聖冊的權威
Sèng-chheh ê koân-ui
文獻資訊
| 項目 | 資料 |
|---|---|
| 作者 | 黃德輝 N̂g Tek-hui |
| 卷期 | 台灣教會公報 |
| 卷期 | 第680期 |
| 日期 | 1941/11 |
| 頁數 | 2-5 |
白話字（原文數位化）
Sèng chheh ê koân-ui
N̂g Tek-hui
1941年11月680期 2-5
Goá bô bē kì-tit Lí ê oē(Si 119:16)
Chit kù chiū-sī Si-jîn só͘ kóng--ê, iā i chi̍t pái koè chi̍t pái án-ni kóng. Chit chiuⁿ sī Si-phian choè tē-it tn̂g--ê, iā sī Sèng-chheh choân-pún choè tē-it tn̂g--ê, ū 176 chat, iā tī ta̍k chat ū tîn-su̍t Sèng-chheh, ū-sî kiò-chò Siōng-tè ê oē, ū-sî sī lu̍t-hoat. Si-jîn chi̍t pái koè chi̍t pái kóng, goá beh loân-bō͘ chun-siú Lí kan-chèng ê oē, goá beh siú Lí kà-sī ê oē, goá bô boē kì-tit Lí ê oē.
Chóng-sī taⁿ chin-chē lâng tī kin-ná-ji̍t sêng-si̍t bô ún-moâ, in ún-tàng bô kóng “goá bô boē kì-tit Lí ê oē”. Chiū-sī kóng, “Goá boē kì-tit Lí ê oē lah”. iā m̄-sī kóng, “Goá beh loân-bō͘ chun-siú i,” chiū-sī “goá khoàⁿ-khin i”, in bô beh tī chē-chē ki-hoē lâi cheng-chìn bô boē kì-tit I ê oē, hoán-tńg thê-kiong lí-iû, cháiⁿ-iūⁿ in bē kì-tit i.
-
In-uī ū chin-chē pa̍t-mi̍h thang tha̍k. Lán ê chhù sin-bûn, pò-choá chin-chē, kan-ta beh kā iáⁿ-koè to bē liáu, kî-thaⁿ iáu-kú ū bûn-ha̍k ê chheh. Só͘-í Sèng-chheh tī chiah ê lâng ê chhù boē kì-tit. Lán tāi-ke lóng chai lán chiap-tio̍h sin-bûn ê tiau-khan(朝刊), se̍k-khan(夕刊), í-ki̍p sin ê cha̍p-chì, siáu-soat ê sî, chin hoaⁿ-hí pàng-sak teh chò ê kang the̍h lâi tha̍k, tì-kàu lán boē kì-tit tha̍k Siōng-tè ê oē.
-
Lán boē kì-tit I ê oē, in-uī lán tuì Sèng-chheh ê su-siúⁿ piàn-oāⁿ. Tuì pêng-siông ê lâng Sèng-chheh taⁿ m̄-sī Sèng-chheh, in chai hiān-chāi ê kho-ha̍k, phoe-phêng Chhòng-sè-kì, in bô liû-sim Ná-a, Í-sat, Ngá-kok só͘ kiâⁿ ê sū, in hoán-tuì Sū-su ê chân-jím, iá-bân. Chū-jiân bô koan-sim Í-sek-lia̍t ê gî-sek kap sian-ti téng-téng. iā soà mn̄g Hok-im-su sī chin-si̍t thang sìn mah? Pó-lô kiám m̄-sī beh koh siat chi̍t ê sin ê chong-kàu mah? Tuì án-ni in siūⁿ Sèng-chheh m̄-sī oân-choân, iū pàng bē kì-tit.
-
Lán bē kì-tit Sèng-chheh, in-uī tuì tú-á hō͘ lán teh chù-ì ê kî-thaⁿ ê keng-chheh kap pa̍t chong-kàu ê bûn-ha̍k giú lán ê in-toaⁿ. Lán sè-hàn ê sî, lán siūⁿ Sèng-chheh sī î-it Sèng ê chheh. Chóng-sī taⁿ lán seng-tióng iā ū gián-kiù pí-kàu chong-kàu, lán chai chin-chē, lán kóng, “Oh, kî-biāu ah.” Khóng-chú ê kà-sī, á-sī Sek-khia ko-siōng ê oē, tuì lán khoàⁿ pa̍t chong-kàu ê bûn-ha̍k, soà bē kì-tit ka-kī ê; tuì lán thiaⁿ pa̍t ê gâu-lâng kap tang-hong(東方) ê sian-ti ê oē, lán soà bē kì-tit tuì Se-nái lâi ê siaⁿ, Si-phian ê im-ga̍k, Í-sài-a, A-mô͘-sū ê kà-sī, San-siōng ê suî-hùn kap Sù-tô͘ só͘ kà-sī ê.
