馬偕醫院新院長
Má-kai I-īⁿ Sin ĪN-tiúⁿ
文獻資訊
| 項目 | 資料 |
|---|---|
| 作者 | 上山生 Siōng-san seng |
| 卷期 | 北部教會 |
| 卷期 | 第681期 |
| 日期 | 1941/12 |
| 頁數 | 25 |
白話字（原文數位化）
Má-kai I-īⁿ Sin ĪN-tiúⁿ
Siōng-san seng
1941年12月681期 25
Pak-pō͘ Kàu-hoē só͘ keng-êng î-it ê i-liâu ki-koan , Má-kai I-īⁿ tuì chiap-siu í-lâi, sui-jiân bô ū it-sî-tek ê piàn-hoà, chóng-sī chiām-chiām ū teh hoat-tián ê sè-bīn. Chiàu ĪN-tiúⁿ Lí Ta̍t-chong Sian-siⁿ tī 10 ge̍h tiong í-keng sî-chit, Lí-sū-hoē sīn-tiōng chhoan-hêng ê kiat-kó, boán-tiûⁿ it-tì koat-tēng ài phèng-chhiáⁿ pún-īⁿ lí-sū Tiū-tiân Thian-lâi(稻田天來) Sian-siⁿ choè hō͘-jīm ĪN-tiúⁿ. Kau-sia̍p ê kiat-kó ū tit-tio̍h i hoaⁿ-hí sêng-lo̍k. Tī 10 ge̍h 25 ji̍t í-keng chiū-jīm , Tiū-tiân Sian-siⁿ tuì 大正六年 ū khì 南洋英領北 ボルネオ tit-tio̍h Lûn-tun chèng-hù ê bián-hú jīm-bēng, Chóng-tok-hú pīⁿ-īⁿ i-koaⁿ kap choè タワオ Chèng-hú pīⁿ-īⁿ ê ĪN-tiúⁿ. āu-lâi ū ka-kī khai-gia̍p , tit-tio̍h chin toā ê sêng-kong, Kàu tī Boán-chiu sū-piàn ê sî chiah tńg-lâi Tâi-oân khai-gia̍p 同仁醫院 tī 台北市太平町 , ia̍h sī chin ū jîn-khì, i ê choan-bûn sī lāi-kho kap siáu-jî-kho. Chit pái lán Má-kai I-īⁿ oē thang tit-tio̍h i lâi choè īⁿ-tiúⁿ, hō͘ lán tāi-ke chin thang an-sim ê só͘-chāi.
Tiū-tiân Sian-siⁿ hiān-chāi sī Saⁿ-têng-po͘ kàu-hoē jia̍t-sim ê Tiúⁿ-ló, tuì kàu-hoē chin chhut-la̍t hōng-sū. I ê thé-keh koân-toā koh put-chí ū keng-êng ê châi. Tāi-ke tuì i khē chin toā ê kî-thāi, ǹg-bāng chhú khì ê īⁿ-sè oē toā-toā hoat-tián. Tuì Tiū-tiân ĪN-tiúⁿ chiū-jīm í-lâi, īⁿ-lāi ê chè-tō͘ chiām-chiām kái-siān. Tuì goā-lâi ê hoān-chiá muí-ji̍t chín-chhat. Sî-kan lē-hêng, m̄-bián hō͘ hoān-chiá tán kàu kè-tàu. ēng chhin-chhiat kap èng hoān-chiá ê piān-lī choè tē-it. Tuì án-ni keng-êng ê sêng-chek chiām-chiām teh hiòng-siōng. Nā chiàu chit khoán ê sè-bīn, si̍t-chāi ū koh khóng-tiong sin-siat jíⁿ-phīⁿ ian-âu kho kap khí-kho ê pit-iàu (hiān-chai kè-e̍k tiong) Khiok hiān-sî ê si-siat tī Tó-lāi su-li̍p chong-ha̍p pīⁿ-īⁿ tiong, í-keng thang kóng sī tē-it uī. Hiān-sî pīⁿ-sek bîn-chhn̂g 70 téng, chit-oân īⁿ-tiúⁿ í-hā gō͘-cha̍p goā miâ. Má-kai I-īⁿ ê thoân-thóng sī Sán-hū-jîn-kho goā-kho choè tē-it chhut-miâ , hiān-sî Sán-hū-jîn -kho ê I-tiúⁿ sī I-ha̍k Phok-sū Tân Kéng-siông Sian-siⁿ . Gán-kho I-tiúⁿ Chiu Siù-ngô͘ Sian-siⁿ. Loē , Siáu-jî-kho sī ĪN-tiúⁿ Tiū-tiân Thian-lâi Sian-siⁿ tam-tng . Kok-kho lóng sī ū keng-giām láu-liān ê sian-siⁿ, hō͘ hoān-chiá oē thang choa̍t-tuì an-sim sìn-iōng. ǹg-bāng lia̍t-uī khoàⁿ Pò ê hiaⁿ-chí toā-toā uī-tio̍h lán ê Má-kai I-īⁿ soan-thoân chio-ho͘ lâng lâi lī-iōng hō͘ in m̄-nā i-hó in ê jio̍k-thé ia̍h oē tit-tio̍h hok-im chin ê tē-lí lâi kiù in ê lêng-hûn.
漢羅（Ùi原文改寫）
馬偕醫院新院長
上山生
1941年12月681期 25
北部教會所經營唯一的醫療機關，馬偕醫院對接收以來，雖然無有一時tek 的變化，總是漸漸有teh發展的勢面。照院長李達莊先生佇10月中已經辭職，理事會慎重chhoan-hêng 的結果，滿場一致決定愛聘請本院理事稻田天來(稻田天來)先生做後任院長。交涉的結果有得著伊歡喜承諾。佇10月25日已經就任，稻田先生對大正六年有去南洋英領北ボルネオ得著倫敦政府的免許任命，總督府病院醫官佮做タワオ政府病院的院長。後來有家己開業，得著真大的成功，到佇滿州事變的時才轉來台灣開業同仁醫院佇台北市太平町 ，亦是真有人氣，伊的專門是內科佮小兒科。這擺咱馬偕醫院會通得著伊來做院長，予咱大家真通安心的所在。
稻田先生現在是三重埔教會熱心的長老，對教會真出力奉事。伊的體格懸大閣不止有經營的才。大家對伊khē真大的期待，向望此去的院勢會大大發展。對稻田院長就任以來，院內的制度漸漸改善。對外來的患者每日診察。時間lē-hêng，毋免予患者等到過晝。用親切佮應患者的便利做第一。對按呢經營的成績漸漸teh向上。若照這款的勢面，實在有閣khóng中新設耳鼻咽喉科佮齒科的必要(現知計畫中)卻現時的施設佇島內私立綜合病院中，已經通講是第一位。現時病室眠床70頂，職員院長以下五十外名。馬偕醫院的傳統是產婦人科外科做第一出名，現時產婦人科的院長是醫學博士陳Kéng-siông先生。眼科院長周Siù-ngô͘先生。內，小兒科是院長稻田天來先生擔當。各科攏是有經驗老練的先生，予患者會通絕對安心信用。向望列位看報的兄姊大大為著咱的馬偕醫院宣傳招呼人來利用予in m̄-nā醫好in 的肉體亦會得著福音真的地理來救in 的靈魂。