見學：地thài會振動？
Kiàn-ha̍k：Tē thài ē tín-tāng?
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第700期 |
| 日期 | 1947/4 |
| 頁數 | 11 |
白話字（原文數位化）
Kiàn-ha̍k
Tē thài ē tín-tāng?
1947.04 tē 700 hō p.11
Pún eng-kai tio̍h liâm-piⁿ ìn chheng-chhó, chóng-sī uī-tio̍h beh hō só͘ ìn-tap ê khan bêng, khah ū chhù-bī. Só͘-í tio̍h seng kóng hiah-ê kap tē-tāng ū kan- sia̍p--ê kì tī chia.
Téng-bīn ū kóng, “Tē-chín tài” hit kù oē, ài lâi kóng khah siông-sè. Tē- kiû bīn ū chi̍t-choā ke̍k toā ê pit-li̍h, tī-sî chiah pit, bē thang khe-khó. Chit- choā ê pit-li̍h, chha-put-to tī tē-kiû ê poàⁿ-bīn oe̍h chi̍t-choā, tú-hó chiâⁿ-chò chi̍t-tiâu toā kau. Chit-ê pit-li̍h ê só͘-chāi, muí-pái nā pang lo̍k-khì, tē-khak tek-khak in-uī án-ni lâi iô-choah. Koh ta̍k pái, hit-tiâu kau ê choân-thé, chiū- sī tuì tē-kiû ê poàⁿ-bīn, thoân i ê tín-tāng kàu pa̍t só͘-chāi. Tē-chín ha̍k ê sian-siⁿ, chheng chit-tiâu toā-kau hō-chò tē-chín-tài.
Chit-choā tē-chín-tài, iân-tn̂g kàu sím-mi̍h só͘-chāi? Chiū-sī sūn Lâm A- bí-lī-ka ê sai-hái-hoāⁿ, kàu Pak A-bí-lī-ka ê A-lah-su-ka, keng-koè hái-té chiūⁿ pak, tuì tò-pêng oat-koè, keng-koè Pí- lēng hái-kiap ê A-ni-iû-hiong kûn-tó, koh keng-koè Chhian-tó, lo̍h lâm, thong-koè Pông-chóng ê poàⁿ-tó, I-tō͘ ê poàⁿ-tó, Kí-i ê poàⁿ-tó, kap Sù-kok ê hái-bīn. Jiân-āu keng-koè Tâi-oân kàu Kńg-tang. Koh-chài siōng-lio̍k, keng-koè Se-chōng, Hi-má-lia̍p-a ê soaⁿ-kha. iū-koh ji̍p tī hái--ni̍h, keng-koè Tē-tiong-hái, chhut- sai kàu Au-chiu ê tāi-lio̍k uî-chí.
Tē-chín ha̍k ê sian-siⁿ, hun-piat cháu tī hái--ni̍h ê toā-kau, hō-chò Thài-pêng-iûⁿ ê Tē-chín-tài: cháu tī lio̍k-tē ê toā-kau, hō-chò Au, A. ê Tē-chín-tài. Miâ, sui-sī án-ni hō, chóng-sī nn̄g-tiâu lóng sio-liân. Tī 1923 nî, 9 goe̍h it ji̍t, Tang-kiaⁿ toā tē-tāng, tī Ò-kok ê kiaⁿ-siâⁿ Bí-ian-ná iā ū kám-tōng--tio̍h, lī Tang-kiaⁿ nn̄g-bān lí ê hn̄g. án-ni, sī chèng-bêng hái-té ê toā-kau kap lio̍k-tē ê toā-kau ū liân-lo̍k. Tī siāng chi̍t-tiâu soàⁿ ê téng-bīn, tē-tāng nā lio̍h-á toā, iô-choah ê la̍t, chi̍t-biáu kú, ē kiâⁿ nn̄g-lí goā, thoân kàu kui-tiâu ê tē-chín-tài.
漢羅（Ùi原文改寫）
見學
地thài會振動？
1947.04 第700號 p.11
本應該著連鞭印清楚，總是為著欲予所應答的刊明，較有趣味。所以著先講遐的佮地動有干涉--的記佇遮。
頂面有講：「地震帶」彼句話，愛來講較詳細。地球面有一choā極大的pit裂，佇時才pit，袂通稽考。這choā的pit裂，差不多佇地球的半面劃一choā，拄好成做一條大溝。這个pit裂的所在，每擺若崩--落去，地殼的確因為按呢來搖泏。閣逐擺，彼條溝的全體，就是對地球的半面，傳伊的振動到別所在。地震學的先生，稱這條大溝號做地震帶。
這choā地震帶，延長到甚物所在？就是順南阿美利加的西海岸，到北阿美利加的阿拉斯加，經過海底上北，對倒爿越--過，經過Pí-lēng海峽的A-ni-iû-hiong群島，閣經過千島，落南，通過Pông-chóng的半島，伊豆的半島，紀伊的半島，佮四國的海面。然後經過台灣到廣東。閣再上陸，經過西藏，喜馬拉亞的山腳。又閣入佇海裡，經過地中海，出西到歐洲的大陸為止。
地震學的先生，分別走佇海裡的大溝，號做太平洋的地震帶；走佇陸地的大溝，號做歐亞的地震帶。名，雖是按呢號，總是兩條攏相連。佇1923年9月1日，東京大地動，佇奧國的京城維也納也有感動--著，離東京兩萬里的遠。按呢，是証明海底的大溝佮陸地的大溝有連絡。佇像一條線的頂面，地動若略仔大，搖泏的力，一秒久，會行兩里外，傳到規條的地震帶。