-
Chin-chē lâng bē kì-tit I ê lu̍t-hoat, in-uī in thiaⁿ pa̍t ê siān-giân(善言) kap ēng hiān-tāi ê hong-hoat beh liáu-kái it-chhè ê sîn-pì. In thiaⁿ Sim-lêng-lūn(心靈論) iā si̍t-hêng tì-sek ê siu ióng, in chin bô êng tha̍k Sèng-chheh ê chhiû-ín(手引), iā kèng-jiân bē kì-tit Sèng-chheh iā in uī-tio̍h beh ìn-ta̍p jîn-seng ê kin-pún būn-tê bô khoàⁿ Sèng-chheh, hoán-tńg khoàⁿ lēng-èng-poâⁿ(靈應盤=O͘ija board) . Só͘-í tuì í-siōng chiah ê bāng(夢) in iáu ū Sèng-chheh, chóng-sī in bô ēng i. In hoê-sióng gin-ná ê sî cháiⁿ-iūⁿ tha̍k--i. Chóng-sī in taⁿ chiâⁿ-chò toā-lâng, iā in ê Sèng-chheh khǹg tī piⁿ-á, tī in ê sim-lāi bē kì-tit Sèng-chheh. Só͘-í in bē thang kóng, “goá bô bē kì-tit Lí ê oē.” hoán-tńg tio̍h jīn “goá bē kì-tit Lí ê oē”.
Chóng-sī chhú-hoê lán ê Sèng-chheh ê sî-chūn kàu lah. Sî-kan kám-tōng lán chhú-hoê lán ê Sèng-chheh, chin-si̍t Sèng-chheh sī lán kha-chêng ê teng, lō͘-chiūⁿ ê kng, it-chhè kò-jîn, thoân-thé ê ǹg-bāng kap chong-kàu-tek ê chū-iû lóng oá-khò Sèng-chheh. Lán pí-kàu pa̍t chong-kàu ê keng-tián ê sî, hiah ê bē thang kap Sèng-chheh tông-lia̍t, iā lán sìn Sèng-chheh só͘ kóng ū koân-ui, in-uī sī “Chú só͘ kóng--ê.”
Só͘-í nā ū lâng bē kì-tit in ê Sèng-chheh chiū-sī chin toā ê sū, in-uī in sit-lo̍h Sèng-chheh ê koân-ui ê sìn-gióng. Kin-ná-ji̍t bô-lūn tī siáⁿ só͘-chāi, lâng teh chhiau-chhoē koân-ui ê siaⁿ, chóng-sī in bē kì-tit I ê siaⁿ(oē). Lán nā koh chi̍t-pái tī lán ê thâu-náu-lāi(tit-tio̍h) chai Sèng-chheh só͘ kóng sī koân-ui, chiū lán oē koh-chài chhin-chhiūⁿ Si-jîn só͘ kóng, “Goá bô bē kì-tit Lí ê oē.” Taⁿ hō͘ goá lâi kóng kuí hāng ê lí-iû, cháiⁿ-iūⁿ tio̍h sìn Sèng-chheh ê koân-ui.
-
Tuì Sèng-chheh ê hoat-hêng. Siat-sú goá ū chi̍t pún chheh tī goá ê chheh-tû-lāi, iā chit pún chi̍t nî koè chi̍t nî chin chē lâng bé. Sui-jiân ū chin-chē sin ê chheh chhut-pán, iáu-kú chit pún chheh tī chheh-tiàm put-sî sī choè tē-it chē lâng bé, chiū goá ún-tàng beh kóng, tī chit pún chheh ū éng-kiú put-piàn ê mi̍h tī-teh, tio̍h kín koh ìn chiah ē hù. Siáu-soat nā ū 10 bān pún ê tho̍k-chiá, thang kóng sī hi-iú(稀有) ê sêng-kong. Chóng-sī Sèng-chheh ê bē chhut, muí-ji̍t pêng-kin 4 bān pún, tuì án-ni lán thang hó-táⁿ kóng Sèng-chheh ū poâⁿ-koè kî-thaⁿ pa̍t khoán chheh só͘ bô, chiū-sī lâng kám-kak in só͘ khiàm-ēng ê kin-pún-tek kap koân-ui ê kà-sī tī-teh.
