熱天的讚美
Joa̍h-thiⁿ ê chàn-bí
文獻資訊
| 項目 | 資料 |
|---|---|
| 作者 | 吳天命 Gô͘ Thian-bēng |
| 卷期 | 台灣教會公報 |
| 卷期 | 第676期 |
| 日期 | 1941/7 |
| 頁數 | 23 |
白話字（原文數位化）
Joa̍h-thiⁿ ê chàn-bí
Gô͘ Thian-bēng
1941年7月676期 23-24
Joa̍h-thiⁿ lâi lah, tiàm tī kiong-chhong toā tiùⁿ-pâng-ē thang hióng-siū tuì thiⁿ-téng lâi ê sî lâi lah. Tiàm soaⁿ-iá, tiàm hái-piⁿ, thang tit-tio̍h toā kàu-hùn ê sî lâi lah! Ah! Joa̍h-thiⁿ! tī joa̍h-thiⁿ lâng choè tē-it loân-bō͘ thian-jiân , thian-jiân iā sī tī chit ê sî te̍k-pia̍t teh loân-bō͘ lán ê khoán. Joa̍h-thiⁿ si̍t-chāi sī lán lâng kap thian-jiân chim-chhuì chiap-ha̍p ê sî. Só͘-í lán tio̍h chún-pī lâi thiaⁿ tuì joa̍h-thiⁿ ê ge̍h, hoe, gâm-chio̍h , chuí só͘ chhut te̍k-pia̍t ê siaⁿ-im. Thiaⁿ chit ê siaⁿ-im lâi têng-sin lán ê lêng-sèng ê lâng ū hok-khì ah!
Tiàm tī gō͘-kái ê sè-kan, it-ti̍t uí-siok-khì ê goá ê sim sin siau-iâu tī joa̍h-thiⁿ ê lo̍k-hn̂g, chiū oē tit-tio̍h oāⁿ-sin. Kú-kú siū ap-pek khi-hū ê lêng-hûn, chiap-tio̍h khoan-tāi ê hong-kong chiū oē tit-tio̍h koh-oa̍h. Hō͘ hi-ké ê tîn ài kap o-ian-thûn só͘ phah lâ-sàm ê goá ê sim-sîn, lim chheng-chēng ê chuí thang tit-tio̍h soé chheng. Si̍t-chāi joa̍h-thiⁿ chiū-sī goá ê sim-lêng thang gū-tio̍h Siōng-tè ê Sèng-lêng ê sî, thang chek-thiok sin-heng chín-khí, ióng-béng oa̍h-tāng ê chu-goân, chiap-siū tuì thiⁿ lâi ê soé-lé ê sî!
Tò tńg thian-jiân ji̍p tī tan-sûn ê seng-oa̍h ê sî, chiū-sī tò-tńg choè kiáⁿ sim ê hó ki-hoē. Lī-khui jîn-kang ê chong-sek, chiū kūn chū-jiân ê thian-chin ê sî, lâng chiū oē lī-khui ké ê chok-uî, lâi tò-tńg tī pún-ngó͘ , hoat-chhut chì-chêng lō͘-chhut Siōng-tè ê kiáⁿ-jî ê bīn-bo̍k. Tī-hia bô hi-ké, hi-sim thán-hoâiⁿ ,suî-sî thang hióng-siū hong-kong chè-goa̍t ê kau-poê. Tiàm hái-piⁿ kap lia̍h hî lâng kóng-oē, tiàm soaⁿ-an kap chhò-chhâ ê lâng kau-poê, put-ti put-kak ê tiong-kan oē thang chih-chiap tio̍h pún-lâi ê jîn-chêng lâi hō͘ lán hoat-ta̍t choè Siōng-tè ê kiáⁿ ê phín-sèng. Che si̍t-chāi sī joa̍h-thiⁿ ê un-sù.
Ah! Sóng-khoài ê joa̍h-thiⁿ! Lí lâi beh chhoā goán lī-khui mi̍h kui tī lêng, lī-khui tē kui tī thiⁿ. Goán tio̍h pàng-sak kiau-ngō͘ ê sim lâi thiaⁿ-thàn lí ê siaⁿ. Lí ū tài toā ê sù-bēng beh lâi chhoā kan-ta uī-tio̍h jio̍k-thé teh siūⁿ, teh choè kang, teh tô͘-bô͘ ê jîn-luī, hō͘ i tit-tio̍h thiⁿ-téng ê kong-hui só͘ soé ji̍p tī lêng ê seng-oa̍h. Jîn-luī ah! tio̍h tì-ì hoan-gêng joa̍h-thiⁿ ê thian-jiân, lâi thiaⁿ Siōng-tè ê siaⁿ.
漢羅（Ùi原文改寫）
熱天的讚美
吳天命
1941年7月676期 23-24
熱天來lah，tiàm佇穹蒼大帳房下通享受對天頂來的時來lah。Tiàm山野，tiàm海邊，通得著大教訓的時來lah！Ah！熱天！佇熱天人做第一戀慕天然，天然也是佇這个時特別teh戀慕咱的款。熱天實在是咱人佮天然chim喙接合的時。所以咱著準備來聽對熱天的月，花，岩石，水所出特別的聲音。聽這个聲音來重新咱的靈性的人有福氣ah！
Tiàm佇誤解的世間，一直uí-siok氣的我的心新逍遙佇熱天的樂園，就會得著換新。久久受壓迫欺負的靈魂，接著寬大的風光就會得著閣活。予虛假的藤愛佮o-ian-thûn所拍lâ-sàm 的我的心神，啉清靜的水通得著洗清。實在熱天就是我的心靈通遇著上帝的聖靈的時，通積蓄新興振起，勇猛活動的資源，接受對天來的洗禮的時！
倒轉天然入佇單純的生活的時，就是倒轉做囝心的好機會。離開人工的裝飾，就近自然的天真的時，人就會離開假的作為，來倒轉佇本我 ，發出至情露出上帝的囝兒的面目。佇遐無虛假，虛心坦橫，隨時通享受風光chè-goa̍t 的交陪。Tiàm海邊佮掠魚人講話，tiàm山鞍佮chhò柴的人交陪，不知不覺的中間會通接接著本來的人情來予咱發達做上帝的囝的 品性。這實在是熱天的恩賜。
Ah！爽快的熱天！你來欲chhoā阮離開物歸佇靈，離開地歸佇天。阮著放拺驕傲的心來聽趁你的聲。你有帶大的使命欲來chhoā kan-ta為著肉體teh想，teh做工，teh圖謀的人類，予伊得著天頂的光輝所洗入佇靈的生活。人類ah！著致意歡迎熱天的天然，來聽上帝的聲。