小宇宙
Sió Ú-tiū
文獻資訊
| 項目 | 資料 |
|---|---|
| 作者 | 王守勇 Ông Siú-ióng |
| 卷期 | 台灣教會公報 |
| 卷期 | 第676期 |
| 日期 | 1941/7 |
| 頁數 | 5 |
白話字（原文數位化）
Sió Ú-tiū
Ông Siú-ióng
Chiap téng goe̍h 15 bīn
1941年7月676期 5-6
(6) Sì goe̍h 13 hō ê Koh-oa̍h-cheh, tī Chiong-hoà Pat-koà-soaⁿ-téng, ū khui Koh-oa̍h-cheh chó-thian Kî-tó-hoē, hù-hoē-chiá 96 miâ, chit kuí nî lâi hán-tit khoàⁿ-kìⁿ ê hó sêng-chek.
(7) Chiong-hoà I-koán ê sū-bū-oân T sàng tī 5 goe̍h 4 hō ê chó-thian kî-tó-hoē chú-lí kóng, “Goá lâi Chiong-hoà 28 goe̍h ji̍t, chit-tia̍p beh lī-khui ê sî, tī goá it-seng choè toā ìn-siōng ê , chiū-sī muí sèng-ji̍t ê chó-thian kî-tó-hoē, pài 3 àm ê kî-tó-hoē kap muí pài 4 ê Pat-koà-soaⁿ-téng ê chó-thian kî-tó-hoē, che sī goá chò kám-siā, kám-kek ê só͘-chāi.” Goán chit uī hiaⁿ-tī, chiong kî-tó chò seng-oa̍h, tī chiong-lâi ê seng-oa̍h, oa̍h chiū-sī Ki-tok , sí chiū-sī lī-ek.
(8) Hiān-chāi lán Tè-kok ê chóng jîn-kháu sī chi̍t ek gō͘-pah bān lâng .Si̍t-chāi thang hoaⁿ-hí tio̍h kám-siā Siōng-tè, in-uī I kóng, tio̍h siⁿ-thoàⁿ chē-chē ê sù-hok, kin-á-ji̍t si̍t-hiān tī lán pún-kok.
(9) Tâi-tiong Tiong-hoē-lāi ū 18 uī kàu-hoē chhiáⁿ bo̍k-su, ū lâng kóng, Iâ-so͘ ê cha̍p-peh lô-hàn, kiám-chhái ū lâng kóng , sī cha̍p-peh hó-hàn.
(10) Hok-tó-koān lâi ê Kok-bîn ha̍k-hāu ê seng-tô͘ kan, siang-siⁿ kiáⁿ ê seng-tô͘ kóng ū 390 siang.
(11) Sian-tâi Ki-tok-kàu Chheng-liân-hoē chin oa̍h-tāng, chit pang ū bé chi̍t keng Sèng-kong-hoē ê lú ha̍k-īⁿ beh chò Chheng-liân-hoē hoē-koán, chi̍t bān gîn.
(12) Sè-kan ê hū-lú ,ē siⁿ kiáⁿ ê hū-jîn-lâng chin choē; ē chò gâu ê lāu-bó ê chin chió. Ū châi-tek ê hū-jîn-lâng chī-chuī ê chhoē-tio̍h ah? I ê kè-ta̍t toā-toā iâⁿ-koè pó-chio̍h.
(13) Ū khoàⁿ-kìⁿ kuí-nā chiah chuí-gû tī hî-tî teh kō-e̍k, i ê thâu chhun-chhut tī chuí-bīn teh chhoán-khuì, in ê khoài-lo̍k bē kóng tit, chí-ū chi̍t-sî sī chhin-chhiūⁿ tī ke̍k-lo̍k ê seng-oa̍h; in-uī chò gû tio̍h thoa, m̄-kú iā ū an-hioh ê só͘-chāi. Chò lâng tio̍h boâ, kiám bô thang an-hioh ê só͘-chāi mah? Lâi kàu sèng-tiān, tī-hia thang tit-tio̍h un-huī ê lêng-e̍k, koh tit-tio̍h lêng-khì ê chhoán-khuì. Sèng-tiān í-goā , sè-kan kiám ū khah an-chēng thang an-hioh ê só͘-chāi mah? Iâ-so͘ kóng, “Lín kìⁿ-nā tio̍h boâ taⁿ tāng-tàⁿ ê , tio̍h chiū-kīn goá; Goá beh hō͘ lín an-hioh.”
