台北神學校後援會
Tâi-pak Sîn-ha̍k-hāu Hō͘-oān-hoē
文獻資訊
| 項目 | 資料 |
|---|---|
| 作者 | 上山生 Siōng-san seng |
| 卷期 | 台灣教會公報/北部教會 |
| 卷期 | 第677期 |
| 日期 | 1941/8 |
| 頁數 | 18 |
白話字（原文數位化）
Tâi-pak Sîn-ha̍k-hāu Hō͘-oān-hoē
Siōng-san seng
1941年8月677期 18
Kó͘-chá ê sian-ti uī-tio̍h beh kóng-khoah in ê sū-gia̍p, ū chhòng-siat sian-ti ê ha̍k-hāu Chú Iâ-so͘ uī-tio̍h hok-im ê sū-gia̍p ,chio lâng lâi choè ha̍k-seng. Kai Phok-sū lâi Tâi-oân siat-kàu , siāng sî soà khai-siat Sîn-ha̍k-hāu. Nā ū kàu-hoē, chiū tek-khak ia̍h tio̍h ū Sîn-ha̍k-hāu thang ióng-sêng jîn-bu̍t lâi choè thoân-kàu ê kang. Chú ê hok-im chin ê tō-lí oē kiù lâng. Chóng-sī nā bô lâng thoân thài ū lâng oē thiaⁿ-kìⁿ, nā bô lâng oē thiaⁿ-kìⁿ, thài ū lâng oē sìn lâi sêng-siū i. án-ni thang chai kàu-hoē kap Sîn-ha̍k-hāu ū chin toā bi̍t-chiap ê koan-hē, kin-á-ji̍t tī lán kàu-hoē ū chi̍t keng Sîn-ha̍k-hāu tī-teh, si̍t-chāi sī chin thang toā kám-siā ê sū. Chit keng Sîn-ha̍k-hāu tuì khai-siat kàu kin-á-ji̍t la̍k-chhit cha̍p nî kú, lóng sī Soan-kàu-su teh keng-êng. Lūn Sîn-ha̍k-hāu ê sū, lán pún-tó kàu-hoē sìn-tô͘ lóng bô teh koan-sim , si̍t-chāi ū toā-toā sit-lo̍h lán ê pún-hūn, khiok tī kūn nî chiah ū ná teh koan-sim kap hiàn-kim, nā bô chit pái Soan-kàu-su hut-jiân-kan ê ín-iông, lán chiū bong bô lō͘. Taⁿ Soan-kàu-su lóng tńg-khì lah, in ê sū-gia̍p í-keng choân-pō͘ ín-kè hō͘ lán. Lūn Sîn-ha̍k-hāu ê keng-êng , lán tio̍h hū-tam choân chek-jīm. Tī chit-sî lán tio̍h hùn-khí, m̄-thang oa̍t-thâu khoàⁿ āu-bīn, Sîn-ha̍k-hāu sī lán kàu-hoē tio̍h ti̍t-chiap keng-êng lâi kái-siān, chiah oē thang ha̍h kin-á-ji̍t ê kàu-hoē ê iau-kiû. Só͘-í choân kàu-hoē tio̍h uī-tio̍h Sîn-ha̍k-hāu lâi toā-toā koan-sim, bô-lūn tuì bu̍t-chit, á-sī tuì cheng-sîn lâi toā-toā oān-chō͘. Só͘-í chit pái Sîn-ha̍k-hāu Lí-sū-hoē ū kè-e̍k beh cho͘-chit hō͘-oān-hoē, hō͘ iú-chì ê sìn-tô͘ lâi ka-ji̍p, hō͘ choē-choē lâng oē thang koan-sim tī Sîn-ha̍k-hāu, tuì kok hong-bīn lâi oân-chō͘, hō͘ lâng ê Sîn-ha̍k-hāu oē thang tit-tio̍h loē-iông chhiong-si̍t, thang chai-poê choē-choē iú-le̍k ê thoân-kàu-chiá lâi hông-sū kàu-hoē sī só͘ ǹg-bāng.
Koh tī kin-nî ū ke siat Lú-chú Sîn-ha̍k-pō͘ kap Ko-téng Lú-ha̍k-pō͘(chiū-sī Lú Sîn-ha̍k ê ū-kho thêng-tō͘ kap Ko-téng Lú-ha̍k-hāu tâng khoán). Lūn hū-jîn-lâng ê ti̍t-chiap thoân-tō khiok sī ka-têng ê thoân-tō kang-chok sī ū chin toā kong-hāu.
ǹg-bāng lia̍t-uī ū khoàⁿ Pò ê hiaⁿ-chí tī kî-tó ê sî saⁿ siàu-liām kap bô sioh lín ê hó ì-sù, toā-toā hùn-hoat lâi tàu oān-chō͘.
漢羅（Ùi原文改寫）
台北神學校後援會
上山生
1941年8月677期 18
古早的先知為著欲廣闊in 的事業，有創設先知的學校主耶穌為著福音的事業，招人來做學生。偕博士來台灣設教，siāng時紲開設神學校。若有教會，就的確亦著有神學校通養成人物來做傳教的工。主的福音真的道理會救人。總是若無人傳thài有人會聽見，若無人會聽見，thài有人會信來承受伊。按呢通知教會佮神學校有真大密接的關係，今仔日佇咱教會有一間神學校佇teh，實在是真通大感謝的事。這間神學校對開設到今仔日六七十年久，攏是宣教師teh經營。論神學校的事，咱本島教會信徒攏無teh關心，實在有大大失落咱的本份，卻佇近年才有ná teh關心佮獻金，若無這擺宣教師忽然間的引揚，咱就摸無路。Taⁿ宣教師攏轉去lah，in 的事業已經全部引繼予咱。論神學校的經營，咱著負擔全責任。佇這時咱著奮起，毋通越頭看後面，神學校是咱教會著直接經營來改善，才會通合今仔日的教會的要求。所以全教會著為著神學校來大大關心，無論對物質，抑是對精神來大大援助。所以這擺神學校理事會有計畫欲組織後援會，予有志的信徒來加入，予濟濟人會通關心佇神學校，對各方面來援助，予人的神學校會通得著內容充實，通栽培濟濟有力的傳教者來奉事教會是所向望。
閣佇今年有加設女子神學部佮高等女學部(就是女神學的預科程度佮高等女學校同款)。論婦人人的直接傳道卻是家庭的傳道工作是有真大功效。
向望列位有看報的兄姊佇祈禱的時相數念佮無惜恁的好意思，大大奮發來鬥援助。