-
Koh-chài goá ū chit pún chheh tī goá ê chheh-tû, iā tī goá te̍k-pia̍t khiàm-ēng ê sî, á-sī sím-mi̍h kín-tiuⁿ ê sî, goá tuì pún-lêng-tek oá-khò i. Sui-jiân tī pa̍t ê sî-chūn goá ē thang tha̍k chit pún, á-sī hit pún. Chóng-sī tī goá jîn-seng chong-giâm ê sî, tû-khí chit pún chheh í-goā bô pa̍t pún thang hō͘ goá oá-khò, chiū goá ē tong-jiân lâi siūⁿ chit pún chheh ū pa̍t pún só͘ bô koân-ui ê oē tī-teh. Peng-sū tī chiàn-tiûⁿ, pē-bó tī chhù-nih, tī it-chhè pi-khó͘ ê khoàⁿ-kìⁿ an-uì ê oē chiū-sī tī pa̍t uī(or pún) só͘ bô khoàⁿ-kìⁿ ê. Só͘-í jîn-seng guî-kip ê sî, Sèng-chheh chiâⁿ-chò in ê. Chin-chē lâng, bô-lūn siàu-liân, á-sī lāu, chiū-sī tī in hēng-hok ê sî ē bē kì-tit Siōng-tè ê oē. Chóng-sī pi-khó͘, sit-pāi liâm-piⁿ ji̍p tio̍h in, iu-būn bia̍t in. Chóng-sī in ē kì-tit chhin-chhiūⁿ gín-ná pún-lêng-tek chiū-kīn lāu-bó ê khoán lâi oá-khò Sèng-chheh. Taⁿ lūn chit pún chheh lí beh cháiⁿ-iūⁿ kóng? Kiám m̄-sī tio̍h kóng, chit pún chheh ū kî-thaⁿ só͘ bô koân-ui ê oē mah?
-
Koh-chài siat-sú goá ū chit pún chheh tī goá ê chheh-tû goá ū chit pún chheh tī goá ê chheh-tû, iā te̍k-pia̍t ū koan-hē tī jîn-luī ê hēng-hok. Siat-sú goá hoat-kiàn tuì bat chit pún chheh ê lâng, in ê kiat-kio̍k bûn-hoà tit-tio̍h chìn-pō͘; iā m̄ bat chit pún chheh hiah ê lâng sī iá-bân thè-pō͘, bê-sìn, bô hoat-ta̍t, chiū goá ē bô tong-jiân lâi siūⁿ, chit pún chheh kî-û só͘ bô ê koân-ui kap thóng-gū(統御) jîn-luī seng-oa̍h ê mi̍h tī-teh mah? Goá tek-khak beh án-ni siūⁿ. Chhiáⁿ lán khoàⁿ sè-kài ê tē-tô͘, khoàⁿ bat Sèng-keng ê só͘-chāi kap m̄-bat ê só͘-chāi, lí ē thang khoàⁿ-kìⁿ hit ê koh-iūⁿ, chiū-sī kng kap àm, oa̍h-miā kap sí-sit, chìn-pō͘ thè-pō͘, goá bô pit-iàu koh gī-lūn, in-uī tāi-ke chai. Só͘-í hiān-kim lán bêng-pe̍k lah, Sèng-chheh choán-hiòng chin-chē ê tó-sū kap tāi-lio̍k, hō͘ in ê oa̍h-miā kap kng ê sū taⁿ m̄-sī sîn-pì lah, in-uī goá khoàⁿ-kìⁿ Siōng-tè tī hit tiong-kan, iā chhiong-moá tī hit lāi-bīn kap i saⁿ-kap kiâⁿ tī choân sè-kài. án-ni lūn chit pún chheh ū koân-ui ê sū kiám ū thang giâu-gî mah?
