小宇宙
Sió Ú-tiū
文獻資訊
| 項目 | 資料 |
|---|---|
| 作者 | 王守勇 Ông Siú-ióng |
| 卷期 | 台灣教會公報 |
| 卷期 | 第677期 |
| 日期 | 1941/8 |
| 頁數 | 4-5 |
白話字（原文數位化）
Sió Ú-tiū
Ông Siú-ióng
1941年8月677期 4-5
(1) Bûn-ha̍k-sū Chhoà ài-tì kun sī Tông-chì-siā Tāi-ha̍k chhut-sin,
hiān-sî tī Bí-kok Chi-khek-ko Thāi-ha̍k teh gián-kiù. Tī kū-nî ê chhun-thiⁿ, ū the̍h-chhut “2 chu-liāu ê gián-kiù” ê lūn-bûn , ū tit-tio̍h M.A. ê ha̍k-uī; tī pún-nî tiong ē thang koh tit-tio̍h B.D. ê ha̍k-uī. Chit-tia̍p sī lūn-bûn ê khí-chho͘ tiong. I hiān-sî tī-hia iā ū hō͘ Ji̍t-pún lâng ê Ki-tok kàu-hoē chhiáⁿ chò bo̍k-su , iā siông-siông khì èng-oān goā-jîn ê kàu-hoē, uī Pún-tó chheng-liân ê bêng-ū put-chí oa̍h-tāng, hō͘ lâng chin chheng-chàn, lâi êng-kng Siōng-tè. Khún-kiû Chú si-in sù-hok I, tī ha̍k-kiù seng-oa̍h, tī bo̍k-hoē seng-oa̍h, tī siā-kau seng-oa̍h, lâi hoat-hui lán Ji̍t-pún Ki-tok-kàu-tô͘ ê phín-keh, thang hián-iông sèng-miâ sī sim só͘-goān.
(2) Tī oán lí chng, ū ku̍t-tio̍h chi̍t tiâu toā-tiâu han-chû, tn̂g 5 chhioh 3 chhùn, toā 2 chhioh-it: Che kiám-chhái sī sè-kài it ê iā bô tek-khak, hián-bêng Chō-bu̍t-chú te̍k-pia̍t chiok-hok lán Tâi-oân. Tī lán Kàu-hoē tiong kiám bē thang ku̍t-tio̍h sìn-gióng ê toā tiâu han-chû mah?
(3) Bó͘ kàu-hoē sī bô léng bô sio ê lāu kàu-hoē , choè-kīn put-chí ū oa̍h-khì, kok hāng ê si-siat ū chi̍t ê khoán. Mn̄g hit ê in-toaⁿ, bó͘ bo̍k-su kóng, chit keng kàu-hoē khiàm sin ê bo̍k-su; iā hit ê sin ê bo̍k-su chiū-sī Goá.
(4) Hu̍t-lân-khek-lîm kóng, “Lâng ê chêng-io̍k tiong, tē-it oh-tit cheng-ho̍k ê, chiū-sī kiau-ngō͘; sui-jiân beh kā I chè-chí, beh kā I ún-khǹg-teh, beh kā I bia̍t-bô, I iáu-kú tī-teh , siông-siông ē hián-chhut. Goá sui-jiân ū kā I cheng-ho̍k, iáu-kú ē kóng goá ū khiam-sùn ê khoa-kháu tī-teh. án-ni, tē-it khoài kiau-ngō͘ ê put-tek, iā tē-it oh kiâⁿ ê, chiū-sī khiam-sùn ê bí-tek.” Lán ê Kiù-chú kóng, Goá sim-lāi un-jiû khiam-sùn (Má-thài 11:29).
(5) Tī Bí-kok ū chi̍t lia̍p soān-chio̍h chhin-chhiūⁿ ke-nn̄g hiah toā , sî-kè ta̍t nn̄g pah bān hut; chit lia̍p káⁿ sī sè-kài tē-it toā--ê.
(6) Bó͘ sian-siⁿ, thàu-chá khí-lâi kā I ê sian-siⁿ-niû chhéng-an kap kiong-hí in-uī sī sian-siⁿ-niû ê siⁿ-ji̍t, iā beh khì bé ke lâi thâi kā I chiok-hō. Chóng-sī sian-siⁿ-niû m̄ khéng, kóng tio̍h chiong beh bé ke ê chîⁿ khì bé chi̍t hāng mi̍h lâi kià hō͘ lāu-bó. Só͘-í sian-siⁿ chiū khì bé chi̍t hāng mi̍h lâi kià hō͘ i ê tiūⁿ-ḿ ,lâi piáu kám-in ê ì-sù. Lâng tī ka-tī ê siⁿ-ji̍t m̄-chai ū kuí-ê, teh siàu-liām lāu-bó.
