koh khí.

2.Tōng-khang lap--lo̍h-khì.

Tī tē-chân lāi, ū toā ê tōng-khang.

Tē-bīn ê chuí chìm ji̍p tōng-khang; tōng iûⁿ--khì, téng-bīn ê tē, toā-la̍t teh lo̍h--khì, tōng-khak bē thìⁿ la̍t, tuì án-ni tōng-khak lap, tē chiū tín-tāng.

3.Hoé-soaⁿ piak-li̍h.

Tē-kiû ê lāi-bīn, ū hoé, iā ū chuí. Ē-lāi ê chuí-ian chek--the, I ê tiòng-la̍t ē piak-phoà, tē-khak ê chi̍t-pō͘-hūn, khū-khū háu, khí tē-tāng.

Chiah ê hún-chhuì ê chio̍h kap phoà-phìⁿ, chham tī chuí-iân (sic.), koân-koân pûn chhut tī khong-tiong. Tiān-kng, chio̍h-thâu ê kng, poe moá thiⁿ. Koh in-uī sio-iûⁿ ê chio̍h pûn-chhut, hoé-ian ê tîn-ai káng bān-tn̄g, hoé-hu ê hûn hoán-siā ê chêng-hêng, tì-kàu àm, bô khoàⁿ-tio̍h ji̍t-kng. Só͘-í hiah ê poe-hoé cháu-chio̍h só͘ kàu ê só͘-chāi, chiū khí hoé-chai, sio kàu kng-kng.

漢羅（Ùi原文改寫）

見學

地，thài會振動？

1947.05 第701號 p.11-12

1.地球teh 勼。

極古早，地球是熱phok-phok，親像火爐。後來漸漸冷，就變做兩款，就是土佮水。土，勻勻仔硬。土硬，就成做一煙5一煙5，這號做地層。堅硬的土，包地球，叫做地殼。.

地球冷，就會勼，予地殼jiâu閣pit裂。地層順pit裂的choā，有的chhèng 懸，有的落低，抑是pit-choā相磕，攏會振動，對按呢，才有地動。以後地若閣勼，會閣pit裂，地動就閣起。

2.洞空lap--落去。

佇地層內，有大的洞空。

地面的水，浸入洞空。洞溶--去。頂面的地，大力teh--落去，洞殼袂thìⁿ力，對按呢 洞殼lap，地就振動。

3.火山爆裂。

地球的內面，有火，也有水。地內的水煙積--teh，伊的脹力會爆破，地殼的一部份，khū-khū吼，起地動。

遮的粉碎的石佮破片，摻佇水煙，懸懸歕出佇空中。電光、石頭的光，飛滿天。閣因為燒熔的石歕出，火煙的塵埃降萬丈，火灰的雲反射的情形，致到暗，無看著日光。所以遐的飛火走石所到的所在，就起火災，燒到光光。