教會諸機關teh活動
Kàu-hoē chu ki-koan teh oa̍h-tāng
文獻資訊
| 項目 | 資料 |
|---|---|
| 作者 | 上山生 Siōng-san seng |
| 卷期 | 北部教會 |
| 卷期 | 第681期 |
| 日期 | 1941/12 |
| 頁數 | 19-20 |
白話字（原文數位化）
Kàu-hoē chu ki-koan teh oa̍h-tāng
Siōng-san seng
1941年12月681期 19-20
Soan-kàu-su í-keng tńg-khì liáu ,taⁿ lán ê kàu-hoē ê chu ki-koan cháiⁿ-iūⁿ teh oa̍h-tāng. Thoân-tō-kio̍k siáⁿ khoán? Sîn-ha̍k-hāu siáⁿ khoán? Má-kai I-koán? Beh tuì tó-uī thang tit-tio̍h chîⁿ lâi î-chhî chiah ê sū-gia̍p ? Lán ê choân kàu-hoē teh koan-sim teh khoà-lū. Ū lâng teh phah-sǹg soan-kàu-su káⁿ ū lâu koá hiān-kim thang choè kuí-nā nî ê lō͘-ēng, ia̍h teh phah-sǹg soan-kàu-su bô joā-kú beh koh lâi, kan-ta khoà-lū chit nn̄g saⁿ nî ê sū, kan-ta teh chip siú kū sî ê sū, khoàⁿ oē koh tò-tńg tī kū-sî ê chōng-thài, lóng bô beh hùn-hoat lâi èng kin-ná-ji̍t ê sî-sè. Kan-ta oa̍t-thâu khoàⁿ āu-bīn, bô beh hiòng-chêng chiàu Siōng-tè ê un-sù, chiàu Siōng-tè só͘ kā lán tiāⁿ-tio̍h, só͘ kā lán an-pâi ê lâi oāⁿ sin chìn-pō͘. Ū lâng thiau-tî m̄ sì-chiàⁿ jīn-sek kin-á-ji̍t ê sî-sè, sì-koè soan-thoân soan-kàu-su beh koh lâi, hoán-tuì kin-á-ji̍t kàu-hoē kok ki-koan só͘ pān ê sū. Koan-hē Thoân-tō-kio̍k, Sîn-ha̍k-hāu, I-koán ê sū m̄-nā m̄ hia̍p-le̍k, hoán-tńg ēng chióng-chióng ê hong-hoat beh hām-hāi. Chiàu in só͘ siūⁿ chiah ê ki-koan, nā m̄-sī soan-kàu-su teh keng-êng mài siat khah hó. Chóng-sī chit hoán sī pêng-sò͘ siū soan-kàu-su ê tì-ìm ê lâng ê kiàn-kái, m̄-sī chèng-tong ê Ki-tok-tô͘ ê khoàⁿ-hoat. uī Chú jia̍t-sim ê Ki-tok-tô͘ ê tek-khak tio̍h sīn-tiōng khó-lū , m̄-thang khoài-khoài ji̍p bê-he̍k. Soan-kàu-su lâi thoân tō-lí hō͘ lán tit-tio̍h Chú ê hok-im, lán tio̍h kā i kám-siā. Chóng-sī nā khoàⁿ Chú hō͘ lán ê un-sù ke̍k chió éng-kiú tio̍h oá-loā soan-kàu-su chiah oē î-chhî lán ê kàu-hoē, án-ni sī chám-jiân ko͘-hū Chú ê toā-un. Koh nā-sī ài pn̄g soan-kàu-su ê tì-ìm, tì-kàu lâi hō͘ kàu-hoē boē chìn-pō͘ ê, sī teh hām-hāi Siōng-tè ê kàu-hoē ê iûⁿ-kûn.