(14) Chiân-kiâu Kiōng-ài Lú ha̍k-hāu-tiúⁿ Chiu Chài-sù Sian-seⁿ ū tù chi̍t pún “Ki-tok-kàu iàu-soat” ê chheh, tuì Kèng-seng-siā teh hoat bē.
(15) To-tiân Sò͘ Bo̍k-su beh koè-khuì ê sî kóng, “Goá beh thiâm-chēng lâi khì.” Hiaⁿ-ché! Lán m̄-chai kuí-ê ē thang thân-chēng khì kìⁿ Thiⁿ-pē?
(16) ìn-tō͘ ê gû-bó ū chi̍t ek 2 chheng 3 pah bān chiah, che sī uī-tio̍h in ê chong-kàu kìm sat-seng ê kiat-kó. Siat-sú tōng-bu̍t nā m̄-thang thâi, chiū chit ê sè-kài m̄-chai lâng beh khah chē á-sī tōng-bu̍t beh khah chē? Lâng sī bān-ni̍h ê thâu, Siōng-tè só͘ chhòng ê tōng-bu̍t , bô chi̍t-hāng m̄-thang thâi lâi chò lâng ê lō͘-ēng.
漢羅（Ùi原文改寫）
小宇宙
王守勇
接頂月15面
1941年7月676期 5-6
(6) 四月13號的閣活節，佇彰化八卦山頂，有開閣活節佐天祈禱會，赴會者96名，這幾年來罕得看見的好成績。
(7)彰化醫館的事務員 T sàng佇5月4號的佐天祈禱會主理講，「我來彰化28月日，這霎欲離開的時，佇我一生最大印象的 ，就是每聖日的佐天祈禱會，拜3暗的祈禱會佮每擺4个八卦山頂的佐天祈禱會，這是我最感謝，感激的所在。」阮這位兄弟，將祈禱做生活，佇將來的生活，活就是基督，死就是利益。
(8)現在咱帝國的總人口是一億五百萬人。實在通歡喜著感謝上帝，因為伊講，著生湠濟濟的賜福，今仔日實現佇咱本國。
(9)台中中會內有18位教會請牧師，有人講，耶穌的十八羅漢，kiám-chhái有人講，是十八好漢。
(10) 福島縣來的國民學校的生徒間，雙生囝的生徒講有390雙。
(11) 仙台基督教青年會真活動，這pang有買一間聖公會的女學院欲做青年會會館，一萬銀。
(12)世間的婦女，會生囝的婦人人真濟；會做gâu 的老母的真少。有才德的婦人人chī-chuī 的揣著ah？伊的價值大大贏過寶石。
(13)有看見幾若隻水牛佇魚池teh翱浴，伊的頭伸出佇水面teh喘氣，in 的快樂袂講得，只有一時是親像佇極樂的生活；因為做牛著拖，m̄-kú也有安歇的所在。做人著磨，kiám無通安歇的所在mah？來到聖殿，佇遐通得著恩惠的靈浴，閣得著靈氣的喘氣。聖殿以外，世間kiám有較安靜通安歇的所在mah？耶穌講，「恁見若著磨擔重擔的 ，著就近我；我欲予恁安歇。」
(14) 前橋共愛女學校長周再賜先生有著一本「基督教要說」的冊，對更生社teh發賣。
(15) 多田Sò͘牧師欲過氣的時講，「我欲恬靜來去。」兄姊！咱毋知幾个會通thâm-chēng去見天父？
(16)印度的牛母有一億2千3百萬隻，這是為著in 的宗教禁殺生的結果。設使動物若毋通刣，就這个世界毋知人欲較濟抑是動物欲較濟？人是萬物的頭，上帝所創的動物，無一項毋通刣來做人的路用。