見學：地thài會振動

Kiàn-ha̍k: Tē thài ê tín-tāng

文獻資訊

項目	資料
作者	無lo̍h名
卷期	台灣教會公報
卷期	第699期
日期	1947/3
頁數	11

白話字（原文數位化）

Kiàn-ha̍k

Tē thài ê tín-tāng

1947.03  tē 699 hō  p.11-12

Tiau-cha tē-tāng ê hoat-siⁿ, Sè-kài ta̍k-kok ê phó-piàn ke̍k bô pêng-téng; só͘ hoat-hiān ê hoê-sò͘ kap I ê kiông-jio̍k, ta̍k só͘-chāi chám-jiân bô siāng.   Chhin-chhiūⁿ tī Ji̍t-pún kap Lâm A-bi-lī-ka ê sai-pêng-hoāⁿ, tē-tāng choè tē-it chē.  Ngô͘-lô-su Sai-pí-lī-a ê pak-pō͘, kap A-hui-lī-ka ê tiong-pō͘ sī choè chió; chiū nā ū, iā-sī chin bî-jio̍k.  Só͘-Í U-te̍k-su Sian-siⁿ, chiong Sè-kài ê tē tín-tāng, pun chò saⁿ toā khu-he̍k.

1.Chē chín (多震).  Hoat-siⁿ tē- tāng choè tē-it chē ê só͘-chāi.

2.Chió chín (寡震).  Hoat-siⁿ tē- tāng choè tē-it chió ê só͘-chāi.

3.Bô chín (無震).  Sī bô tē-tāng ê só͘-chāi.

Tē-tāng choè tē-it chē koh kiông ê só͘-chāi sī Thài-pêng-iûⁿ ê chiu-uî, kap hoâiⁿ koè Ò-kok Au-chiu kap Tiong Bí ê Tē-tiong-hái.  Sè-kài ê tē-tāng, thóng-kè chò 10 hūn.  Tē-tiong-hái choân-thé iok chiàm 5 hūn.  Thài-pêng-iûⁿ chiu- uî iok chiàm 4 hūn, Kî-û chi̍t-hūn soàⁿ- soàⁿ pun tī Sè-kài ta̍k kok.  Tuì án-ni lâi khoàⁿ, toā tē-chín tài (地震帶).  Kap oa̍h hoé-soaⁿ pûn-chhut choè kek-lia̍t- tài (激烈帶) kap khut-khiok ê soaⁿ-niá tē, ū choè bi̍t-chhiat ê koan-hē.

Sè-kài, ū chi̍t-choā lō͘, kīn tī hia ê tē-hng, siông-siông tú-tio̍h tē-tāng, hō-miâ Tē-chín tài, Tài, ké-soeh, sī toà, chhin-chhiūⁿ io-toà, khò͘-toà hit-hō, ì-sù, sī hit choā ê tē-hng.

漢羅（Ùi原文改寫）

見學

地thài會振動

1947.03  第699號  p.11-12

調查地動的發生，世界逐國的普遍極無平等；所發現的回數佮伊的強弱，逐所在chám然無像。親像佇日本佮南亞美利加的西爿岸，地動最第一濟。俄羅斯西比利亞的北部佮阿非利加中部是最少；就若有，也是真微弱。所以U-te̍k-su先生，將世界的地振動，分做三大區域。

1.濟震（多震）。發生地動最第一濟的所在。

2.少震(寡震)。發生地動最第一少的所在。

3.無震(無震)。是無地動的所在。

地動最第一濟閣強的所在是太平洋的周圍，佮橫過奧國歐洲佮中美的地中海。世界的地動，統計做十份。地中海全体約佔5份。太平洋周圍約佔4份，其餘一份散散分佇世界逐國。對按呢來看，大地震帶，佮活火山歕出最激烈帶佮屈曲的山嶺地，有最密切的關係。

世界，有一choā路，近佇遐的地方，常常拄著地動，號名地震帶，帶，解說是帶，親像腰帶、褲帶彼號，意思，是彼choā的地方。