Lán ê Thoân-tō-kio̍k hiān-sî toā-toā teh oa̍h-tāng , teh chún-pī beh toā-toā iu-gū thoân-tō-su ê sū. Chāi-lâi tuì thoân-tō-su ê thāi-gú chin khek-po̍k, hō͘ thoân-tō-su boē-oē choan-sim thoân-kàu, in-uī seng-oa̍h boē-oē an-tēng , khut-sí choē-choē iú-uî ê jîn-bu̍t, tuì án-ni kàu-hoē boē-oē chín-heng, éng-kiú tio̍h choè pī Soan-tō-hoē. Taⁿ chit khoán ê chè-tō͘ tio̍h kái-siān, tio̍h hō͘ choè kang ê lâng ū la̍t thang choè kang. Chóng-sī ū lâng teh hong-hāi, só͘-í kàu chit-chūn iáu-boē thang chiâⁿ, chóng-sī ǹg-bāng bô kú oē thang chìn-hêng.
Lán ê Sîn-ha̍k-hāu tuì soan-kàu-su tńg-khì, tī kin-nî hoán-tńg sin siat lú-chú-pō͘, chiū-sī lú Sîn-ha̍k kap Ko-téng lú-ha̍k-pō͘ , lāi-iông ia̍h kè put-chí kái-siān, chhiong-si̍t, si̍t-chāi sī chin thang hoaⁿ-hí kám-siā ê sū. Sui-jiân ū lâng ài hāi, khó͘ Sîn-ha̍k-hāu m̄ tó, chóng-sī kai-chài tit-tio̍h Siōng-tè ê chiàu-kò͘ kiān-choân teh chìn-pō͘. Thoân-tō-kio̍k kap Sîn-ha̍k-hāu lóng sī teh ēng chîⁿ ê ki-koan boē thang seng-sán, muí ge̍h ji̍t lóng sī tuì Châi-thoân-hoat-jîn tī teh kiong-kip î-chhî ê khuì-la̍t. Chá ji̍t ê hoat-jîn m̄-bat ū hiān-kim , taⁿ ê hoat-jîn muí ge̍h só͘ chi-chhut m̄-sī sió-khoá.
Lūn Má-kai I-īⁿ ê keng-êng, lán pún m̄-sī uī-tio̍h beh thàn chîⁿ , chóng-sī nā tit-tio̍h ha̍p-lí-tek ê keng-êng, sui-jiân sî-liâu choè chû-siān ê sū-gia̍p ia̍h m̄-bián khoat-sún. I-koán ê sū-gia̍p tuì ín-kè kàu taⁿ bē ū toā kái-siān, in-uī ū chióng-chióng ê lân-koan, só͘-í boē thang chiàu sim só͘ ài lâi kái-siān. Chóng-sī keng-êng ê sêng-chek kap sìn-iōng , bô khah su chá-ji̍t Soan-kàu-su tī-teh ê sî. Chiân ĪN-tiúⁿ Lí Ta̍t-chong Sian-siⁿ kàu-jīm sî-chit, só͘-í Lí-sū-hoē suî-sî tuì lí-sū tiong soán-chhut. Tiū-tiân Thiān-lâi Sian-siⁿ choè tāi-lí īⁿ-tiúⁿ. Tī pún ge̍h 18 ji̍t í-keng sū-bū ín-kè hó-sè. Sin īⁿ-tiúⁿ só͘ tam-tng sī Lāi-kho kap Siáu-jî-kho. Tī Tâi-pak tiong sǹg sī iú-bêng , ǹg-bāng oē thang hoat-hui i ê chhiú-oán hō͘ Má-kai I-īⁿ tit-tio̍h ha̍p-lí-tek ê keng-êng. Í-goā Goā-kho, Sán-kho , Gán-kho lóng ū choan-bûn ê sian-siⁿ put-chí ū hoat-hui in ê chhiú-oán, tit-tio̍h kàu-hoē lāi-goā to-tāi ê sìn-gióng. Hiān-sî kok kho ji̍p īⁿ ê hoān-chiá moá-moá , ǹg-bāng chhú-khì ê sêng-chek toā-toā hiòng-siōng. Bô lūn thoân-tō-kio̍k , Sîn-ha̍k-hāu á-sī I-koán , tī kin-á-ji̍t m̄-bián Soan-kàu-su koh lâi lán khak-si̍t oē thang keng-êng, koh-chài kia̍h thâu teh khoàⁿ Soan-kàu-su beh lâi chín-chè á-bô, si̍t-chāi bô ì-gī. àm-chīⁿ teh soan-thoân Soan-kàu-su beh koh-lâi ê, sī teh phah-loān lán ê su-sióng, oē hāi-tio̍h lán kok ki-koan ê sū-gia̍p lán tāi-ke tio̍h tiuⁿ-tî, bo̍h-tit khin-khin sìn goā-uī só͘ lâi ê siau-sit. Lán tio̍h chhim-chhim jīn-sek kin-á-ji̍t ê sî-kio̍k.