-
Koh chài chi̍t-pái lâi kóng siat-sú goá ū chi̍t-pún chheh tī goá ê chheh-tû lāi, iā goá chai chit-pún chheh bat kám-tōng chin-chē ê lâm-lú te̍k-pia̍t goá khoàⁿ-kìⁿ hiah ê lâng bô sím-mi̍h te̍k-sû ê kèng-khiân kap tù-hiān ê sìn-gióng. Chóng-sī in tī sè-kan chò toā ê sū. Chit ê kiám bô hō͘ goá tong-jiân lâi siūⁿ chit-pún chheh pún-sin ê koân-ui mah? Cariyle(カーライル). M̄-sī chin kèng-khiân ê lâng, chóng-sī bat ū siàu-liân lâng tuì i kóng, “Tha̍k chi̍t koá khoàⁿ-māi, chiū lí só͘ siūⁿ oē piàn-oāⁿ.” Abraham Lincoin tī Sèng-chheh ê bīn-téng kiàn-chō i kàu-io̍k kap jîn-keh. Che chiū-sī i chò gín-ná ê sî tī i bô kuí-pún chheh ê tiong-kan ê chi̍t-pún. Kî-thaⁿ iáu chin-chē lâng tuì Sèng-chheh ê kám-tōng(Ò-kó͘-sū-teng), Lō͘-tek téng-téng, tuì án-ni lí kiám bô siūⁿ Sèng-chheh ū chin-si̍t ê koân-ui mah?
-
Á-sī siat-sú goá ū chi̍t-pún chheh tī goá ê chheh-tû, iā put-sî siū chin toā ê kong-kek, phoe-phêng, beh phò-hoāi i ê koân-ui kap chèng-bêng chit-pún chheh m̄-nā kan-ta oē chhî-sio̍k i ê koân-ui, khak-si̍t kap chèng-bêng ka-tī nā-tiāⁿ, koh oē chí-chèng hiah ê huí-pòng-chiá, chiū-sī chū-jiân chò ū tì-sek ê gōng-lâng, chiū goá kiám bô tong-jiân siūⁿ tīchit-pún chheh ê lāi-bīn ū koân-ui tī-teh mah? Heine(ハイホ) ê só͘ kóng hō͘ lán koh siūⁿ khí, chiū-sī kóng, Robert Jngersoll kóng, “Sè-kí(20 sè-kí) ê khí-chho͘, Sèng-chheh beh pìⁿ-chò Sîn oē, iā oē thêng-chí éng-hióng sè-kài ê su-siúⁿ.” Taⁿ í-keng keng-koè kuí-cha̍p nî, Sèng-chheh jú chē lâng bat, iā hit ê éng-hióng jú toā, chin chē lâng mê-ji̍t teh chhiau-chhoē gián-kiù Sèng-chheh, in tuì Sèng-chheh ê koan-liām ná bêng, in ê tì-sek ná oân-choân, iā in ê khak-sìn ná kian-kò͘, chiū-sī chai tī Sèng-chheh in oē thang hoat-kiàn Siōng-tè tuì in ka-tī ê lêng-hûn só͘ kóng ê siaⁿ.
