南部教會醫療傳道史
Lâm-pō͘ Kàu-hoē I-liāu Thoân-tō-sú
文獻資訊
| 項目 | 資料 |
|---|---|
| 作者 | 顏振聲 Gân Chín-seng |
| 卷期 | 台灣教會公報 |
| 卷期 | 第677期 |
| 日期 | 1941/8 |
| 頁數 | 7-8 |
白話字（原文數位化）
Lâm-pō͘ Kàu-hoē I-liâu Thoân-tō-sú
(Chiap 7 goe̍h tē 5 bīn)
Gân Chìn-seng
1941年8月677期 7-8
Tī Chiau-hô 11 nî chiaⁿ goe̍h, chiū-sī A.D. 1936 nî, I-seng Lí Iok-hān lī-khui Tâi-lâm pīⁿ-īⁿ, khì Chiang-hoàⁿ-i-īⁿ chò īⁿ-tiúⁿ, tiàm chêng Lân I-seng ê chhù; hoat-hui chhiú-oán, keng-êng Chiang-hoà-pīⁿ-īⁿ. Sim-lāi phah-sǹg ū chit khoán pīⁿ-īⁿ tī chhī-ke ê tiong-sim kīn hū bô koaⁿ-li̍p ê pīⁿ-īⁿ, koh Tiong-pō͘ kàu-hoē lóng tī kīn-piⁿ, iū Lân I-seng 40 nî sêng-chek, hoān-chiá chhiong-sēng, pí-kàu chêng tī Tâi-lâm hiah chió, sim-lāi hoaⁿ-hí, koh khah chhut-la̍t. M̄-kú pīⁿ-īⁿ bô chhin-chhiūⁿ Sin-lâu pīⁿ-īⁿ ê kóng-khoah, put-chí uî-hām. Só͘-í Lân I-seng chhun ê 10 bān kap bē Sin-lâu pīⁿ-īⁿ ê 4 bān, kiōng 14 bān, chiū the̍h 18000 goā, bé Chiong-hoà kàu-hoē-tn̂g; chi̍t bān bé Tâi-lâm Má I-seng ê chū-the̍h. iā the̍h 3 bān chó-iū bé Chiang-hoà kàu-hoē-tn̂g kīn-piⁿ chêng-āu ê chhù tē, thang sin-tiok lí-sióng ê pīⁿ-īⁿ. Ū chhiáⁿ メソレタム商會ê tiàm-chú siat-kè. Nā hō͘ lâng chhéng-hū tio̍h 35 bān.
Chhì siūⁿ chhiú-lāi kim.
Soaⁿ-kha tē 2 kah goā, kap lâng khè-iok muí phêⁿ 4 kho͘ , iok-lio̍k 3.000 goā.
25000.00
Chiong-hoà pài-tn̂g-tē
kap kīn-piⁿ tē iok-lio̍k 6.0000.00
Bē Sin-lâu pīⁿ-īⁿ 4.0000.00
Má I-seng kià-hù 5000.00
Hiān-sî Chiong-hoà pīⁿ-īⁿ
500 phêⁿ=(60) 30000.00
Lân I-seng kim 40000.00
Kiōng 20 0000.00
Tuì-tû iáu khiàm 15 bān.
Lí I-seng ū che sū-chêng, tuì Kàu-sū-hoē tông-ì, m̄-nā án-ni , kap Lân I-seng ū tâng-sim, chi̍t-bīn chiàⁿ-bīn ê sin-chhéng, chi̍t-bīn piⁿ-bīn ê oān-chō͘, ǹg-bāng ē thang ta̍t bo̍k-te̍k, bô phah-sǹg Soan-tō-hoē m̄-chún, soà chiong Lióng-īⁿ hō͘ Lâm-pō͘ Tāi-hoē keng-êng. Só͘-í chhiu-thiⁿ Chiong-hoà i-īⁿ khui chiap-siū pō͘-hoē, soà Siông-tì Uí-oân-hoē phài lâng chò Lióng-īⁿ chiong-thêng, tī chhun-kî Tāi-hoē pò-kò siu-chèng kap chhiáⁿ ĪN-tiúⁿ. Tân Chong-huī chò Chiau-hô 12 nî tō͘ Chiong-hoà I-īⁿ-tiúⁿ. Kó-jiân 12 nî 4 goe̍h ín-tō͘. Kam I-seng koè-khì Kó͘-lōng-sū, Lí I-seng khì Má-kai i-īⁿ, Tân Chong-huī chiū-jīm.
Sin-lâu i-īⁿ hō͘ chèng-hú jīn-tēng siā-hoē chû-siān sū-gia̍p. Chhin-chhiūⁿ tuì Tāi-chèng 12 nî í-āu, muí nî tī 2 goe̍h 11 ji̍t Kí-goân-chiat hit-ji̍t, tuì Kiong-lāi-séng pài-niá Há-sù-kim 500 kho͘. Siū Bêng-tī kap Tāi-chèng chit nn̄g-keng ê Kiù-chè-hoē 4 pái hā-sù, 2.500 kho͘ ê chō͘-sêng-kim. Khèng-hok-hoē ê chō-sêng-kim 2000 kho͘. A.D. 1932 nî, Kiong-lāi Tāi-sîn Pì-su-koaⁿ lâi sī-chhat, chhui-chiàn chò iu-liông siā-hoē sū-gia̍p thoân-thé, te̍k-pia̍t pài-niá 3000 kho͘ ê hā-sù-kim. A.D. 1933 nî 10 goe̍h, pài-niá chi̍t ê pián, sī Hông-hō͘ pē-hā só͘ chò ê gū-koa, teh tông-chêng khó͘-thàng ê nāi-pīⁿ lâng. Hiah ê hā-sù-kim in-uī i-īⁿ keng-huì bô kàu , só͘-í tī muí-nî the̍h chhut-khì ēng. Kàu Lâm Tāi teh keng-êng ê sî, só͘ pài-siū hā-sù-kim chiū pó-chûn boē ēng.
