咱是團體
Lán sī thoân-thé
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第676期 |
| 日期 | 1941/7 |
| 頁數 | 1 |
白話字（原文數位化）
Lán sī thoân-thé
1941年7月676期 1-2
Bô, goá sìⁿ Thú, lí sìⁿ Bû. Sui-jiân án-ni, hé, m̄-sī chhin-chhiūⁿ Kang-soaⁿ ê gêng-géng, Liû-khiû ê lê-khak hiah cheng-chha. Lí, goá sī lâng, án-ni lán sī thoân-thé. Goân-khí-thâu A-tong sī to̍k-sin-chiá, Siōng-tè thè i siat-hoat, hō͘ i ū thâu-tuì. Tuì án-ni, siⁿ-kiáⁿ thoân-sun, kiat-chiâⁿ ka-têng , hiong-chhoan, to͘-chhī, siā-hoē, kok-ka. Che sī chèng-bêng jîn-luī sī thoân-thé.
iū-koh lâng sìn Chú Iâ-so͘ kiat chò chi̍t ê sèng-hoē, chhin-chhiūⁿ Sù-tô͘ Pó-lô kóng, An-ni lín bô koh chò goā-bīn lâng, kià-kha--ê; chiū-sī kap sèng-tô͘ siāng kok, chò Siōng-tè ke-lāi ê lâng, siū khí-chō tī chiah ê sù-tô͘ kap sian-ti ê tē-ki téng, Ki-tok Iâ-so͘ ka-tī chò chhù-kak iàu-kín ê chio̍h; chāi tī I kìⁿ-nā só͘ khí--ê, lóng saⁿ liân-lo̍k , tiàm tī Chú lâi chiām-chiām chiâⁿ-chò sèng-tiān; lín iā tiàm tī I saⁿ-kap siū khí-chō, chiâⁿ-chò Siōng-tè tè ēng Sîn só͘ khiā-khí ê chhù(Í-hut-só͘ 2:19-22). Che sī lí-sióng ê thoân-kiat.
- Sī kian-kò͘: Lâng nā khí chhù tī chio̍h-poâⁿ-téng, hō͘ lo̍h, toā-chuí kàu, hong chhoe, chhiong-tio̍h hit keng chhù bē tó-hoāi, in-uī tē-ki tī chio̍h-poâⁿ téng. Nā khí tī thô͘-soa téng, hō͘ lo̍h, toā-chuí kàu, hong chhoe, chhiong-tio̍h hit keng chhù, chiū tó-hoāi. Tē-ki iàu-kín!
Lán pài Siōng-tè saⁿ-kap chò chi̍t ê thoân-thé, siat-sú chiàu kám-chêng, kiaⁿ sè-le̍k, á-sī chham-chhap sím-mi̍h pa̍t-mi̍h ê kà-sī, hong-sio̍k tī Chú ê hok-im ê lāi-bīn , chit hō thoân-thé ē bô pêng-an, ē siau-bia̍t. Sin-chiú té tī kū phoê-lông; ū lông li̍h chuí lāu ê thó͘-khuì. Chhiáⁿ khoàⁿ kàu-hoē le̍k-sú ê iân-kek chiū chāi.Tio̍h chhin-chhiūⁿ chia só͘ kóng, siū khí-chō tī chiah-ê sù-tô͘ kap sian-ti ê tē-ki téng, chiàu in ê kà-sī lâi cho͘-chit thoân-thé. Ki-tok Iâ-so͘ ka-tī chò chhù-kak iàu-kín ê chio̍h, hō͘ chhù-piah liân-lo̍k. Tāi-ke liân tī Chú lâi chò chi̍t-thé Kiù-chú iàu-kín!