(7) Bó͘ hiaⁿ-tī kóng, Lîm Ha̍k-kiong Bo̍k-su hō͘ goá chi̍t kù tō-lí, khah hó hō͘ goá chi̍t chheng gîn. I án-ni kóng, “Lé-pài-ji̍t tio̍h tì-ì siú an-hioh, puî-pùn tio̍h mî-noā khioh , Siōng-tè ún-tàng hō͘ lí chia̍h-pá chhēng-sio”. Kó-jiân sī án-ni!
(8) Koan-se si̍t-gia̍p-kài ê iú-le̍k-chiá Lí-kiàn Sûn-kiat—sī, chit pang tī Kheng-chíⁿ-te̍k ū kā Se-iûⁿ lâng bé chi̍t keng pia̍t-chong, beh chò Ji̍t-pún Sîn-ha̍k-hāu ê kàu-chit-oân tī joa̍h-thiⁿ, thang tī-hia hiu-ióng ê lō͘-ēng. Kám-sim ê sìn-tô͘, hó khoán-thāi Chú ê chhe-ēng kàu án-ni!
(9) Bo̍k-chhoan Chheng-siông Bo̍k-su kin-nî 68 hoè, tī ta̍k só͘-chāi teh soan-thoân hok-im , put-lūn kàu tó-uī, chin hui-siông ê hó sêng-chek. Sian-siⁿ só͘ hi-bāng ê chiū-sī kóng ài tī káng-toâⁿ téng teh soan-thoân hok-im ê sî, lâi thoân-kàu thoân kàu tó--lo̍h-khì lâi kui-thian, sī sim só͘-goān. Chit khoán chīn-tiong kàu sí ê koat-sim, suí bô pí!
(10) Nā kap lâng piān-lūn sím-mi̍h sū, tio̍h m̄-thang siūⁿ lóng beh piān kàu iâⁿ; nā ū iâⁿ 7 hun chiū hó, tio̍h lâu 3 hun pa̍t lâng iâⁿ.
(11) Hō͘-seng-séng, choè-kīn beh siat-tī Jîn-kháu lâi chō-chiū jîn-kháu ê kiông-hoà. Só͘-í nā 30 hoè í-hā ê lâm-chú, 25 hoè í-hā ê lú-chú, nā bô chîⁿ thang kiat-hun, beh chioh in kiat-hun-huì, chi̍t kháu tuì 5 pah kho͘ kàu chi̍t chheng kho͘ uî-chí. Cha̍p-nî hun-la̍p , hit ê tiong-kan nā ū khioh gín-ná, chi̍t ê gín-ná ē thang tio̍h kiám sì-hūn-chi̍t ê in-tián, án-ni 10 nî ê tiong-kan nā ū siⁿ 4 ê gín-ná, chiū hit chheng kho͘ m̄-bián hêng. Che si̍t-chāi sī to̍k-sin-chiá ê hok-im.
(12) Chin Iâ-so͘ Kàu-hoē ê Ki-tok-pò “Sèng-lêng sî-tāi”, hoat-hêng tē 30 hō uī-chí hoè-khan. Tī chiong-khan ê sû ê chi̍t kù kóng, “M̄-sī siū-tio̍h koaⁿ-thiaⁿ hoat-kìm ê bēng-lēng, iā m̄-sī sìn-gióng-chiūⁿ ū tōng-tu̍t , iā m̄-sī uī-tio̍h keng-chè-chiūⁿ ū khùn-lân, iā m̄-sī uī-tio̍h choá khoat-hoa̍t ê in-toaⁿ, iā m̄-sī siūⁿ liáu ià-siān, chiū chú-pit ka-tī iā m̄-chai sī cháiⁿ-iūⁿ, put-kò m̄-sī chhut tī ka-tī ê ì-sù, chóng-sī to tú-tio̍h bô tâi pún-chì bē soah-tit ê sū-chêng, chiah tio̍h hoè-khan Sèng-lêng sî-tāi”. Chóng-sī hoat-hêng-chiá ū piáu-sī Sèng-lêng sî-tāi sui-jiân hoè-khan, m̄-kú bô kú tī Sèng-lêng seng-oa̍h ê tê-hā ē koh chhut-sì. Chiàu khoàⁿ Sèng-lêng sî-tāi sī koè-liáu, hiān-kim sī tio̍h ji̍p tī Sèng-lêng seng-oa̍h chiah tio̍h, in-uī hiān-sî m̄-sī lí-lūn ê sî-tāi, sī tio̍h seng-oa̍h ê sî-tāi lah!