Chiong-hoà i-īⁿ iû-goân tit-tio̍h chèng-hú sêng jīn sī siā-hoē chû-siān sū-gia̍p ū hā-sù-kim tuì Tāi-chèng 11 nî khí, kàu Chiau-hô 14 nî , lóng-kiōng 15 hoê, kim-gia̍h 8161 kho͘. Chit ê chîⁿ lóng bô ēng, nā kiàn-tiok Sin i-īⁿ ê sî, beh khí chi̍t keng kì-liām pīⁿ-sek.
iā ū Hông-hō͘ pē-hā ê gū-koa tiàu tī pīⁿ-īⁿ-lāi , thang kám-siā Hông-hō͘ pē-hā ê thiàⁿ-sioh pīⁿ-khó ê peh-sìⁿ.
Lióng-īⁿ lóng ū khàn-hō͘-hū-tiúⁿ. Tī Sin-lâu pīⁿ-īⁿ--ê, chiū-sī Má I-seng-niû. Hù Ko͘-niû, Gô͘ Ko͘-niû. Tī Chiong-hoà pīⁿ-īⁿ--ê, sī Lia̍t Ko͘-niû. Í-chiūⁿ lóng chīn-la̍t tī I-koán, chò i-liâu thoân-tō ê kang. Chhin-chhiūⁿ Lia̍t Ko͘-niû pe̍h thâu-mn̂g chiah tò-khì, in só͘ chò ê kang chin thang siàu-liām.
iáu ū lióng-īⁿ tong-ji̍t tù chi̍t pún sió-chheh, chiū-sī io̍h-kio̍k ê io̍h-phín kap chún-pī-io̍h, Siau-to̍k-hoat, Gán-kho, Goā-kho, Hián-bî-kiàⁿ, Kiám-piān Hong-hoat kap i-io̍h, sī chò tng-sî pit-iàu ê chheh, sī chin ū kè-ta̍t, thang siàu-liām.
Taⁿ phí-jîn siá i-liâu thoân-tō-sú kàu chia oân.
漢羅（Ùi原文改寫）
南部教會醫療傳道史
(接7月第5面)
顏振聲
1941年8月677期 7-8
佇昭和11年正月，就是A.D. 1936年，醫生李約翰離開台南病院，去彰化醫院做院長，tiàm前蘭醫生的厝；發揮手腕，經營彰化病院。心內拍算有這款病院佇市街的中心近附無官立的病院，閣中部教會攏佇近邊，又蘭醫生40年成績，患者昌盛，比到前佇台南hiah少，心內歡喜，閣較出力。M̄-kú病院無親像新樓病院的廣闊，不止遺憾。所以蘭醫生chhun 的 10萬佮賣新樓病院的 4萬，共14萬，就the̍h 18000外，買彰化教會堂；一萬買台南馬醫生的自宅。也the̍h 3萬左右買彰化教會堂近邊前後的厝地，通新築理想的病院。有請メソレタム商會的店主設計。若予人請負著35萬。
試想手內金。
山腳地2甲外，佮人契約每坪4箍，約略3.000外。
25000.00
彰化拜堂地
佮近邊地約略6.0000.00
賣新樓病院4.0000.00
馬醫生寄附5000.00
現時彰化病院
500坪=(60)30000.00
蘭醫生金40000.00
共20 0000.00
對除猶欠15萬。
李醫生有這事情，對教士會同意，m̄-nā按呢，佮蘭醫生有同心，一面正面的 申請，一面邊面的援助，向望會通達目的，無拍算宣道會毋准，紲將兩院予南部大會經營。所以秋天彰化醫院開接受部會，紲常治委員會派人做兩院章程，佇春期大會報告修正佮請院長。陳宗惠做昭和12年度彰化醫院長。果然12年4月引渡。甘醫生過去鼓浪嶼，李醫生去馬偕醫院，陳宗惠就任。
新樓醫院予政府認定社會慈善事業。親像對大正12年以後，每年佇2月11日紀元節彼日，對宮內省拜領下賜金500箍。受明治佮大正這兩間的救濟會4擺下賜，2.500箍的助成金。慶復會的造成金2000箍。A.D. 1932年，宮內大臣秘書官來視察，推薦做優良社會事業團體，特別拜領3000箍的下賜金。A.D. 1933年10月，拜領一个匾，是皇后陛下所做的御歌，teh同情苦痛的癩病人。遐的下賜金因為醫院經費無夠，所以佇每年the̍h出去用。到南大teh經營的時，所拜受下賜金就保存袂用。
彰化醫院猶原得著政府承認是社會慈善事業有下賜金對大正11年起，到昭和14年，攏共15回，金額8161箍。這个錢攏無用，若建築新醫院的時，欲起一間紀念病室。
也有皇后陛下的御歌吊佇病院內，通感謝皇后陛下的疼惜病苦的百姓。
兩院攏有看護婦長。佇新樓病院--ê，就是馬醫生娘。富姑娘，吳姑娘。佇彰化病院--ê，是烈姑娘。以上攏盡力佇醫館，做醫療傳道的工。親像烈姑娘白頭毛才倒去，in所做的工真通數念。
猶有兩院當日著一本小冊，就是藥局的 藥品佮準備藥，消毒法，眼科，外科，顯微鏡，檢便方法佮醫藥，是做當時必要的冊，是真有價值，通數念。
Taⁿ鄙人寫醫療傳道史到遮完。