用語的整頓

iōng-gú ê chéng-tùn

文獻資訊

項目	資料
作者	柯設偕 Koa Siat-kai
卷期	台灣教會公報/北部教會
卷期	第677期
日期	1941/8
頁數	21

白話字（原文數位化）

iōng-gú ê Chéng-tùn

Koa Siat-kai

1941年8月677期       21

Tī 5 goe̍h hō ū siá tām-po̍h koan-hē kàu-hoē lāi-goā iōng-gú(só͘ teh ēng ê jī-kù ), chéng-tùn ê sū, ài koh siá choè chham-khó.

Chit lé-pài, téng lé-pài, āu lé-pài

Chiah ê iōng-gú , siông-siông ū lâng ēng liáu hô͘-hūn. Chit lé-pài , sī tuì lé-pài-ji̍t khí, kàu pài-la̍k; téng-lé-pài ,sī tuì téng ê lé-pài ji̍t khí, kàu hit ê pài-la̍k; āu lé-pài , sī tuì āu ê lé-pài-ji̍t khí, kàu hit pài-la̍k.

Tī lé-pài-ji̍t kóng, chit lé-pài, sī chí-khí lé-pài-ji̍t khí, kàu pài-la̍k; kóng téng lé-pài, sī chí-khí chêng ê lé-pài-ji̍t khí, kàu chêng ê pài-la̍k; kóng āu lé-pài, sī chí-khí āu ê lé-pài-ji̍t khí, kàu āu ê pài-la̍k.

Tī lé-pài-ji̍t kóng, chit lé-pài pài-gō͘, sī chí-khí koh 5 ji̍t, hit ê pài-gō͘; kóng téng lé-pài pài-gō͘, sī chí-khí nn̄g-ji̍t chêng hit ê pài-gō͘; kóng āu lé-pài pài-gō͘, sī chí-khí koh chit ê lé-pài-ji̍t liáu āu 5 ji̍t ê pài-gō͘.

Tī pài-saⁿ kóng, chit lé-pài ê lé-pài-ji̍t, sī chí-khí 3 ji̍t chêng ê lé-pài-ji̍t; kóng chit lé-pài ê pài-la̍k, sī chí-khí koh 3 ji̍t ê pài la̍k; kóng téng lé-pài ê pài-sì, sī chí-khí kè-khì ê lé-pài-ji̍t í-chêng ê pài-sì; kóng āu lé-pài pài-it, sī chí-khí koh lāi ê lé-pài -ji̍t liáu-āu ê pài-it.

Tī lé-pài-ji̍t kóng, chit lé-pài ê lé-pài-ji̍t, sī chí-khí teh kóng hit-ji̍t. TĪ pài-it kóng , téng lé-pài pài-la̍k, sī chí-khí nn̄g-ji̍t chêng ê pài-la̍k. Tī pài-la̍k kóng, āu lé-pài ê lé-pài-ji̍t , sī chí-khí keh-ji̍t ê lé-pài-ji̍t.

Chóng kóng sǹg chi̍t lé-pài, sī tuì lé-pài-ji̍t sǹg-khí kàu pài-la̍k.

漢羅（Ùi原文改寫）

用語的整頓

柯設偕

1941年8月677期       21

佇5月號有寫淡薄關係教會內外用語(所teh用的字句)，整頓的事，愛閣寫做參考。

這禮拜，頂禮拜，後禮拜

Chiah的用語，常常有人用了糊混。這禮拜，是對禮拜日起，到拜六；頂禮拜，是對頂的禮拜日起，到彼个拜六；後禮拜，是對後的禮拜日起，到彼拜六。

佇禮拜日講，這禮拜，是指起禮拜日起，到拜六；講頂禮拜，是指起前的禮拜日起到前的拜六；講後禮拜，是指起後的禮拜日起，到後的拜六。

佇禮拜日講，這禮拜拜五，是指起閣5日，彼个拜五；講等禮拜拜五，是指起兩日前彼个拜五；講後禮拜拜五，是指起閣這个禮拜日了後5日的拜五。

佇拜三講，這禮拜的禮拜日，是指起3日前的禮拜日；講這禮拜的拜六，是指起閣3日的拜六；講頂禮拜的拜四，是指起過去的禮拜日以前的拜四；講後禮拜拜一，是指起閣內的禮拜日了後的拜一。

佇禮拜日講，這禮拜的禮拜日，是指起teh講彼日。佇拜一講，頂禮拜拜六，是指起兩日前的拜六。佇拜六講，後禮拜的禮拜日，是指起隔日的禮拜日。

總講算一禮拜，是對禮拜日算起到拜六。