- Ū êng-kng. Bó͘ hū-jîn-lâng pún sī sian-siⁿ-niû, saⁿ-lâng hû, gō͘-lâng chhah, taⁿ tiōng-hu sí, piàn sàn-hiong, soà lo̍h ài-hō͘-liâu; sui-jiân ū thoân-thé thang oá-khò, m̄-kú siā-hoē jīn-tēng i sī khit-chia̍h-pô, thé-biān choân bô. Lán sio̍k chit thoân ū án-ni bô? Bô; tī Siōng-tè ê bīn-chêng lán pún hā-téng, taⁿ tuì sìn Chú soà kap Mô͘-se, Pó-lô, Tí-phò-lat, Má-lī-a, chiah ê sèng-tô͘ pêⁿ téng, koh ji̍p che̍k chò Siōng-tè ke-lāi ê lâng, seng-keh liáu, koh seng-keh, ná ē chiah thé-biān leh!
Chhì siūⁿ, tī toā-siâⁿ, ū chi̍t ê tāi-chiòng teh sàn-pō͘, lâng khiā lō͘-piⁿ, tāi-chiòng tuì chi̍t lâng kóng, Chìn sàng O-ha-iō, go-za-i-ma-su! Hit lâng tī chèng-lâng tiong chin thé-biān. Thêng chi̍t-ē-a, tāi-chiòng khì in tau, i koh-khah thé-biān. Taⁿ uī-tio̍h lâi kap lán khiā-khí, lán tāi-ke chheng-chò sèng-tiān, hit ê kong-êng siáⁿ khoán?
- Ē tióng-toā. Chhiáⁿ siūⁿ “chiām-chiām chiâⁿ-chò sèng-tiān” chit kù, tiong-kan ū “chiām-chiām chiâⁿ” ê jī-kù, chiām-chiām chiâⁿ, sī ū tióng-toā kap ū lêng-le̍k ê sèng-chit. Thang tuì le̍k-sú lâi chèng-bêng, sìn Chú ê lâng tī Chú chiūⁿ-thiⁿ āu, ū 120 lâng , í-āu ū 3000,5000 lâng, kàu kuí-nā bān(Sù-tô͘ Hēng-toān 21:20). Kàu-hoē kiàn-siat khí-thâu sī tī Sat-má-lī-a, Sū-lī-a ê An-thê-o, sió A-se-a, koh kàu Au-chiu, hiān-sî siat tī sè-kài chē-chē kok.
Lūn kàu chû-siān, chho͘-tāi ê kàu-hoē sī iú bû siong-thong. āu-lâi hok-im thoân kàu goā-kok chē-chē hiaⁿ-tī chí-moē, sui-jiân m̄-bat saⁿ-kìⁿ-bīn, nā thiaⁿ-tio̍h hn̄g-hn̄g sìn Chú ê lâng siū-lān, in chiū tê chîⁿ, khì sio pang-chān(Sù-tô͘ Hēng-toān 11:28,29; I Ko-lîm-to 16:1,2; II Ko-lîm-to 8:1,2, 9:2) Keng-koè chē-chē nî, kàu-hoē koh-khah hoat-tián, sìn-chiá tī lia̍t-kok tiong, ū kiàn-siat ko͘-jî-īⁿ, pīⁿ-īⁿ, téng-téng ê ki-koan. án-ni lâng-gia̍h ke-thiⁿ, hó sū iā toè in (Iok-hàn 15:16).
Sìn Chú ê lâng siū khún-tio̍k, tû-khì tī Iû-thài tē í-goā , tuì A.D. 64 nî khí, iok ū 250 nî kú, ū-ê koaiⁿ-kaⁿ, phah-sí thâi-thâu, pàng-hoé sio sí, iá-siù kā sí, ū-ê tèng si̍p-jī-kè, thiām lo̍h hái sí, ū-ê lâm-iû tiám hoé, chióng-chióng ê sí, chhám ke̍k ,iáu-kú kàu-hoē ti̍t-ti̍t heng, che sī cháiⁿ-iūⁿ? Chú sī éng-oa̍h.
Siúⁿ-sù sìn I ê lâng oa̍h-la̍t, ē tí-khòng chióng-chióng ê khó͘-lān; Siōng-tè iā teh khip-ín lâng lâi kui-oá, só͘-í kàu-hoē ē tióng-toā(Iok-hān 6:44 ; I Pí-tek 2:4,5). Chit khoán ê thoân-thé m̄-chai lán ta̍k lâng ū ka-ji̍p á boē?