(6) Taⁿ choè-āu goá koh kóng chi̍t hāng, siat-sú goá ū chi̍t tiuⁿ siōng tī piah--nih, hit tiuⁿ chhin-chhiūⁿ put-sî teh khoàⁿ goá, chóng-sī ta̍k ê lâng kóng hit tiuⁿ siōng put-sî teh khoàⁿ in ê khoán, goá chiū beh kóng tī chit tiuⁿ siōng tek-khak ū kiōng-thong ê chok-iōng; á-sī siat-sú ū chi̍t ê lâng kóng oē i chhin-chhiūⁿ tuì goá teh kóng, chóng-sī kî-û ê lâng kóng i tuì in kóng ê khoán chiū goá beh kóng hit lâng só͘ kóng ún-tàng ū kiōng-thong ê kà-sī ê koân-ui tī-teh. Chit ê tú-hó ha̍p tī Sèng-chheh ê sū-si̍t. Sèng-chheh ê kà-sī pau-hâm kò-jîn ê sū, chóng-sī ta̍k ê chin-si̍t lâi tha̍k, chiū kám-kak hit ê tú-tú uī tio̍h i pún sin lâi siá--ê, hit ê tú-tú ha̍p i ê sū-chêng, tú-hó ha̍p i ê khiàm-khoeh, iā tī i te̍k-pia̍t guî-kip khiàm-ēng ê sî, tú-hó chò i ê pang-chān kap kng. iā Sèng-chheh ê kiōng-thong ê chok-iōng(Uninersal appeal), chiū-sī kun-kù tī chit ê koân-ui, goá chai Sèng-chheh sū kám-tōng lâi siá--ê, in-uī ū kám-tōng goá kap ta̍k ê lâng, chiū-sī ēng jîn-luī sim-té (sim-lāi) ê kiōng-thong-oē lâi kóng--ê. Hoâi-gî lūn-chiá Heine kóng, “Bat sit-lo̍h i ê Siōng-tè ê lâng, tī chit-pún chheh oē thang koh chhoē-tio̍h i, iā m̄ bat i ê lâng, beh tī Siōng-tè ê oē ê khuì(chí Sèng-chheh) kìⁿ-tio̍h I”. Chit ê chiū-sī Sèng-chheh ê kî-biāu, iā boē kū--khì, iā boē bān sî-sè, iā ū ha̍p kok sî-tāi kun-pún-tek ê kè-ta̍t, kap ta̍k ê lêng-hûn pì-bi̍t ê khiàm-ēng ê kà-sī ê oē tī-teh.
Tuì í-siōng hō͘ lán chai Sèng-chheh só͘ kóng ū koân-ui tī-teh, iā hō͘ lán tit-tio̍h an-uì khak-sìn, iā pò lán chai ū chit ê Siōng-tè, I thiaⁿ lán tāi-ke kap chèng jîn-luī, chhe I ê to̍k-seⁿ Kiáⁿ Iâ-so͘ lâi kiù sè, lán tuì sìn I, oē tit-tio̍h kiù. Taⁿ chò lāu-pē, lāu-bó ê lâng, lín tio̍h tha̍k Sèng-chheh hō͘ lín ê kiáⁿ thiaⁿ, tio̍h kà lín ê kiáⁿ liām Kim-kù. Siàu-liân lâng, hū-jîn lâng ah! Lín ta̍k-ji̍t ū sî-kan thang khoàⁿ sin-bûn, cha̍p-chì, siáu-soat, thit-thô, kiám bô thang ēng cha̍p hun cheng lâi tha̍k lín ê Sèng-chheh mah? In-uī kèng-uì Chú, iā siú I ê kà-sī ê lâng,chiū-sī tì-sek ê kin-pún koh oē kiù lán thoat-lī pháiⁿ.
Phí-jîn tī chit ê Sèng-chheh ê Kì-liām ji̍t, siá kuí-kù hō͘ lán tāi-ke oē koh-khah tì-ì gián-kiù Sèng-keng, iā soà o̍h si-jîn kóng, “ Goá bô bē-kì-tit Lí ê oē” lâi chhî-siú Sèng-chheh ê koân-ui ê sìn-gióng, sī só͘ chhiat-bōng.
