活佛

oa̍h pu̍t

文獻資訊

項目	資料
作者	陳添旺 Tân Thiam-ōng
卷期	台灣教會公報/北部教會
卷期	第680期
日期	1941/11
頁數	23

白話字（原文數位化）

oa̍h-pu̍t

Tân Thiam-ōng siá

1941年11月680期    23

Lán siàu-liām oa̍h-oa̍h ê Siōng-tè, si̍t-chāi sī “ oa̍h “--ê, in-uī I só͘ choè ê lóng sī oa̍h, sui-bóng toā-toē sí-sí mā oē tín-tāng, chhiū-ba̍k hoe-chháu siⁿ kun iā oē hoat hio̍h, hián-bêng in ū oa̍h.

Hoē goā lâng bat kóng, “ Bó͘ sian pu̍t siàⁿ kàu oē chia̍h-pn̄g “, sī piáu-bêng ū lêng-kám nā-tiāⁿ.

Bat ū toā sian pu̍t-siōng khang-khak lāi-bīn tiàm niáu-chhú, chiū hán hoā sī oa̍h--ê, m̄ kú ka-kī to khang-khak, thái oē oa̍h! Chhâ kàu siông-sè , sī “oa̍h-miā-chhú”, m̄-sī oa̍h-pu̍t.

Bat khoàⁿ chit pún chheh, lūn chi̍t ê bó͘ lâng, chin sêng-sim ho̍k-sāi sîn-pu̍t, piàn sì-koè biō-mn̂g hêng hiuⁿ hē sîn-bêng, kiû pêng-an kiû hok-khì, kiû kong-bêng, bat kàu chit uī biō-lāi an-bîn, siū chí-tiàm kā i kóng. Lí ke-lāi ê “oa̍h-pu̍t” to m̄ ho̍k-sāi, beh kiû sím-mi̍h sîn-pu̍t mah? I chiū mn̄g kóng, Sím-mi̍h sī goá ke-lāi ê oa̍h-pu̍t mah? Chiū kā i kóng, Lí koáⁿ-kín tńg-khì, nā chi̍t ê oē chhēng tò-thâu saⁿ moa tī heng-chêng chiu-sī lí ke-tiong ê oa̍h-pu̍t.

Hit lâng chai sī bîn bāng, iā chiū kín tńg khì saⁿ-kiⁿ sî-chūn kàu chhù kiò mn̂g, in lāu-bú thiaⁿ-kìⁿ sī in kiáⁿ ê siaⁿ, hoaⁿ-hí koáⁿ-kín khì khui-mn̂g, in kiáⁿ chi̍t-ē khoàⁿ-kìⁿ suî-sî kuī tī bīn-chêng pài i, jīn choē put hàu kiû sià-bián. (Pêng-seng put-hàu lāu-bú, bô hō͘ i chia̍h, lī-ke chin kú, bô kìⁿ bú bīn) chū kim í-āu chin iú-hàu lāu-bú , chi̍t ke thoân-îⁿ hó miâ-siaⁿ.

Che sui-bóng sī chi̍t ê kò͘-sū, iā sī ū si̍t-sū ê chin-siōng thang choè chin hó ê kà-sī.

Lán kàu-hoē lāi mā chin khiàm-kheh iú-hàu oa̍h-pu̍t ê lâng, ū lâng chin gâu kóng, gâu lūn-soat, chai pa̍t lâng ê khiàm-ēng, kóng kàu oē kìⁿ-tio̍h Siōng-tè, siū tio̍h Sèng Sîn,( m̄-chai ka-kī ê khiàm-ēng) m̄-kú tuì lāu-bú boē iú-hàu, bô hō͘ i chia̍h, tì-kàu pa̍t lâng tio̍h kā i î-chhî, che sī mâu tún.

Iok-hān kóng, Ū khoàⁿ-kìⁿ ê hiaⁿ-tī to boē thiàⁿ, kóng oē thiàⁿ Siōng-tè sī lām-sám kóng ê lâng.

Ke kóng chi̍t kù, oē khoàⁿ-kìⁿ ê lāu-bú to m̄ khoàⁿ-kìⁿ, kóng oē khoàⁿ Siōng-tè kèng khah lām-sám kóng ê lâng.

Chá ū chi̍t lâng miâ Gî-chhiong, soè hàn lī lāu-bú , kàu toā-hàn kè kuí-nā séng-hūn khì chhē lāu-bú kàu tio̍h, chiah an-sim , só͘-í piáu-chiong i sī hàu-chú.

Iâ-so͘ lâi sè-kan chīn jîn-tō ê bô͘-hoān tī Si̍p-jī-kè téng ēng lāu-bú kau-thok ha̍k-seng Iok-hān hōng-sêng i.

漢羅（Ùi原文改寫）

活佛

陳添旺寫

1941年11月680期    23

咱數念活活的上帝，實在是「活」--ê，因為伊所做的攏是活，雖罔大地死死嘛會震動，樹木花草生根也會發葉，顯明in有活。

會外人捌講，「某仙佛siàⁿ到會食飯」，是表明有靈感nā-tiāⁿ。

捌有大仙佛像空殼內面tiàm老鼠，就喊譁是活--ê，毋久家己to空殼，thái會活！查到詳細，是「活命鼠」，毋是活佛。

捌看這本冊，論一个某人，真誠心服事神佛，piàn四界廟門形香hē神明，求平安求福氣，求光明，捌到這位廟內安眠，受指點共伊講。你家內的「活佛」to毋服事，欲求甚物神佛mah？伊就問講，甚物是我家內的活佛mah？就共伊講，你趕緊轉去，若一个會穿倒頭衫moa佇胸前就是你家中的活佛。

彼人知是眠夢，也就緊轉去三更時陣到厝叫門，in老母聽見是in囝的聲，歡喜趕緊去開門，in囝一下看見隨時跪佇面前拜伊，認罪不孝求赦免。(平生不孝老母，無予伊食，離家真久，無見母面)自今以後真有孝老母，一家團圓好名聲。

Che雖罔是一个故事，也是有實事的真相通最真好的教示。

咱教會內嘛真欠缺有孝活佛的人，有人真gâu講，gâu論說，知別人的欠用，講到會見著上帝，受著聖神，(毋知家己的欠用) m̄-kú對老母袂有孝，無予伊食，致到別人著共伊維持，這是矛盾。

約翰講，有看見的兄弟to袂疼，講話疼上帝是lām-sám講的人。

加講一句，能看見的老母to毋看見，講話看上帝敬較lām-sám講的人。

早有一人名Gî-chhiong，細漢離老母，到大漢過幾若省份去揣老母到著，才安心，所以表彰伊是孝子。

耶穌來世間盡人道的模範佇十字架頂用老母交託學生約翰奉承伊。