漢羅（Ùi原文改寫）
教會諸機關teh活動
上山生
1941年12月681期 19-20
宣教師已經轉去了，taⁿ咱的教會的諸機關怎樣teh活動。傳道局啥款？神學校啥款？馬偕醫館？欲對tó位通得著錢來維持chiah 的事業？咱的全教會teh關心teh掛慮。有人teh拍算宣教師敢有留寡現金通做幾若年的路用，亦teh拍算宣教師無偌久欲閣來，kan-ta掛慮這兩三年的事，kan-ta teh chip守舊時的事，看會閣倒轉佇舊時的狀態，攏無欲奮發來應今仔日的時勢。Kan-ta越頭看後面，無欲向前照上帝的恩賜，照上帝所共咱定著，所共咱安排的來換新進步。有人thiau-tî毋四正認識今仔日的時勢，四界宣傳宣教師欲閣來，反對今仔日教會各機關所辦的事。關係傳道局，神學校，醫館的事m̄-nā毋協力，反轉用種種的方法欲陷害。照in所想chiah 的機關，若毋是宣教師teh經營mài設較好。總是這反是平素受宣教師的致蔭的人的見解，毋是正當的基督徒的看法。為主熱心的基督徒的的確著慎重考慮，毋通快快入迷惑。宣教師來傳道理予咱得著主的福音，咱著共伊感謝。總是若看主予咱的恩賜極少永久著倚賴宣教師才會維持咱的教會，按呢是嶄然辜負主的大恩。閣若是愛pn̄g宣教師的致蔭，致到來予教會袂進步的，是teh陷害上帝的教會的羊群。
咱的傳道局現時大大teh活動，teh準備欲大大優遇傳道師的事。在來對傳道師的待遇真刻薄，予傳道師袂會專心傳教，因為生活袂會安定，khut死濟濟有為的人物，對按呢教會袂會振興，永久著做pī宣道會。Taⁿ這款的制度著改善，著予做工的人有力通做工。總是有人teh hong害，所以到這陣猶袂通成，總是向望無久會通進行。
咱的神學校對宣教師轉去，佇今年反轉新設女子部，就是女神學佮高等女學部，內容亦改不止改善，充實，實在是真通歡喜感謝的事。雖然有人愛害，khó͘神學校毋倒，總是佳哉得著上帝的照顧健全teh進步。傳道局佮神學校攏是teh用錢的機關袂通生產，每月日攏是對財團法人佇teh供給維持的氣力。早日的法人毋捌有現金，taⁿ 的法人每月所支出毋是小可。
論馬偕醫院的經營，咱本毋是為著欲趁錢，總是若得著合理的的經營，雖然sî-liâu做慈善的事業亦毋免缺損。醫館的事業對引繼到taⁿ未有大改善，因為有種種的難關，所以袂通照心所愛來改善。總是經營的成績佮信用，無較輸早日宣教師佇teh 的時。前院長李達莊先生到任辭職，所以理事會隨時對理事中選出。稻田天來先生做代理院長。佇本月18日已經事務引繼好勢。新院長所擔當是內科佮小兒科。佇台北中算是有名，向望會通發揮伊的手腕予馬偕醫院得著合理tek 的經營。以外外科，產科，眼科攏有專門的先生不止有發揮in 的手腕，得著教會內外to-tāi 的信仰。現時各科入院的患者滿滿，向望此去的成績大大向上。無論傳道局，神學校抑是醫館，佇今仔日毋免宣教師閣來咱確實會通經營，閣再kia̍h頭teh看宣教師欲來賑濟抑無，實在無意義。暗靜teh宣傳宣教師欲閣來的，是teh拍亂咱的思想，會害著咱各機關的事業咱大家著張持，莫得輕輕信外位所來的消息。咱著深深認識今仔日的時局。