漢羅（Ùi原文改寫）
聖冊的權威
黃德輝
1941年11月680期 2-5
我無袂記得你的話(詩119：16)
這句就是詩人所講--的，也伊一擺過一擺按呢講。這章是詩篇做第一長--的，也是聖冊全本做第一長--的，有176節，也佇逐節有陳述聖冊，有時叫做上帝的話，有時是律法。詩人一擺過一擺講，我欲戀慕遵守你干證的話，我欲守你教示的話，我無袂記得你的話。
總是taⁿ真濟人佇今仔日誠實無隱瞞，in穩當無講「我無袂記得你的話」。就是講，「我袂記得你的話lah」。也毋是講，「我欲戀慕遵守伊，」就是「我看輕伊」，in無欲佇濟濟機會來精進無袂記得伊的話，反轉提供理由，怎樣in袂記得伊。
1.因為有真濟別物通讀。咱的厝新聞，報紙真濟，干焦欲共影過都袂了，其他猶過有文學的冊。所以聖冊佇遮的人的厝袂記得。咱大家攏知咱接著新聞的朝刊，夕刊，以及新的雜誌，小說的時，真歡喜放拺teh做的工提來讀，致到咱袂記得讀上帝的話。
2.咱袂記得伊的話，因為咱對聖冊的思想變換。對平常的人聖冊taⁿ毋是聖冊，in知現在的科學，批評創世記，in無留心挪亞，以撒，雅各所行的事，in反對士師的殘忍，野蠻。自然無關心以色列的儀式佮先知等等。也紲問福音書是真實通信mah？保羅敢毋是欲閣設一个新的宗教mah？對按呢in想聖冊毋是完全，又放袂記得。
3.咱袂記得聖冊，因為對拄仔予咱teh注意的其他的經冊佮別宗教的文學搝咱的因端。咱細漢的時，咱想聖冊是唯一聖的冊。總是taⁿ咱生長也有研究比較宗教，咱知真濟，咱講，「Oh，奇妙啊。」孔子的教示，抑是釋迦高尚的話，對咱看別宗教的文學，紲袂記得家己的；對咱聽別的gâu人佮東方的先知的話，咱紲袂記得對西奈來的聲，詩篇的音樂，以賽亞，A-mô͘-sū的教示，山上的垂訓佮使徒所教示的。
4.真濟人袂記得伊的律法，因為in聽別的善言佮用現代的方法欲了解一切的神秘。In聽心靈論也實行智識的修養，in真無閒讀聖冊的手引也竟然袂記得聖冊，也in為著欲應答人生的根本問題無看聖冊，反轉看靈應盤(靈應盤=O͘ija board) 。所以對以上遮的夢in猶有聖冊，總是in無用伊。In回想囡仔的時怎樣讀--伊。總是in taⁿ成做大人，也in的聖冊囥佇邊仔，佇in的心內袂記得聖冊。所以in袂通講，「我無袂記得你的話。」反轉著認「我袂記得你的話」。
總是取回咱的聖冊的時陣到啦。時間感動咱取回咱的聖冊，真實聖冊是咱跤前的燈，路上的光，一切個人，團體的向望佮宗教的的自由攏倚靠聖冊。咱比較別宗教的經典的時，遐的袂通佮聖冊同列，也咱信聖冊所講有權威，因為是「主所講--的。」
所以若有人袂記得in的聖冊就是真大的事，因為in失落聖冊的權威的信仰。今仔日無論佇啥所在，人teh搜揣權威的聲，總是in袂記得伊的聲(話)。咱若閣一擺佇咱的頭腦內(得著)知聖冊所講是權威，就咱會閣再親像詩人所講，「我無袂記得你的話。」Taⁿ予我來講幾項的理由，怎樣著信聖冊的權威。
1.對聖冊的發行。設使我有一本冊佇我的冊櫉內，也這本一年過一年真濟人買。雖然有真濟新的冊出版，猶過這本冊佇冊店不時是做第一濟人買，就我穩當欲講，佇這本冊有永久不變的物佇teh，著緊閣印才會赴。小說若有10萬本的讀者，通講是稀有的成功。總是聖冊的賣出，每日平均4萬本，對按呢咱通好膽講聖冊有盤過其他別款冊所無，就是人感覺in所欠用的根本tek佮權威的教示佇teh。
2.閣再我有這本冊佇我的冊櫉，也佇我特別欠用的時，抑是甚物緊張的時，我對本能tek倚靠伊。雖然佇別的時陣我會通讀這本，抑是彼本。總是佇我人生莊嚴的時，除起這本冊以外無別本通予我倚靠，就我會當然來想這本冊有別本所無權威的話佇teh。兵士佇戰場，爸母佇厝裡，佇一切悲苦的看見安慰的話就是佇別位(or本)所無看見的。所以人生危急的時，聖冊成做in的。真濟人，無論少年，抑是老，就是佇in幸福的時會袂記得上帝的話。總是悲苦，失敗連鞭入著in，憂悶滅in。總是in會記得親像囡仔本能的就近老母的款來倚靠聖冊。Taⁿ論這本冊你欲怎樣講？敢毋是著講，這本冊有其他所無權威的話mah？