漢羅（Ùi原文改寫）
咱是團體
1941年7月676期 1-2
無，我姓Thú，你姓Bû。雖然按呢，火，毋是親像岡山的龍眼，琉球的螺殼hiah精差。你，我是人，按呢咱是團體。源起頭亞當是獨身者，上帝替伊設法，予伊有頭對。對按呢，生囝傳孫，結成家庭，鄉村，都市，社會，國家。這是證明人類是團體。
又閣人信主耶穌結做一个聖會，親像使徒保羅講，An-ni恁無閣做外面人，寄腳--的；就是佮聖徒siāng國，做上帝家內的人，受起造佇chiah 的使徒佮先知的地基等，基督耶穌家己做厝角要緊的石；在佇伊見若所起--的，攏相連絡 ，tiàm佇主來漸漸成做聖殿；恁也tiàm佇伊相佮受起造，成做上帝綴用神所徛起的厝(以弗所2：19-22)。這是理想的團結。
- 是堅固：人若起厝佇石磐頂，雨落，大水到，風吹，沖著彼間厝袂倒壞，因為地基佇石磐頂。若起佇土沙等，雨落，大水到，風吹，沖著彼間厝，就倒壞。地基要緊！
咱拜上帝相佮做一个團體，設使照感情，驚勢力，抑是參插甚物別物的教示，風俗佇主的福音的內面，這號團體會無平安，會消滅。新酒té佇舊皮囊；有囊裂水漏的吐氣。請看教會歷史的沿革就在。著親像遮所講，受起造佇chiah 的使徒佮先知的地基等，照in 的教示來組織團體。基督耶穌家己做厝角要緊的石，予厝壁連絡。大家連佇主來做一體救主要緊！
- 有榮光。某婦人人本是先生娘，三人扶，五人插，taⁿ丈夫死，變散鄉，紲落愛護寮；雖然有團體通倚靠，m̄-kú社會認定伊是乞食婆，體面全無。咱屬這團有按呢無？無；佇上帝的面前咱本下等，taⁿ對信主紲佮摩西，保羅，Tí-phò-lat，馬利亞，chiah 的聖徒平等，閣入籍做上帝家內的人，升格了，閣升格，ná會chiah體面leh！
試想，佇大城，有一個大將teh散步，人徛路邊，大將對一人講，Chìn sàng O-ha-iō，go-za-i-ma-su！彼人佇眾人中真體面。停一下a，大將去in兜，伊閣較體面。Taⁿ為著來佮咱徛起，咱大家稱做聖殿，彼个光榮啥款？
- 會長大。請想「漸漸成做聖殿」這句，中間有「漸漸成」的字句，漸漸成，是有長大佮有能力的性質。通對歷史來證明，信主的人佇主上天後，有120人，以後有3000，5000人，到幾若萬(使徒行傳21：20)。教會建設起頭是佇撒馬利亞，敘利亞的安提阿，小亞西亞，閣到歐洲，現時設佇世界濟濟國。
論到慈善，初代的教會是有無相通。後來福音傳教外國濟濟兄弟姊妹，雖然毋捌相見面，若聽著遠遠信主的人受難，in就題錢，去相幫贊(使徒行傳11：28，29；哥林多前書16：1，2；哥林多後書8：1，2，9：2)經過濟濟年，教會閣較發展，信者佇列國中，有建設孤兒院，病院，等等的機關。按呢人額加添，好事也綴in (約翰 15：16)。
信主的人受窘逐，除去佇猶太地以外，對A. D. 64年起，約有250年久，有的關監，拍死刣頭，放火燒死，野獸kā死，有的釘十字架，thiām落海死，有的 淋油點火，種種的死，慘極，iáu-kú教會直直興，這是怎樣？主是永活。
賞賜信伊的人活力，會抵抗種種的苦難；上帝也teh吸引人來歸倚，所以教會會長大(約翰6：44 ；彼得前書2：4，5)。這款的團體毋知咱逐人有加入抑袂？