漢羅（Ùi原文改寫）
小宇宙
王守勇
1941年8月677期 4-5
(1)文學士蔡ài-tì君是同志社大學出身，
現時佇美國Chi-khek-ko大學teh研究。佇舊年的春天，有the̍h出「2資料的研究」的論文，有得著M. A.的學位；佇本年中會通閣得著B. D.的學位。這霎是論文的起初中。伊現時佇遐也有予日本人的基督教會請做牧師，也常常去應援外人的教會，為本島青年的名譽不止活動，予人真稱讚，來榮光上帝。懇求主施恩賜福伊，佇學究生活，佇牧會生活，佇社交生活，來發揮咱日本基督教徒的品格，通獻揚聖名是心所願。
(2)佇苑裡庄，有掘著一條大條蕃薯，長5尺3寸，大2 尺一：這kiám-chhái是世界一的也無的確，顯明造物主特別祝福咱台灣。佇咱教會中kiám袂通掘著信仰的大條蕃薯mah？
(3) 某教會是無冷無燒的老教會，最近不止有活氣，各項的施設有一个款。問彼个因端，某牧師講，這間教會欠新的牧師；也彼个新的牧師就是我。
(4) 富蘭克林講，「人的情慾中，第一oh得征服的，就是驕傲；雖然欲共伊制止，欲共伊隱囥teh，欲共伊滅無，伊iáu-kú佇teh ，常常會顯出。我雖然有共伊征服，iáu-kú會講我有謙遜的誇口佇teh。按呢，第一快驕傲的 不敵，也第一oh行的，就是謙遜的美德。」咱的救主講，我心內溫柔謙遜(馬太11：29)。
(5)佇美國有一粒鑽石親像雞卵hiah大，時價值兩百萬hut；這粒敢是世界第一大--ê。
(6) 某先生，透早起來共伊的先生娘請安佮恭喜因為是先生娘的生日，也欲去買雞來刣共伊祝賀。總是先生娘毋肯，講著將欲買雞的錢去買一項物來寄予老母。所以先生就去買一項物來寄予伊的丈姆，來表感恩的意思。人佇家己的生日毋知有幾个，teh數念老母。
(7) 某兄弟講，林學恭牧師予我一句道理，較好予我一千銀。伊按呢講，「禮拜日著致意守安歇，肥糞著綿爛拾，上帝穩當予你食飽穿燒」。果然是按呢！
(8) 關西實業界的有力者里見Sûn-kiat—式，這pang佇輕井澤有共西洋人買一間別莊，欲做日本神學校的教職員佇熱天，通佇遐休養的路用。感心的信徒，好款待主的差用到按呢！
(9) 木村Chheng-siông牧師今年68歲，佇逐所在teh宣傳福音，不論到佗位，真非常的好成績。先生所希望的就是講愛佇講壇等teh宣傳福音的時，來傳教傳教倒--落去來歸天，是心所願。這款盡忠到死的決心，媠無比！
(10)若佮人辯論甚物事，著毋通想攏欲辯到贏；若有嬴7分就好，著留3分別人贏。
(11)厚生省，最近欲設治人口來造就人口的強化。所以若30歲以下的男子，25歲以下的女子，若無錢通結婚，欲借in結婚費，一口對5百箍到一千箍為止。十年分納，彼个中間若有拾囡仔，一个囡仔會通著減四份一的恩典，按呢10年的中間若有生4个囡仔，就彼千箍毋免還。這實在是獨身者的福音。
(12)真耶穌教會的基督報「聖靈時代」，發行第30號為止廢刊。佇終刊的辭的一句講，「毋是受著官廳發禁的命令，也毋是信仰上有tōng-tu̍t，也毋是為著經濟上有困難，也毋是為著紙缺乏的因端，也毋是想了厭倦，就主筆家己也毋知是怎樣，不過毋是出佇家己的意思，總是to拄著無tâi本志袂煞得的事情，才著廢刊聖靈時代」。總是發行者有表示聖靈時代雖然廢刊，m̄-kú無久佇聖靈生活的 tê-hā會閣出世。照看聖靈時代是過了，現今是著入佇聖靈生活才著，因為現時毋是理論的時代，是著生活的時代lah！