3.閣再設使我有這本冊佇我的冊櫉我有這本冊佇我的冊櫉，也特別有關係佇人類的幸福。設使我發見對捌這本冊的人，in的結局文化得著進步；也毋捌這本冊遐的人是野蠻退步，迷信，無發達，就我敢無當然來想，這本冊其餘所無的權威佮統御人類生活的物佇teh mah？我的確欲按呢想。請咱看世界的地圖，看捌聖經的所在佮毋捌的所在，你會通看見彼个各樣，就是光佮暗，活命佮死失，進步退步，我無必要閣議論，因為大家知。所以現今咱明白lah，聖冊轉向真濟的島嶼佮大陸，予in的活命佮光的事taⁿ毋是神秘lah，因為我看見上帝佇彼中間，也充滿佇彼內面佮伊相佮行佇全世界。按呢論這本冊有權威的事敢有通僥疑mah？
4.閣再一擺來講設使我有一本冊佇我的冊櫉內，也我知這本冊捌感動真濟的男女特別我看見遐的人無甚物特殊的敬虔佮著現的信仰。總是in佇世間做大的事。這个敢無予我當然來想這本冊本身的權威mah？Cariyle(カーライル)。毋是真敬虔的人，總是捌有少年人對伊講，「讀一寡看覓，就你所想會變換。」Abraham Lincoin佇聖冊的面頂建造伊教育佮人格。這就是伊做囡仔的時佇伊無幾本冊的中間的一本。其他猶真濟人對聖冊的感動(奧古士丁)，路德等等，對按呢你敢無想聖冊有真實的權威mah？
5.抑是設使我有一本冊佇我的冊櫉，也不時受真大的攻擊，批評，欲破壞伊的權威佮證明這本冊毋但干焦會持續伊的權威，確實佮證明家己爾定，閣會指正遐的譭謗者，就是自然做有智識的戇人，就我敢無當然想佇這本冊的內面有權威佇teh mah？Heine(ハイホ)的所講予咱閣想起，就是講，Robert Jngersoll講，「世紀(20世紀)的起初，聖冊欲變做神話，也會停止影響世界的思想。」Taⁿ已經經過幾十年，聖冊愈濟人捌，也彼个影響愈大，真濟人暝日teh搜揣研究聖冊，in對聖冊的觀念那明，in的智識那完全，也in的確信那堅固，就是知佇聖冊in會通發見上帝對in家己的靈魂所講的聲。
(6) Taⁿ最後我閣講一項，設使我有一張像佇壁裡，彼張親像不時teh看我，總是逐个人講彼張像不時teh看in的款，我就欲講佇這張像的確有共通的作用；抑是設使有一個人講話伊親像對我teh講，總是其餘的人講伊對in講的款就我欲講彼人所講穩當有共通的教示的權威佇teh。這个拄好合佇聖冊的事實。聖冊的教示包含個人的事，總是逐个真實來讀，就感覺彼个拄拄為著伊本身來寫--的，彼个拄拄合伊的事情，拄好合伊的欠缺，也佇伊特別危急欠用的時，拄好做伊的幫贊佮光。也聖冊的共通的作用(Uninersal appeal)，就是根據佇這个權威，我知聖冊事感動來寫--的，因為有感動我佮逐个人，就是用人類心底(心內)的共通話來講--的。懷疑論者Heine講，「捌失落伊的上帝的人，佇這本冊會通閣揣著伊，也毋捌伊的人，欲佇上帝的話的氣(指聖冊)見著伊」。這个就是聖冊的奇妙，也袂蕉--去，也袂慢時勢，也有合各時代根本tek的價值，佮逐个靈魂祕密的欠用的教示的話佇teh。
對以上予咱知聖冊所講有權威佇teh，也予咱得著安慰確信，也報咱知有這个上帝，伊聽咱大家佮眾人類，差伊的獨生囝耶穌來救世，咱對信伊，會得著救。Taⁿ做老爸，老母的人，恁著讀聖冊予恁的囝聽，著教恁的囝念金句。少年人，婦人人ah！恁逐日有時間通看新聞，雜誌，小說，thit迌，敢無通用十分鐘來讀恁的聖冊mah？因為敬畏主，也守伊的教示的人，就是智識的根本閣會救咱脫離歹。
鄙人佇這个聖冊的記念日，寫幾句予咱大家會閣較致意研究聖經，也紲學詩人講，「我無袂記得你的話」來持守聖冊的權威的信仰，是所切望。