數念洪Lâm執事
Siàu-liām Âng Lâm Chip-sū
文獻資訊
| 項目 | 資料 |
|---|---|
| 作者 | 安貧生 An-pîn seng |
| 卷期 | 台灣教會公報 |
| 卷期 | 第678期 |
| 日期 | 1941/9 |
| 頁數 | 15 |
白話字（原文數位化）
II. Siàu-liām Âng Lâm Chip-sū
678 hō 1941.09 p.15
(An-pîn seng kì)
Âng Lâm Chip-sū seng tióng tī Chháu-tun ke ê Koè-khe-á. Ka-cho̍k ê thoân-thóng sī keng-lông. I sè-hàn ê sî, ū ji̍p su-pâng tha̍k hàn-bûn, āu-lâi iā kap lâng gián-kiù khoàⁿ hong-suí ê su̍t, chiū-sī keng-lông kiam khoàⁿ hong-suí. Hit-sî Chháu-tun khí-chho͘ siat kàu-hoē, N̂g O͘-phoê Tiúⁿ-ló lâi chò thâu-jīm ê thoân-kàu-chiá, i sī jia̍t-sim ê lâng, sì-kè pò͘-tō. Lâm-á chek chi̍t-ji̍t khì ke-nih, thiaⁿ-tio̍h O͘-phoê Tiúⁿ-ló teh kóng tō-lí, siū kám-tōng, chū chia khí, àm-chēⁿ siông-siông kàu pài-tn̂g lé-pài, soà ín-chhoā i ê lāu-pē, saⁿ ê sió-tī, í-ki̍p i ê chhin-chhek kuí-nā hō͘ lâi kèng-pài Siōng-tè. I ê sió-tī, Bō͘-tek, Kim-kang lóng tng tiúⁿ-ló. Tuì i ín-chhoā ê chhin-cho̍k, hiān-sî toā-sè ū pah-goā lâng, sī Chháu-tun kàu-hoē ê sìn-tô͘ sò͘, sì-hūn-chi̍t khah ke.
Lâm-á chek só͘ ín-chhoā ê chhin-lâng chē-chē lóng ji̍p Sèng-hoē liáu, nā-sī i iáu teh iân-chhiân, m̄-káⁿ chìn-chêng siū sé-lé, chiū-sī i ê seng-oa̍h kap sū-gia̍p. I sī pîn-hân ê lông-hu, kā lâng keh-keⁿ sī chin hō͘-lī. Sìn tō-lí, kiam keh-keⁿ, siâ kap chèng, bē tàu--tit, kuí-nā nî kú sim-lāi put-sî khí kau-chiàn. Kiat-kio̍k sìn-sim kian-kò͘, koat-sim sìn Iâ-so͘, pàng-sak lô-keⁿ, phāiⁿ Sèng-keng cháu thiⁿ-lō͘. Kì kuí-hāng lâi siàu-liām i, kiám-chhái ē thang chò hō͘-poè ê phiau-chún iā-kú-káⁿ.
-
I sī ài siú lé-pài--ê. I ê chhù kàu pài-tn̂g tio̍h kiâⁿ 50 hun cheng kú, tû-khí phoà-pēⁿ í-goā, bô-lūn hong-hō͘, i to kàu pài-tn̂g siú lé-pài.
-
I sī khîn tha̍k Sèng-keng--ê. I sī put-sî teh tha̍k Sèng-keng. Sèng-keng iā chin se̍k, ē ēng Sèng-keng ê lí, lâi chhui-chhut sè-kài ê tāi-sè.
-
I sī chīn-chit ê chip-sū. I chò chip-sū oá 20 nî kú, i só͘ hū-tam ê pō͘, ū chīn i só͘--ē lâi pān-lí.
-
I sī un-sûn--ê. I ta̍k-sî ū chhiò-iông ê bīn-sek, chi̍t-ē khoàⁿ, chiū chai i ê tō-hēng moá-moá, tuì siàu-liân kàu lāu, m̄-bat ēng pháiⁿ-chhuì mē bó͘-kiáⁿ, hán-tit kap lâng ke-oē, hoān-sū niū--lâng. I ū sì-ê hāu-seⁿ, saⁿ-ê cha-bó͘-kiáⁿ, hiān-sî iáu sī khó chhú ê sìn-tô͘. Lāi-goā sun chi̍t-toā kûn.
Choè hō͘, i tài ló soe-jio̍k ê chèng-thâu, tó-chhn̂g chiâⁿ-nî kú. I sī tha̍k Sèng-keng kî-tó, nā chhoē i chē, i iā hián-chhut chhiò-iông ê bīn-sek kap lâng tâm-lūn, kóng i ta̍k-hāng to pī-pān hó-sè, teh thèng-hāu Chú. Kàu Chú ê chí-ì chiâⁿ, chiū chhiò-iông lī-pia̍t iu-lū ê sè-kan, hióng-siū 74 hoè. Hok-khì ah!
漢羅（Ùi原文改寫）
II.數念洪Lâm執事
678號1941.09 p.15
(安貧生 記)
洪Lâm執事生長佇草屯街的過溪仔。家族的傳統是耕農。伊細漢的時，有入書房讀漢文，後來也佮人研究看風水的術，就是耕農兼看風水。彼時草屯起初設教會，黃烏皮長老來做頭任的傳教者，伊是熱心的人，四界佈道。Lâm仔叔一日去街裡，聽著烏皮長老teh講道理，受感動，自遮起，暗靜常常到拜堂禮拜，紲引chhoā伊的老爸，三个小弟，以及伊的親戚幾若戶來敬拜上帝。伊的小弟，Bō͘-tek，Kim-kang攏當長老。對伊引chhoā的親族，現時大細有百外人，是草屯教會的信徒數，四份一較加。
Lâm仔叔所引chhoā的親人濟濟攏入聖會了，若是伊猶teh延延，毋敢進前受洗禮，就是伊的生活佮事業。伊是貧寒的農夫，共人格經是真厚利。信道理，兼格經，邪佮正，袂鬥--得，幾若年久心內不時起交戰。結局信心堅固，決心信耶穌，放拺羅經，揹聖經走天路。記幾項來數念伊，撿彩會通做後輩的標準也拘敢。
1.伊是愛守禮拜--的。伊的厝到拜堂著行50分鐘久，除起破病以外，無論風雨，伊都到拜堂守禮拜。
2.伊是勤讀聖經--的。伊是不時teh讀聖經。聖經也真熟，會用聖經的理，來推出世界的大勢。
3.伊是盡職的執事。伊做執事倚20年久，伊所負擔的部，有盡伊所--會來辨理。
4.伊是溫純--的。伊逐時有笑容的面色，一下看，就知伊的道行滿滿，對少年到老，毋捌用歹喙罵某囝，罕得佮人加話，凡事讓人。伊有四个後生，三个查某囝，現時猶是可取的信徒。內外孫一大群。
最後，伊帶腦衰弱的症頭，倒床成年久。伊是讀聖經祈禱，若揣伊坐，伊也顯出笑容的面色佮人談論，講伊逐項都備辦好勢，teh聽候主。到主的旨意成，就笑容離別憂慮的世間，享受74歲。福氣啊！