馬偕醫院現況
Má-kai I-īⁿ Hiān-hóng
文獻資訊
| 項目 | 資料 |
|---|---|
| 作者 | 上山生 Siōng-san seng |
| 卷期 | 台灣教會公報 |
| 卷期 | 第679期 |
| 日期 | 1941/10 |
| 頁數 | 20 |
白話字（原文數位化）
Má-kai I-īⁿ Hiān-hóng
Siōng-san seng
1941年10月679期 20
Pak-pō͘ Kàu-hoē ê i-liâu ki-koan, Má-kai I-īⁿ tī kū-nî Soan-kàu-su beh ín-iông kui-kok ê sî ū hiàn hō͘ Pak-pō͘ Tāi-hoē. Hiān-sî chiū Tāi-hoē choè chú-thé teh keng-êng. Tāi-hoē ū phài 9 miâ Lí-sū: Tân Bûn-chàn, Lí Suī-hàn, Gô͘ Eńg-hoâ, Lîm iān-chong, Tīⁿ Chhong-kok, Hok-san Chhun-hiông, Tiū-tiân Thian-lâi, Hō-chhoan Sìn-gān (Lí-sū-tiúⁿ). Siōng-san Chheng-chì(Su-kì) cho͘-chit Lí-sū-hoē tī-teh liāu-lí. ǹg-bāng chhú-khì ê keng-êng ta̍k-hāng oē ha̍p-lí-hoà, hō͘ pún-īⁿ oē thang hoat-hui Ki-tok-kàu-tek cheng-sîn ê i-liâu hōng-sū. Lūn chit tiám, toā-toā hi-bōng lia̍t-uī khoàⁿ Pò ê hiaⁿ-chí thoè kî-tó kap īⁿ-lāi chit-oân it-tì ê hia̍p-le̍k. Pún-īⁿ tī kin-nî 6 ge̍h 20 ji̍t, í-keng tit-tio̍h kàm-tok koaⁿ-thiaⁿ hú-khó hō͘ lán Tāi-hoē, só͘-í chhú-khì lán tio̍h hū choân chek-jīm lâi keng-êng. Hiān-sî ê hun-kho, ū lāi-kho, goā-kho, sán-hū-jîn kho kap gán-kho. Kok-kho sian-siⁿ teh tam-jīm . Koh ta̍k hāng ê i-liâu ki-hâi, si-siat í-ki̍p pīⁿ-sek lóng chin oân-pī.
Lūn si-siat ê oân-pī, su-li̍p pīⁿ-īⁿ tiong thang kóng sī choân Tó tē-it. Pún-īⁿ ê chi̍t-oân: I-su sì miâ, io̍h-chè-su chi̍t miâ, chō͘-chhiú saⁿ miâ, ki-su̍t-oân saⁿ miâ, sū-bū saⁿ miâ, khàn-hō͘-hū saⁿ-cha̍p miâ, cha̍p-ia̍h cha̍p-it miâ, thoân-kàu-su chi̍t miâ, lú soan-tō-hū saⁿ miâ chóng-kè 59 miâ. Pún-īⁿ ê thoân-thóng, chiū-sī khiā tī Ki-tok-kàu phok ài ê cheng-sîn, tuì hoān-chiá ēng chhin-chhiat khin-khoài choè tē-it. Khàn-hō͘-hū kiam hù-thiam, hō͘ khah khin pīⁿ ê lâng m̄-bián lēng-goā chhiàⁿ hù-thiam. io̍h-kè khah sio̍k. Tuì sòng-hiong lâng si-liâu. ēng Ki-tok ê hok-im kiù lâng ê lêng-hûn. Pún-īⁿ ê bo̍k-tek m̄-sī beh thàn-chîⁿ, sī ǹg-bāng beh o̍h Ki-tok ê bô͘-iūⁿ, ēng khek-kí ê cheng-sîn piàⁿ-khang ka-kī ê chîⁿ-tē lâi thiàⁿ lâng, thang chīn lán choè Ki-tok ê ha̍k-seng ê sù-bēng. ǹg-bāng lia̍t-uī khoàⁿ Pò ê hiaⁿ-chí oē toā-toā koan-sim tī pún-īⁿ, ia̍h siông-siông thoè pún-īⁿ kî-tó, sī sim só͘ goān.
漢羅（Ùi原文改寫）
馬偕醫院現況
上山生
1941年10月679期 20
北部教會的醫療機關，馬偕醫院佇舊年宣教師欲引揚歸國的時有獻予北部大會。現時就大會做主體teh經營。大會有派9名理事：陳Bûn-chàn，李Suī-hàn，吳Eńg-hoâ，林iān-chong，鄭Chhong-kok，福山春雄，稻田天來，賀川信彥(理事長)。上山清志(書記)組織理事會佇teh料理。向望此去的經營逐項會合理化，予本院會通發揮基督教的精神的醫療奉仕。論這點，大大希望列位看報的兄姊替祈禱佮院內職員一致的協力。本院佇今年6月20日，已經得著監督官廳許可予咱大會，所以此去咱著負全責任來經營。現時的分科，有內科，外科，產婦人科佮眼科。各科先生teh擔任。閣逐項的醫療機械，施設以及病室攏真完備。
論施設的完備，私立病院中通講是全島第一。本院的職員：醫師四名，藥劑師一名，助手三名，技術員三名，事務三名，看護婦三十名，雜役十一名，傳教師一名，女宣道婦三名總計59名。本院的傳統，就是徛佇基督教博愛的精神，對患者用親切輕快做第一。看護婦兼hù-thiam ，予較輕病的人毋免另外倩hù-thiam。藥價較俗。對sòng-hiong人施療。用基督的福音救人的靈魂。本院的目的毋是欲趁錢，是向望欲學基督的模樣，用克己的神拚空家己的錢袋來疼人，通盡咱做基督的學生的使命。向望列位看報的兄姊會大大關心佇本院，亦常常替本院祈禱，是心所願。